"მიხოს ცოლი  მოუკვდა. ერთი  კვირის შემდეგ  მეზობლებმა  ცოლის დასთან  შეისწრეს. არა  გრცხვენია, მიხო  რეებს აკეთებო - დაამუნათეს. რა  ვიცი, გგონიათ ვიცი, რას  ვაკეთებო,   წამოიკნავლა  მიხომ. ისეა  პუტინის საქმე.   მარტო დარჩა  მეფე ლირივით  იმ  დონეზე, რომ  შობაზე  იმიტირებულ  წირვაზე (მღვდელიც  კი  არ  შეუშვეს)  უაზროდ  უყურებდა  ღვთისმშობლის  ხატს ბუნკერში  მოწყობილ  პატარა  ეკლესიაში.  

პირველად   "შემეცოდა".   ხვდება, რომ  დასასრულისკენ  მიდის და უკან  შემობრუნება  აღარ ძალუძს,  რადგან  გვერდით ერთი  სიმართლის  მთქმელი არა  ჰყავს. ჯერ იყო  და, 10 იანვარს  აშშ-მ გადაახია  თავზე  რუსებს  ულტიმატუმი  და  უაზრო  მოთხოვნები  იმ  ფონზე, რომ  თავად  არაფრის  დათმობა არ  უნდა.

დღეს  ნატოს 28  წევრმა  ერთსულოვნად  სამი თითის  კომბინაცია  უჩვენა, იცის,  რომ ეუთოც  იგივეს  გაიმეორებს.  უფრო უარესიც  მოხდა. 7  იანვარს  ყაზახეთის  პრეზიდენტმა  ქვეყანაში  ვითომ  შემოჭრილ 20  ათასი  "ტერორისტის" (ვერ  ამტკიცებენ  ფაქტებით  ვერანაირად)  წინააღმდეგ  საბრძოლველად  მოიწვია  ოდაკაბეს, ანუ  ფაქტიურად რუსეთის  სამხედროები (არადა 6 იანვარს  რუსებმა უკვე  შეიყვანეს  საიდუმლოდ,  თოყაევთან  შეთანხმებით,  ამოუცნობი  ფორმით რუსი  სამხედროები,  რომლებმაც  ღიად  გაუხსნეს  ცეცხლი  ალმა-ატისა და  ასტანის  მოსახლეობას).  არ  გასულა  5  დღე,  რომ  გუშინ  თოყაევმა  გამოაცხადა,  რომ რუსი და  სხვა  სამხედროები ორ  დღეში  დაიწყებენ  გასვლას  ყაზახეთიდანო.  ეს  შესაძლებელი  გახდა არა ამ  მარიონეტი  თოყაევის  ხათრით,  არამედ  იმიტომ,  რომ ჩინეთის  საგარეო  საქმეთა  მინისტრმა ორი  ზარი გაუშვა-  მოსკოვში და  ასტანაში და  რუსებმა ვერ  გაბედეს  ჩინეთის წინაშე  ხტუნაობა და  მარგარიტა  სიმონიანის  6  პირობა  ყაზახეთის  დახმარების  სანაცვლოდ  ჰაერში  გამოეკიდა.   ჩინეთმა რუსებს  თავისი ადგილი  მიუჩინა და  აჩვენა, თუ ვინაა  ცენტრალურ  აზიაში  "ხაზეინი".  გამწარებულმა  პუტინმა  ბრძანება  გასცა  და  რუსული  ძველი ტანკები  უკრაინისკენ  დაძრა... ალბათ  წვრთნების  ჩასატარებლად  და  პროვოკაციების  მოსაწყობად  უკრაინის  საზღვარზე,  რადგან  მასშტაბური  ომის თავი არა  აქვთ და რომც  გაბედონ,  ჯოჯოხეთს  დაიტეხავენ  თავზე  უსერიოზულესი  სანქციებით.  უკრაინაზე ამ  ერთი წლის  განმავლობაში  გაწეულია 700  მილიონი  დოლარის  დახმარება, უკვე  აწვდიან  ჯაველინებს,  სტინგერებს,  ბაირახტარებს,  საჰაერო  თავდაცვის სხვა  იარაღს და  თვითმფრინავებსაც კი,  რომლისაც  რუსებს  ყველაზე  მეტად  ეშინიათ. ამაზე  იტყვიან  რუსები  "დაპრიგალსაო",  ანუ კაცი  რომ თავის თავს უზამს, მტერიც კი ვერ  უზამს. პუტინმა  შეძლო ნატოს  ქვეყნების ერთ  მუშტად  შეკვრა  თავისი  აგრესიული  პოლიტიკით.   ამით  აგრძნობინეს  მას  აშშ-ნატო-ჩინეთმა, რომ  პოსტსაბჭოთა  სივრცე მისი  უკანა ეზო  აღარ  არის. ეს მალე  აისახება  დადებითად  საქართველოზე  იმით,  რომ  დაიწყება  პრორუსული  ძალების,  პირველ  რიგში  ნაცების,  დაძირვა  და  ახალი  პოლიტიკური  ძალების  გამოჩენა,  ვიღაცეებისთვის  ყურების აწევაც  და  დემოკრატიული  რეფორმების  გატარება, მათ  შორის  სასამართლოში  და საარჩევნო  სისტემაში. არ  ინერვიულოთ!

