სომხეთის მთავრობის შენობასთან საპროტესტო აქციაზე შეტაკების შედეგად 34 ადამიანი დაშავდა, მათ შორის 16 პოლიციელი. ინფორმაციას ამის შესახებ სომხური მედია ქვეყნის ჯანდაცვის სამინისტროზე დაყრდნობით ავრცელებს.
„დაშავებულია 16 პოლიციელი და 18 სამოქალაქო პირი. 17-მა ადამიანმა უკვე მიიღო საჭირო დახმარება და გაწერეს. 16 დაშავებული განაგრძობს მკურნალობას“, - აღნიშნეს სამინისტროში.
მანამდე საპროტესტო აქციის მონაწილეები პარლამენტის შენობაში შეღწევას შეეცადნენ. მომიტინგეებმა პარლამენტთან მიიტანეს მთიანი ყარაბაღის დროშები და ნიკოლ ფაშინიანისგან უფრო მტკიცე ნაბიჯების გადადგმა მოითხოვეს.
აზერბაიჯანის თავდაცვის სამინისტროში ყარაბაღში ლოკალური ანტიტერორისტული ღონისძიებების დაწყების შესახებ განაცხადეს.
