პოლონეთში, ქალაქ კრაკოვში ნატო-ს ეგიდით სამხედრო პოლიციის ხელმძღვანელთა კონფერენცია გაიმართა. ფორუმში მონაწილეობა საქართველოს შეიარაღებული ძალების გაერთიანებული შტაბის სამხედრო პოლიციის დეპარტამენტის უფროსმა, ვიცე-პოლკოვნიკმა კახაბერ ჩიხრაძემ მიიღო. კონფერენციაზე ნატო-ს ქვეყნების სამხედრო პოლიციის ხელმძღვანელებმა განსაკუთრებული ყურადღება მულტინაციონალური ბატალიონის საკითხს დაუთმეს. ფორუმის მონაწილეებს ბატალიონის ისტორიის, მიზნებისა და სტრუქტურის, ასევე შესაძლებლობების, განხორციელებული ოპერაციების (მისიები), წვრთნების, საგანმანათლებლო პროგრამებისა და სამომავლო პერსპექტივების შესახებ პრეზენტაცია წარუდგინეს.
ნატო-ს ქვეყნების სამხედრო პოლიციის მულტინაციონალურ ბატალიონში ამ ეტაპზე პოლონეთი ასეულის, ხოლო ჩეხეთი, სლოვაკეთი და ხორვატია ოცეულების დონეზე არის წარმოდგენილი. ნატო-ს ქვეყნების სამხედრო პოლიციის ბატალიონის სტრუქტურის დოკუმენტი ალიანსის არაწევრი ქვეყნებისათვისაც ღიაა. ქართულ მხარეს მომავალში მულტინაციონალურ ბატალიონთან თანამშრომლობის საშუალება მიეცემა. პოლონეთში ვიზიტის ფარგლებში, ვიცე-პოლკოვნიკმა კახაბერ ჩიხრაძემ ნატო-ს სამხედრო პოლიციის სწავლებისა და შეფასების ცენტრის ხელმძღვანელთან, პოლკოვნიკ ვასილევსკისთან შეხვედრა გამართა.
მხარეებმა საქართველოს სამხედრო პოლიციის ნატო-ს სამხედრო პოლიციის უმაღლესი სწავლებისა და შეფასების ცენტრთან თანამშრომლობის საკითხი განიხილეს.
საუბარი შეეხო, ასევე, ქართველი სამხედრო პოლიციელების სპეციალურ კურსებზე მივლინების შესაძლებლობებსა და თანამშრომლობის პერსპექტივებს. ვიცე-პოლკოვნიკი ჩიხრაძე, ასევე პოლონეთის ჟანდარმერიის ხელმძღვანელს, გენერალ-მაიორ მიროსლავ როზმუსს შეხვდა და საქართველოს სამხედრო პოლიციის პირადი შემადგენლობის გადამზადების, ოპტიმალური საბრძოლო ქვედანაყოფების ჩამოყალიბებაზე ესაუბრა.