P.S. დამთავრდა  მითები  ჭკვიან  ლუკაშენკოზე  და ნაზარბაევზე -  ნახეთ  რა  გონივრულად  იქცეოდნენ  და  ქვეყნები უბედურებას  გადაარჩინესო.   არ გამოუვა  არავის  ეშმაკობა  და  რუსების  მოტყუება-გამოყენება - ადრე თუ  გვიან რუსები  მაინც თავის  აგრესიას  ავლენენ  ყველგან და  კიდევ  გამოავლენენ  იმ  ჩვენს  მეზობლებში  კავკასიაში და  აზიაში, ვისაც  რუსების  გამოყენება  უნდათ და თან  თვალი სხვისკენ  უჭირავთ.  დასკვნა  ისაა,  რომ  რუსეთთან  თამაში არ  შეიძლება,  ან  მისი ვასალი  უნდა გახდე,  ან  აშშ-ს, ან ჩინეთს  მიემხრო და  რუსეთს ეს  კარგად  დაანახო. ჯერ  კიდევ  ნოე  ჟორდანია  მიხვდა,  რომ "პატარას  და  დიდის  კანონი  მუდამ  ძალაშია".  გამსახურდია   რომ  ამერიკას რეალურად (ნიქსონი  ამას  სთავაზობდა,  მაგრამ  ვერ  გაბედა  რუსების  შიშით) მიმხრობოდა  თავიდანვე  და  "დამოუკიდებელი"  თამაში  არ  წამოეწყო,  ჩვენ  ავიცილებდით  ამ  უბედურებებს,  რაც  მერე  დაგვატყდა  თავს.  დღეს  საქართველოს  თავისუფლების  და  ასე  თუ  ისე  დამოუკიდებლობის (მთლად  დამოუკიდებელი  ატომური  ქვეყნებიც  კი  არ  არიან  ზოგიერთნი) გარანტი  აშშ-ია  და  არა  ევროკავშირი ან  ნატო. როცა  აშშ  ჩათვლის,  რომ  ჩვენ  უნდა  შევიდეთ  ნატოში,  ასეც  მოხდება -  შეიძლება  მალე,  შეიძლება 10  წელიწადში.   ამიტომ  უნდა  მივხედოთ  ქვეყნის  შიდა  პრობლემებს  და  უზრუნველვყოთ  თავისუფალი  არჩევნები  და  დამოუკიდებელი  სასამართლო,  ეკონომიკის  განვითარება  და  მოსახლეობის  გამრავლება,   იდენტობის  მტკიცედ  შენარჩუნება".