საქართველო იმ 38 ქვეყანას შორისაა, რომლებმაც უკრაინის ტერიტორიაზე რუსეთის მიერ ჩადენილი დანაშაულების გამოძიების მოთხოვნით სისხლის სამართლის საერთაშორისო სასამართლოს მიმართეს.

სისხლის სამართლის საერთაშორისო სასამართლოს პროკურორმა, კარიმ ხანმა 2 მარტს უკრაინაში სავარაუდო სამხედრო დანაშაულების გამოძიების დაწყება გამოაცხადა.

დიდი ბრიტანეთის პრემიერ-მინისტრმა, ბორის ჯონსონმა განაცხადა, რომ 38-მა ქვეყანამ უკრაინის ტერიტორიაზე რუსეთის მიერ ჩადენილი დანაშაულების გამოძიების მოთხოვნით სისხლის სამართლის საერთაშორისო სასამართლოს მიმართა.

„უკრაინაში რუსეთის ბარბაროსული შეჭრის გამო, ამაღამ 38-მა ქვეყანამ სისხლის სამართლის საერთაშორისო სასამართლოს ისტორიაში ყველაზე დიდი სარჩელით მიმართა. ჩვენ მკაფიოდ ვამბობთ, რომ პუტინი ვერ ჩაიდენს ამ საზარელ ქმედებებს დაუსჯელად“, - დაწერა ბორის ჯონსონმა Twitter-ზე.