იტალიის სერია A-ს ოფიციალურ ვებგვერდზე ხვიჩა კვარაცხელიას ინტერვიუ გამოქვეყნდა, რომელშიც ქართველი ფეხბურთელი საკუთარ თავზე, დიეგო მარადონასთან შედარებაზე, ლუჩანო სპალეტისა და სხვა საკითხების შესახებ საუბრობს.

„რთულია, ჩემი მხრიდან ამაზე ლაპარაკი არასწორი იქნება. თუმცა, რა თქმა უნდა, ბურთთან ერთად ძალიან მიყვარს ყოფნა, ხანდახან ცოტა ზედმეტი მომდის, მაგრამ ამაზე ვმუშაობ. ბურთი ცოტა ზედმეტად მიყვარს და მიწევს ამის გაკეთება, თუმცა ყველაფერი გამოსწორებადია და მთავარია ბურთის ქონით გუნდს გამოვადგე.

მარადონასთან არცერთი ფეხბურთელის შედარება არ შეიძლება. ძალიან რთული იქნება, რომ ასეთი ფეხბურთელი კიდევ იყოს, მაგრამ ძალიან მიხარია, როცა მადარებენ. ეს უფრო მეტი პასუხისმგებლობაა.

სპალეტი? პირველ რიგში მის ადამიანობას გამოვარჩევ. თითქმის ყოველთვის მელაპარაკება, რაღაცას მიხსნის, მასწავლის, ძალიან განვითარდი, განსაკუთრებით ტაქტიკურად მისგან ბევრი ვისწავლე. ძალიან მაგარი მწვრთნელია და სულ მეუბნება, რომ უფრო მეტი უნდა ვაკეთო, არაფრით დავკმაყოფილდე და გუნდთან ერთად მეტი ვითამაშო.

კიმ მინ-ჯე საოცარი ადამიანია, ძალიან პოზიტიურია. როცა მას ელაპარაკები, აუცილებლად გაგეცინება, რადგან ძალიან ბევრს ხუმრობს. ერთ-ერთი საუკეთესო მცველია მსოფლიოში, რადგან, როცა ის მოედანზეა, გაქვს იმედი, რომ მეტოქეს ბურთს აუცილებლად წაართმევს და გუნდს დაიცავს. „უდინეზე“ ძალიან კარგი გუნდია, კარგი ფეხბურთელები ჰყავს. ჩვენთვის თითოეული თამაში მნიშვნელოვანია“, - თქვა კვარაცხელიამ.