ორლანდო მეჯიქის “ჯადოქრული” სვლა გრძელდება. გოგა ბითაძის გუნდმა ნბა-ში ზედიზედ მე-7 მატჩი მოიგო, რაც ამ რიგითად შერაცხული გუნდისთვის მართლაც საოცარი შედეგია. ფლორიდელთა მორიგი ლუკმა შარლოტ ჰორნეტსი გახლდათ, რომელიც “ჯადოქრებმა” ორლანდოში 130:117დაამარცხეს.
საქართველოს ნაკრების ცენტრი „ორლანდოს“ სასტარტო შემადგენლობაში იყო და შედეგიანადაც გაისარჯა: 20 წუთი, 11 ქულა, 7 მოხსნა, 3 პასი. გოგამ 7-დან 5 ორქულიანი და 1-დან 1 საჯარიმო ჩააგდო. ორმაგ დუბლსაც ჩაიწერდა, რომ არა მწვრთნელის ჩანაფიქრი – მეოთხე პერიოდში ტანდაბალი ხუთეულით ითამაშა. მორიც ვაგნერსა და გოგა ბითაძეს ბოლოს თამაშის საშუალება არ მისცა.
სამაგიეროდ, გაილაღა მორიცის ძმამ, ფრანც ვაგნერმა, რომელმაც 30 ქულა ჩააგდო. პაოლო ბანკერომ მატჩი 23 ქულით დაასრულა.
ეს იყო „ორლანდოს“ ზედიზედ მე-7 გამარჯვება მიმდინარე სეზონში (სულ 12). ამ მაჩვენებლით ის აღმოსავლეთის კონფერენციაში მეორე-მესამე ადგილებს იყოფს „მილუოკისთან“. შემდეგ მატჩს ორლანდოელები კვლავ შინ, 29 ნოემბერს, ვაშინგტონ ვიზარდსთან გამართავენ.
