მთავრობა „წყალტუბოს ახალი სიცოცხლის“ ფარგლებში 14 სანატორიუმის გასხვისებას გეგმავს, რომელთა ღირებულება, დღევანდელი შეფასებით, დაახლოებით 50 მლნ ლარს შეადგენს. 5 ივლისს წარდგენილი 14 საინვესტიციო პროექტი სახელმწიფო ქონების ეროვნულმა სააგენტომ საპრივატიზაციოდ 6 ივლისს უკვე გამოიტანა და საგანგებო პირობიანი აუქციონები 4 აგვისტოს 17:00 საათამდე გაგრძელდება. ელექტრონული აუქციონი უკვე მიმდინარეობს.

როგორც ეკონომიკის მინისტრი ლევან დავითაშვილი აღნიშნავს, მას რამდენიმე ინვესტორთან საუბარი უკვე ჰქონდა, რომლებიც წყალტუბოს ობიექტების შეძენითა და ინვესტიციების განხორციელებით არიან დაინტერესებულნი.

„14 საპრივატიზაციო ობიექტი უკვე გამოტანილია ელექტრონულ აუქციონზე. ვფიქრობ, დაინტერესება იქნება ძალიან დიდი. ჩვენ შეხვედრა გვქონდა ბიზნესთან, გავაგრძელებთ კომუნიკაციას აუქციონის პერიოდში, რადგან მათ სრულყოფილი ინფორმაცია მივაწოდოთ იმ პოტენციალზე, რომელიც წყალტუბოს გააჩნია. ეს შესწავლები გაკეთებულია კუშმანის მიერ. შესაბამისად, საერთაშორისო ექსპერტიზაზეა დაფუძნებული და ეს არ არის მხოლოდ ჩვენი შეთავაზება. შესაბამისად, ეს არის სანდო ინფორმაცია, რომელსაც, როგორც წესი, ინვესტორები ენდობიან ხოლმე.

წყალტუბო რეალურად უნდა გადავაქციოთ მაღალი კლასის ბალნეოლოგიურ და მრავალფუნქციური დანიშნულების კურორტად. პირადად მე მქონდა საუბარი რამდენიმე ინვესტორთან, რომლებიც დაინტერესებულები არიან წყალტუბოს ობიექტების შეძენით და ინვესტიციების განხორციელებით. ვფიქრობ, ჩვენ მოვახდენთ ამ ობიექტების რეალიზებას ისე, რომ უმოკლეს დროში დაიწყოს ინვესტორებთან ერთად უკვე გენგემის კონკრეტიკა, რათა ინვესტორებმა ინვესტიცია ეფექტიანად განახორციელონ.

რა თქმა უნდა, დაცული იყოს სახლემწიფოს და ადგილობრივი მოსახლეობის ინტერესები, მაგრამ ამავე დროს ინვესტორებისთვის ეს ყველაფერი იყოს მიმზიდველი და საბოლოოდ მივიღოთ ჰარმონიულად განვითარებული, მნიშვნელოვანი კურორტი საქართველოში“, - აღნიშნა „ბიზნესპარტნიორთან“ დავითაშვილმა.

საინტერესოა თითოეული სანატორიუმის ღირებულება, რომელთაც, წესით და რიგით, 4 აგვისოტმდე ახალი მფლობელი უნდა გამოუჩნდეს:

„უშიშროება“ - ლოტი მოიცავს 250768.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1-N26 შენობა-ნაგებობებს. საწყისი ფასი 8.4 მლნ ლარია. საინვესტიციო ვალდებულება კი, 25.41 მლნ ლარი

„მედეა“ - ლოტი მოიცავს, 76621.00 კვ.მ. არასასოფლო-სამეურნეო დანიშნულების მიწის ნაკვეთს და მასზე არსებულ N1-N17 შენობა-ნაგებობებს. საწყისი ღირებულება 5.82 მლნ-ია, საინვესტიციო ვალდებულება 10 მლნ ლარი;

„მეგობრობა“ - ლოტი მოიცავს, 104176.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1-21 შენობა-ნაგებობებს. საწყისი ღირებულება 5.23 მლნ-ია, საინვესტიციო ვალდებულება 15.69 მლნ ლარი;

