ქვეყნის ეკონომიკური და ინფლაციური პროგნოზები უმჯობესდება. თუკი წლის დასაწყისში მშპ-ს საპროგნოზო ტემპი მოკრძლებული იყო, ხოლო ფასების ზრდა შედარებით მაღალი, წლის პირველი კვარტალის შემდეგ ვითარება შეიცვალა. ახლა ინფლაციის მოლოდინი შემცირებული,ა ხოლო ეკონომიკის ტემპი კიდევ უფრო მომატებული. დადებით ტენდენციაზე საუბრობენ როგორც მთავრობის წარმომადგენლები, ისე დამოუკიდებელი ანალიტიკოსები.

2025 წლის თებერვალში, საქართველოში წლიური ინფლაცია 2.4%-მდე გაიზარდა, იანვარში დაფიქსირებული 2%-იანი ინფლაციის შემდეგ. ეს სხვაობა, ძირითადად, შიდა ინფლაციის ზრდით იყო განპირობებული. ასევე, იმპორტის ინფლაციის ზრდითაც. ამავდროულად, შერეული საქონლის ინფლაციის დინამიკა ოდნავ შენელდა 2025 წლის თებერვალში და წლიური 3.1% დაფიქსირდა, იანვარში კი ეს მაჩვენებელი 3.5% იყო.

„ამ ყველაფრის ფონზე, „გალტ ენდ თაგარტი“ პროგნოზირებს, რომ 2025 წელს საშუალო წლიური ინფლაციის მაჩვენებელი იანვარში ნავარაუდევი 3.9%-ის ნაცვლად, 3.7% იქნება“, - აღნიშნულია ორგანიზაციის მიმოხილვაში.

პარალელურად კი საქართველოს ეკონომიკური ზრდის პროგზონი 5%-დან 6.8%-მდე გაიზარდა. საინვესტიციო ბანკის განცხადებით, მონაცემების გადახედვის მიზეზი მიმდინარე წლის ორ თვეში მოსალოდნელზე მაღალი ტემპი იყო.

2025 წლის თებერვალში საქართველოს ეკონომიკა 7.7%-ით გაიზარდა, იანვარში კი მშპ-ს ორნიშნა 11.1%-იანი ზრდა დაფიქსირდა. ჯამში მიმდინარე წლის ორ თვეში ეკონომიკა 9.4%-ით არის გაზრდილი. ეკონომიკური ზრდის ძირითადი მამოძრავებელი პროფესიული და სამეცნიერო სექტორი, საინფორმაციო ტექნოლოგიები, ტრანსპორტი და სხვა დარგები იყო.

„წლის დასაწყისში საბაზისო სცენარით 5%-იანი ეკონომიკური ზრდის პროგნოზი გვქონდა. მიმდინარედ კი როდესაც იმაზე მაღალი ზრდის ტემპი დაფიქსირდა, ვიდრე პროგნოზებში ჩადებული გვქონდა, მოგვიწია გადახედვა. 6.8%-მდე გავზარდეთ საბაზისო სცენარში მშპ-ს პროგნოზი. ეს ზრდა როგორც წინა წელს, ფაქტობრივად, მოხმარებით იქნება განპირობებული მიმდინარე წელსაც“, - განაცხადეს „გალტ ენდ თაგარტში“.

ეკონომიკისა მინისტრის მოადგილე ვახტანგ ცინცაძემ საინვესტიციო სააგენტოს პროგნოზი მოიწონა. როგორც მან აღნიშნა, მსგავსი ტიპის ანალიტიკური ორგანიზაციების შეფასებებს საერთაშორისო საფინანსო ინსტიტუტები ეყრდნობიან და მათი მხრიდან ასევეა მოსალოდნელი საქართველოს ეკონომიკური ზრდის პროგნოზის მატების მიმართულებით გადახედვა. როგორც წესი, წლის დასაწყისში სხვადასხვა საერთაშორისო საფინანსო ინსტიტუტები თუ ანალიტიკური ორგანიზაციები უფრო კონსერვატიული პროგნოზებით შემოიფარგლებიან და აკვირდებიან ტენდენციებს, რის შედეგადაც თავიანთი შეფასების კორექტირებას ახდენენ.

„ჩვენი მოლოდინია, რომ საქართველოს ეკონომიკაში წლის ბოლომდე შენარჩუნდება მაღალი ეკონომიკური ზრდის ტემპი, რასაც ხელს უწყობს გაზრდილი ეკონომიკური აქტივობა, რაც ქვეყანაში ფიქსირდება. აგრეთვე მიმდინარე მნიშვნელოვანი ინტრასტრუქტურული პროექტები, რომლებიც ხელს უწყობს ეკონომიკური ზრდის დაჩქარებას და ასევე სტრუქტურული რეფორმები, რასაც საქართველოს მთავრობა ეკონომიკის პროდუქტიულობის ზრდის მიმართულებით ახორციელებს“, - აღნიშნა ვახტანგ ცინცაძემ.

