პოლიტიკურმა გაურკვევლობამ უძრავი ქონების სექტორიც დაძაბა

პოლიტიკურმა გაურკვევლობამ უძრავი ქონების სექტორიც დაძაბა

უძრავი ქონების ბაზარზე ვითარება იცვლება და ამის მიზეზი ქვეყანაში არსებული დაძაბული პოლიტიკური ვითარებაა. პრობლემას ქმნის ლარის გაუფასურებაც. მყიდველები დაბნეულნი არიან და უკვე ნაბიჯის გადადგმას ვერ ბედავენ.

უძრავი ქონების სექტორის წარმომადგენლებმა უკვე დაასახელეს მიზეზები, რამაც ვითარება საგრძნობლად შეცვალა. საქმე ისაა, რომ ბოლო 3-4 კვირაა მყიდველებმა შეაჩერეს შესყიდვის პროცესი, იჯარაზე მოთხოვნა თითქმის გაჩერდა და ზოგადად, უამრავი გარიგება ჩაიშალა, რადგან ადამიანებმა დაკარგეს სტაბილურობის განცდა.

უძრავი ქონების მართვის კომპანია კედარო ჯგუფის დამფუძნებელმა ეკატერინე ჭიღლაძემ დაადასტურა, რომ აქციებმა და პოლიტიკურმა მოვლენებმა უარყოფითი გავლენა მოახდინა უძრავი ქონების ბაზარზე.

მოთხოვნის შემცირების გამო, გართულდა ტურისტული საქმიანობისთვის განკუთვნილი ბინებისა თუ აპარტამენტების გაქირავება. ჩვენი კომპანია ელოდა, რომ ასეც მოხდებოდა, რადგან გამოცდილებამ გვაჩვენა, რომ უძრავი ქონების ბაზარი საკმაოდ მგრძნობიარეა ქვეყანაში მიმდინარე პოლიტიკური მოვლენების მიმართ. ვიმედოვნებთ, დინამიკა გაუმჯობესდება და დაუბრუნდება ძველ ნიშნულს.

ბოლო პერიოდში თბილისში მიმდინარე აქციებმა და პოლიტიკურმა დაძაბულობამ უარყოფითი გავლენა მოახდინა უძრავი ქონების ბაზარზე. მყიდველებმა შეაჩერეს შესყიდვა, იჯარაზე მოთხოვნა თითქმის გაჩერდა, უამრავი გარიგება ჩაიშალა, რადგან ადამიანებმა დაკარგეს სტაბილურობის განცდა. იყო ასეთი შემთხვევებიც, რომ ევროპელმა ინვესტორებმა უარი თქვეს საქართველოში ინვესტირებაზე. მეორე მხრივ, ვისაც ნაყიდი აქვს თბილისში ბინა, გვთხოვენ გავყიდოთ, - განუცხადა ჯიბისის ეკატერინე ჭიღლაძემ.

2024 წლის მაისში ახალ პროექტებში ტრანზაქციების 4%-იანი კლება შეინიშნება, ძველ პროექტებში კი, 2023 წლის მაისთან შედარებით, მაჩვენებელი 22%-ით არის დაკლებული. სწორედ ამიტომ ქოლიერს ჯორჯიაში ფიქრობენ, რომ თბილისში უძრავი ქონების ფასი შემცირდება. როგორც კვლევებისა და მონაცემთა სერვისის ხელმძღვანელმა ლეო ჩიქავამ განაცხადა, ამის მიზეზი 25%-ით გაზრდილი მიწოდება და შემცირებული მოთხოვნაა.

მთელ წელზე რომ ვისაუბროთ, პირველ 5 თვეში ტრანზაქციებში 1%-იანი ზრდა გვაქვს. ტენდენციას რომ შევხედოთ მარტსა და მაისში კლება იყო, იანვარ-თებერვალში კი მცირე ზრდა იყო. აპრილში იყო დიდი 27%-იანი მატება, მაგრამ ეს გამოწვეული იყო იმით, რომ 2023 წლის აპრილში ძალიან ცოტა ტრანზაქცია იყო.

სარეალიზაციო ფასის ზრდის ტემპი შენელებულია და ველოდებით, რომ წლის ბოლოსკენ და შემდეგი წლის დასაწყისში, შემცირება იქნება. ზუსტი თქმა გამიჭირდება, თუმცა მცირე კლება ალბათ გვექნება, მნიშვნელოვანი - ნაკლებად.

ამის რამდენიმე მიზეზი არსებობს. ერთი, ის არის, რომ გაზრდილია მიწოდება. უჩვეულოდ ბევრი მშენებლობაა თბილისში დაწყებული. 25%-ით მეტი ბინა შენდება ვიდრე წინა წლებში. 2017-2022 წწ-ში, საშუალოდ, მშენებარე იყო 60-იდან 68 ათას ბინამდე, 2023 წლის ბოლოს იყო 86 ათასი ბინა.

მეორე მიზეზი ის არის, რომ მიგრანტების ეფექტი მილევადია, ამოწურულია. ყველა ეს ფაქტორი ერთად ქმნის მოლოდინს, რომ ფასი შემცირებისკენ წავა. ამას ემატება დოლარის კურსი, წინა წლებში 2,50-მდეც იყო კურსი, ახლა იზრდება, შესაბამისად, ეს დოლარში გამოხატულ ფასებზეც აისახება, - აღნიშნა ლეო ჩიქავამ.

მდგომარეობას დრამატულობა ესმის ბიზნესს, მაგრამ ფასისი შემცირებაზე კატეგორიულად უარს ამბობს. კომპანია არსის გენერალური დირექტორი ბესო ორთოიძე აცხადებს, რომ პირველადი უძრავი ქონების ბაზარზე ფასის შემცირების წინაპირობა არ არსებობს. როგორც მან გადაცემა უძრავი ქონების პროსპექტში სტუმრობისას განაცხადა, ფასის ზრდას ნელი ტემპებით გაგრძელდება.

ბაზარს, მომხმარებელს სჭირდება გაიგოს, რომ ეს არის ფასის ახალი ნიშნული. თუ გავიხსენებთ ფასი იყო 500 დოლარი, შემდეგ 700 დოლარი, ახლა ეს არის 1 200 დოლარი. ჩათვალეთ, რომ ამაზე ნაკლებად ვეღარ იყიდით და ამასთან შეგუებას გარკვეული დრო სჭირდება. რადგან ფასი გაიზარდა და გაჩერდა შემდეგ მოლოდინი გაჩნდა, რომ უნდა დაიწიოს. ფასი რომ შემცირდეს საჭიროა თვითღირებულების დაკლება, რისი საფუძველიც დღეს არ არსებობს.

უძრავი ქონების ფასი გაიზრდება, თუმცა სტაბილურად გაიზრდება და არა ისე სწრაფად როგორც წინა წლებში. ისტორიულადაც ასე იყო, ახალ ნიშნულზე ადიოდა, შემდეგ უკვე ნელი ტემპით იზრდებოდა, დღეს მაგ ეტაპზე ვართ, - აღნიშნა ორთოიძემ.

ლევკოთეა თვითღირებულების შემცირების საფუძველი მართლა არ არსებობს, მაგრამ რეალიზაციის მკვეთრი და ხანგრძლივი შემცირების პირობებში, არსებობს დეველოპერების დიდი მადის შემცირების ალბათობა.
1 თვის უკან