„თბილისი“ - ლოტი მოიცავს, 28399.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1, N2 და N3 შენობა-ნაგებობებს. საწყისი ფასი 3.14 მლნ-ია, საინვესტიციო ვალდებულება 9.42 მლნ ლარი;

„იმერეთი“ - ლოტი მოიცავს, 41150.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1, N2 და N3 შენობა-ნაგებობებს. საწყისი ღირებულება 3.12 მლნ-ია, საინვესტიციო ვალდებულება კი, 9.37 მლნ ლარი;

„რკინიგზელი“ - ლოტი მოიცავს, 33000.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებული N1-N9 შენობა-ნაგებობებს. საწყისი ღირებულება 3.09 მლნ-ია, საინვესტიციო ვალდებულება 9.27 მლნ ლარი;

„სასტუმრო წყალტუბო“ - ლოტი მოიცავს, 50062.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1-N11 შენობა-ნაგებობებს. საწყისი ფასი 2.9 მლნ-ია. საინვესტიციო ვალდებულება კი, 8.96 მლნ ლარი;

„აია“ - ლოტი მოიცავს, 34342.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1-N13 შენობა-ნაგებობებს. საწყისი ფასი 2.8 მლნ-ია, საინვესტიციო ვალდებულება კი, 8.4 მლნ ლარი;

„სანატორიუმი წყალტუბო“ - სანატორიუმი მოიცავს 34342.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1-N13 შენობა-ნაგებობებს. საწყისი ღირებულება კი, 2.8 მლნ ლარია. საინვესტიციო ვალდებულება კი 7.8 მლნ ლარი.

„ფინალი“ - ლოტი მოიცავს 38224.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1-N5 შენობა-ნაგებობებს. საწყისი ფასი 2.1 მლნ-ია, საინვესტიციო ვალდებულება კი, 6.53 მლნ ლარი;

„სავანე“ - ლოტი მოიცავს, 15091.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1-N5 შენობა-ნაგებობებს. საწყისი ღირებულა 2.12 მლნ-ია, საინვესტიციო ვალდებულება კი, 6.37 მლნ ლარი.

„სამგურალი“ - ლოტი მოიცავს 18681.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1 და N2 შენობა-ნაგებობებს. ღირებულება, 2.04 მლნ ლარია, საინვესტიციო ვალდებულება კი, 6.13 მლნ ლარი.

„გელათი“ - ლოტი მოიცავს, 22057.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებულ N1 და N2 (დანგრეული) შენობა-ნაგებობებს. საწყისი ფასი 1.96 მლნ-ია, საინვესტიციო ვალდებულება კი, 5.9 მლნ ლარი;

„გეოლოგი“ - ლოტი მოიცავს, 18586.00 კვ.მ. არასასოფლო-სამეურნეო დანიშნულების მიწის ნაკვეთს და მასზე განთავსებული N1, N2 და N3 შენობა-ნაგებობებს. საწყისი ფასი 1.42 მლნ-ია, საინვესტიციო ვალდებულება კი, 4.26 მლნ ლარი.

საქართველოს პრემიერ-მინისტრის ირაკლი ღარიბაშვილის ინფორმაციით უკვე დამტკიცებულია წყალტუბოს გენერალური გეგმა და კურორტი ამ გეგმის მიხედვით განვითარდება.

„ჩვენი მოლოდინი არის, რომ დაახლოებით 500 მილიონი ლარის ინვესტირება განხორციელდება. რა თქმა უნდა, ეს იქნება კერძო ინვესტიცია, ამას გარდა, სახელმწიფო იღებს ვალდებულებას, რომ დამატებით ათეულობით ლარის ინვესტირება მოახდინოს იმისთვის, რომ წყალტუბო გახდეს თანამედროვე, მსოფლიო დონის სპა-კურორტი, ისეთი, როგორიც ჩვენ გვინახავს ევროპაში, იქნება ეს კარლოვი ვარი, ბადენ-ბადენი თუ სხვა. წყალტუბოს აქვს პოტენციალი, რომ გახდეს მართლაც ევროპული და მსოფლიო დონის სპა-კურორტი“, - განაცხადა ღარიბაშვილმა.

პრემიერ-მინისტრის მტკიცებით, მთავრობა ყველაფერს აკეთებს იმისთვის, რომ კურორტი განვითარდეს და მისი ინფრასტრუქტურა იყოს მაქსიმლურად კეთილმოწყობილი.