თითქმის მთელი წლის განმავლობაში უძრავი ქონების ბაზარზე აჟიოტაჟური ვითარება იყო. დეკემბრიდან მოყოლებული, მართალია, ბინებზე მოთხოვნამაც და ფასმაც შედარებით იკლო, თუმცა საიჯარო გადასახადი მაინც ძალიან მაღალია. რასაკვირველია, ასე ვერ გაგრძელდება და ანალიტიკოსები მალე უძრავ ქონებაზე ფასების შემცირების ტენდენციის დაწყებას ელოდებიან.
„თიბისი კაპიტალის“ კვლევის მიხედვით, 2022 წლის იანვარ-ნოემბრის პერიოდში საცხოვრებელი უძრავი ქონების ფასი 15%-ით გაიზარდა, ხოლო ქირის ფასი - 70%-ით. გაყიდვების ღირებულება კი 24%-ით არის გაზრდილი.
რასაკვირველია, საცხოვრებელ უძრავ ქონებაზე ფასების ზრდის ძირითადი მიზეზი მიგრაციაა. კვლევის მიხედვით, მიგრანტებისგან მოთხოვნა, ძირითადად, გაქირავების ბაზარზე მოდის.
„2022 წლის 11 თვეში თბილისში, მიგრანტების მიერ შეძენილი ბინების წილი მთლიან გაყიდვებში მხოლოდ 5%-ია, გაქირავებულ ბინებში კი - 32%. „თიბისი კაპიტალის“ მოლოდინით, გაყიდულ ბინებში მიგრანტების წილი 11.5% იქნება, გაქირავებულ ბინებში კი - 18%. საცხოვრებელი უძრავი ქონების ბაზარი 2023 წელს ზრდას განაგრძობს, თუმცა მიგრაციის ეფექტი 2024 წლიდან უარყოფითი იქნება“, - აღნიშნულია კვლევაში.
„თიბისი ჯგუფის“ მთავარი ეკონომისტი ოთარ ნადარაია „ჯიბისისთან“ ბინის ქირის გაზრდილ ფასებს აფასებს და აცხადებს, რომ ქირის ფასის ზრდის უდიდესი ნაწილი მიგრანტების შემოსვლისგან გამოწვეულმა დიდმა მოთხოვნამ გამოიწვია.
ეკონომისტი ასევე შიდა ფაქტორებზეც ამახვილებს ყურადღებას და პანდემიის შემდეგ გახსნილი ეკონომიკისა და სწავლის დისტანციურიდან აუდიტორიულ რეჟიმზე გადასვლისგან გამოწვეულ მაღალ მოთხოვნასაც უკავშირებს.
ეკონომისტის აზრით, უძრავ ქონებაზე ფასების ზრდის ტემპის შენელება 2023 წლის დასაწყისიდანვეა შესაძლებელი.
უძრავი ქონების სააგენტო „სიგმას“ ხელმძღვანელი ზურაბ ლაჩაშვილი კი აღნიშნავს, რომ მიმდინარე ეტაპზე, მოთხოვნასთან დაკავშირებული გარკვეული ეიფორია მაინც შეიმჩნევა.
„წელს უძრავ ქონებაზე ფასები მნიშვნელოვნად გაიზარდა და შეეხო, როგორც გასაყიდ, ისე გააქირავებელ ბინებს. ეს გამოიწვია ყველასათვის ცნობილმა მოვლენებმა, როგორიც არის მიგრანტების ორი ნაკადის საქართველოში შემოსვლა. ასევე რეგულაციებმა, რომელიც დააწესა მთავრობამ და გაძვირდა სამშენებლო მასალები. ჯამში ამ ფაქტორებმა მნიშვნელოვანი გავლენა იქონია უძრავი ქონების ღირებულემაზე.
მიმდინარე ეტაპზე მოთხოვნასთან დაკავშირებული გარკვეული ეიფორია მაინც ნარჩუნდება, როგორც გასაქირავებელ, ისე გასაყიდ ბინებზე. ფასებმა ცოტათი იკლო. მაგალითად: 3-ოთახიანი ბინა (90 კვ/მ) 1800 დოლარად შემოვიდა თავიდან და გაქირავდა 1000 დოლარად. გუშინ მივიღე ინფორმაცია, რომ 150 კვ/მ ბინა, სადაც კარგი ხარისხის რემონტია, ქარავდება იგივე ფასში“, - განაცხადა ლაჩაშვილმა და აღნიშნა, რომ უძრავ ქონებაზე ფასების სტაბილიზაციის მოლოდინი აქვს.
„ველოდები, რომ ფასი რაღაც ნიშნულზე დასტაბილურდება. ყველაფერი გასაგებია, მოლოდინიც და არსებული ვითარებაც, მაგრამ ღირებულების დასტაბილურება ყოველთვის ხდება ხოლმე. დროსთან ერთად, ადამიანები იძულებულნი გახდებიან რეალობის შესაბამისად მოიქცნენ“, - დასძინა ლაჩაშვილმა.
ნოემბერში, თბილისში საცხოვრებელი ბინების ტრანზაქციების რაოდენობამ 3 865 ერთეული შეადგინა, რაც წინა წლის ნოემბერთან შედარებით 9%-ით მეტია. ბაზრის ზომა კი - 28%-ით, 214 მილიონ აშშ დოლარამდეა გაზრდილი.
აღსანიშნია, რომ ახალ კორპუსებში ბინების შეძენა 10%-ით გაიზარდა, ძველ აშენებულებში კი, 2021 წლის ნოემბერთან შედარებით, მაჩვენებელი 7%-ით არის გაზრდილი.
თბილისში ახალაშენებული ბინების საშუალო შეწონილი გასაყიდი ფასი გარეუბნებში - 15%-ით, ფართო ცენტრში - 13%-ით, ქალაქის ცენტრში კი 14%-ით გაიზარდა.
ძველი ბინების შემთხვევაში საშუალო შეწონილი გასაყიდი ფასი გარეუბანში 11%-ით გაიზარდა, ქალაქის ცენტრსა და ფართო ცენტრში კი 9% და 2%-იანი ცვლილება აღინიშნა.
