არგენტინის ფეხბურთის ასოციაციამ საფეხბურთო სამყაროს პელეს გარდაცვალება მიუსამძიმრა, მაგრამ ეს სამძიმრის წერილი პოლემიკის საფუძველი გახდა.
„არგენტინის ფეხბურთის ასოციაცია ღრმა მწუხარებას გამოთქვამს და გლოვობს ლეგენდარული ბრაზილიელი ფეხბურთელის, ისტორიაში ერთ-ერთი საუკეთესო მოთამაშის პელეს გარდაცვალებას და სამძიმარს უცხადებს მის ოჯახსა და მთელ ბრაზილიას“, - ნათქვამია განცხადებაში.
გულშემატკივრებში გაბრაზება გამოიწვია ფრაზამ - „ერთ-ერთი საუკეთესო“, რასაც სოციალურ ქსელში დიდი პოლემიკა მოჰყვა. ბევრმა მიიჩნია, რომ არგენტინელები პელეს ისტორიაში უდიდეს ფეხბურთელად არ მიიჩნევენ, რადგან დიეგო მარადონა და ლიონელ მესი არგენტინელები არიან.
აღსანიშნავია, რომ არგენტინულმა ტელევიზია Cronica TV-მ პელეს გარდაცვალება პუბლიკას ასე ამცნო: „ფეხბურთის ისტორიაში მესამე საუკეთესო ფეხბურთელი გარდაიცვალა“. ცხადია, არგენტინულმა ტელევიზიამ მასზე წინ დიეგო მარადონა და ლიონელ მესი დააყენა.
შეგახსენებთ, რომ პელე 82 წლის ასაკში 29 დეკემბერს, მსხვილი ნაწლავის კიბოთი გარდაიცვალა. ფეხბურთის მეფეს 3 იანვარს დაკრძალავენ.
