პოლონელი ფერმერები პოლონეთ-უკრაინის საზღვრის ყველა საკონტროლო-გამშვები პუნქტის ბლოკირებას გეგმავენ. პროფკავშირების განცხადებით, საზღვრის სრული ბლოკადა 20 თებერვალს არის დაგეგმილი.
„20 თებერვალს, ფერმერების 30-დღიანი საყოველთაო გაფიცვის ფარგლებში, ყველა ჩვენი ქმედება კონცენტრირებული იქნება ყველა საკონტროლო-გამშვები პუნქტის ბლოკირებაზე“, - აღნიშნულია პროფკავშირების განცხადებაში.
მათივე ცნობით, ბლოკირებული იქნება არა მხოლოდ სასაზღვრო პუნქტები, არამედ სარკინიგზო სადგურებისა და საზღვაო პორტების მისასვლელები.
9 თებერვალს პოლონელმა ფერმერებმა 30-დღიანი საყოველთაო გაფიცვა გამოაცხადეს. ისინი უკრაინიდან იაფფასიანი აგრარული პროდუქციის იმპორტს აპროტესტებენ. აქციის მონაწილეების პოზიციას პოლონეთის პრემიერ-მინისტრიც იზიარებს.