ISET-ის კვლევითი ინსტიტუტის წამყვანი ეკონომისტის პროგნოზით, 2025 წელს 6%-იანი ეკონომიკური ზრდის მიღწევა, რაც მთავრობის ოფიციალური პროგნოზია, დამოკიდებული იქნება იმაზე, რამდენად დასტაბილურდება პოლიტიკური სიტუაცია ქვეყანაში.

„ჯერჯერობით, რასაც ვხედავთ, არაფერი მიგვანიშნებს იმისკენ, რომ ხელისუფლება ფიქრობს გარკვეულ დათმობებზე წასვლას და ხალხის აზრის გათვალისწინებას. ვგულისხმობ არა მარტო ჩვეულებრივი ადამიანების ხმას, არამედ ბიზნესის ხმას, რადგან ჩვენ ვხედავთ, რომ ბოლო პერიოდში, შეიძლება მასშტაბურად არა, მაგრამ ბიზნესმაც დაიწყო სუბარი იმ პრობლემებზე, რომელიც მას ნამდვილად აქვს“, - განაცხადა გიორგი პაპავამ.

მიმდინარე ტენდენციების სრულ ანალიზს აკეთებს ეკონომიკის დოქტორი სოსო არჩვაძე. მისი შეფასებით, 2025 წლის თებერვალში საქართველოს ეროვნულმა მეურნეობამ, მიუხედავად გლობალური ეკონომიკის რეცესიის ნიშნებისა, უზრუნველყო ეკონომიკის ზრდა 7.7 პროცენტით, რაც 2.4-ჯერ აღემატება გლობალური ეკონომიკის 2025 წლის საპროგნოზო ზრდის მაჩვენებელს (3.2%). ეკონომიკის ზრდა დაფიქსირდა დარგებში, რომლებზეც მოდის ქვეყნის ეკონომიკის 82 პროცენტზე მეტი (გადამამუშავებელი მრეწველობისა და მშენებლობის გარდა).

ინფლაციამ, რომელიც იანგარიშება 305 დასახელების საქონელ-წარმომადგენლის მიხედვით, 2025 წლის თებერვალში წინა წლის თებერვალთან 2.4 პროცენტი შეადგინა. ეს წლიური ინფლაციის ყველაზე მაღალი მაჩვენებელია 2023 წლის აპრილის შემდეგ, თუმცა შრომის ანაზღაურების მატების ტემპი მნიშვნელოვნად აღემატებოდა ინფლაციის ტემპს, რაც განაპირობებდა დასაქმებულ პირთა რეალური შემოსავლებისა და კეთილდღეობის ზრდას.

საქართველოში საკმაოდ დაბალი ინფლაცია, ლარის გამყარების ტენდენცია (თებერვლის ბოლოს ის თვის დასაწყისთან შედარებით 2.0 პროცენტით გამყარდა), ქართული კომპანიების აქციების კოტირების ზრდა ლონდონის ბირჟაზე ადასტურებენ ეკონომიკის ერთმნიშვნელოვნად პოზიტიურ ტრენდს და მის ადეკვატურად აღქმას საერთაშორისო ბიზნეს-აქტიორებისა და ინსტიტუტების მხრიდან.

ექსპორტით იმპორტის გადაფარვამ 2025 წლის თებერვალში 43.1 პროცენტი შეადგინა, რაც 2024 წლის თებერვლის მაჩვენებელს (39.3%) 3.8 პუნქტით აღემატება. ამასთან, იმპორტის დონე ყველაზე დაბალ ნიშნულზეა საქართველოში ბოლო 35 თვის მანძილზე (2022 წ. აპრილში იმპორტი - 986.0 მლნ. აშშ დოლარი).

თებერვალში საქართველოს მთლიანი ექსპორტი 7.1 პროცენტით შემცირების პირობებში - ადგილობრივი ექსპორტი შემცირდა 10.8 პროცენტით, რეექსპორტი - 3.6 პროცენტით, იმპორტი კი - 6.6 პროცენტით.

დანარჩენი მსოფლიოდან საქართველოში განხორციელებული ფულადი ტრანზაქციები სტაბილურად მზარდია (თებერვალში წინა წლის თებერვალთან: 4.9%). საქართველოში განხორციელებული წმინდა ტრანზაქციების 60.6 პროცენტი მოდის მრავალრიცხოვანი ქართული შრომითი მიგრანტებით ყველაზე გამორჩეულ 5 ქვეყანაზე (აშშ, იტალია, ისრაელი, გერმანია და საბერძნეთი).

საქართველოს ეკონომიკის ზრდა საერთაშორისო პოლიტიკური ტურბულენტობისა და მსოფლიო ეკონომიკის რეცესიისკენ ჩამოყალიბებული ტენდენციის ფონზე მას არა მარტო პოზიტიურად გამოარჩევს გლობალურად, არამედ უზრუნველყოფს ცხოვრების დონის გაუმჯობესების სისწრაფით ლიდერ სახელმწიფოთა შორის ადგილის მყარ დამკვიდრებას და მოწინავე საბაზრო ეკონომიკის ქვეყნებისაგან ისტორიული ჩამორჩენის სწრაფი დაძლევის პოზიტიურ პროცესს“, - აღნიშნა სოსო არჩვაძემ.