თურქული „ტრაბზონსპორი“ საქართველოს ნაკრებისა და „დინამო ბათუმის“ მარცხენა მცველის, ირაკლი აზაროვის ტრანსფერზე აქტიურად მუშაობს.

"ტრაბზონსპორი" აზაროვში 450 000 ევროს იხდის, "დინამო ბათუმმა" მეტი მოითხოვა

Sabah-ის ინფორმაციით, ტრაბზონელებმა „დინამო ბათუმს“ 450 ათასი ევრო და 30%-იანი წილი შესთავაზეს მომდევნო ტრანსფერისგან (როცა „ტრაბზონსპორი“ ირაკლის სხვა კლუბში გაყიდის), თუმცა ბათუმელებმა 1 მილიონ ევროზე მეტი მოითხოვეს. წყაროს თანახმად მხარეებს შორის მოლაპარაკებები გრძელდება.

კიდევ ერთი პრესტიჟული თურქული გამოცემა 61saat-იც დაახლოებით იმავე ცნობას ავრცელებს, მაგრამ წერს, რომ თურქულმა კლუბმა 400 ათასი ევრო შესთავაზა და სავარაუდოდ, ტრანსფერი უახლოეს მომავალში ოფიციალური გახდება.

აღსანიშნავია, რომ აზაროვს სხვა კლუბებიც აკვირდებიან - „ბრიუგე“, ზაგრების „დინამო“ და „კრასნოდარი“. შედეგად, მას არჩევანი საკმაოდ აქვს. „ტრაბზონსპორი“ კონფერენს ლიგის პლეი-ოფშია, სადაც „რომასთან“ პირველი მატჩი შინ 1:2 წააგო. ამ გუნდის რიგებში არაერთი ცნობილი ფეხბურთელი თამაშობს, მათ შორის, ჟერვინიო, ბრუნო პერესი, ანდრეას კონრელიუსი და მარეკ ჰამშიკი.

ირაკლი აზაროვი "დინამო ბათუმს“ მიმდინარე წელს შეუერთდა და 26 მატჩში 2 გოლის გატანა მოახერხა. მანამდე ირაკლი „დინამო თბილისის“ რიგებში თამაშობდა. 19 წლის ფეხბურთელი მარტში ვილი სანიოლმა საქართველოს ნაკრებში გამოიძახა, დებიუტი კი ივნისში, რუმინეთთან სპარინგში (2:1) ჰქონდა, როდესაც შეუცვლელად ითამაშა.