1-ელიდან 5 ივლისის ჩათვლით დაგეგმილია „ღირსების მარშის“ კვირეული. „თბილისი პრაიდის“ ორგანიზატორები ხელისუფლებას მათი ვალდებულების შესრულებას სთხოვენ - უზრუნველყონ ღონისძიების მონაწილეთა უსაფრთხოება. მხარეთა შორის პირველი შეხვედრა შედგა, რომელიც ინფორმაციული იყო. „პრაიდის“ ორგანიზატორები ხელისუფლების წარმომადგენლებისგან ელოდებიან პასუხს, როდის შედგება მეორე შეხვედრა, რომ მიიღონ კონკრეტული პასუხი, რას აპირებენ იმისათვის, რომ რადიკალური ჯგუფებისგან „ღირსების მარშის“ წევრები დაიცვან.

გვესმის რადიკალური ფრთის, ამა თუ იმ ძალადობრივი ჯგუფების მოწოდებები, არ მიეცეთ „პრაიდის“ ორგანიზატორებს კვირეულის ჩატარების უფლება. ამასთან, მსგავსი ნარატივი ისმის საეკლესიო პირების მხრიდან, მაშინ, როდესაც ეკლესიას ერთ-ერთი მნიშვნელოვანი ადგილი უჭირავს საზოგადოებაში და დიდი გავლენაც აქვს მათზე.

როდის შეხვდებიან „ქართული ოცნების“ წარმომადგენლები „პრაიდის“ წევრებს, ამაზე პასუხი არ აქვთ ხელისუფლებაში.

„არავის შევხვედრივართ, ინფორმაცია არ მაქვს“, - თქვა რიმა ბერაძემ For.ge-სთან.

„თბილისი პრაიდის“ ორგანიზატორი თამაზ სოზაშვილი ჩვენთან საუბრისას ამბობს, რომ ხელისუფლების მხრიდან ჯერ კიდევ ელოდებიან პასუხს. იგი შინაგან საქმეთა სამინისტროს მიმართავს, უზრუნველყოს მათი უსაფრთხოება და „ღირსების მარშში“ მონაწილეები რადიკალური ჯგუფებისგან დაიცვან.

„როგორც ჩანს, შინაგან საქმეთა სამინისტო ხელოვნურად აჭიანურებს ამ შეხვედრას. ზუსტად არ ვიცით, როდის გვექნება მათთან შეხვედრა. პირველ შეხვედრაზე, შსს-ს წარმომადგენელმა თქვა, რომ სხვა ღონისძიებაზე არანაირი პრობლემა არ იქნება, ყველანაირი, მაღალი სტანდარტებით დაიცავენ უსაფრთხოებას, „მარშზე“ კითხვის ნიშნები ჰქონდათ.

არ ვიცი რას იზამ შსს, მაგრამ გეტყვით, რას ვიზამთ ჩვენ: მაქსიმუმს გავაკეთებთ, რომ ვაიძულოთ ხელისუფლება, გამოიყენოს ყველანაირი შესაძლებლობა, რომ მიიღოს ზომები, „ღირსების მარშის“ ჩასატარებლად.

ჩვენ იგივე კომუნიკაცია გვაქვს სხვადასხვა აქტორებთან, როგორც ქვეყნის შიგნით, ასევე მის ფარგლებს გარეთ. ველაპარაკებით, ასევე ძალიან ბევრ ადამიანს. რადიკალური ჯგუფების განცხადებები ხშირად სცდება კანონის ფარგლებს და შეიცავს სისხლის სამართლის დანაშაულს. შსს-მ  წინასწარ, პრევენციულად უნდა მიიღოს შესაბამისი ზომები იმისთვის, რომ შემდეგ უკვე გვიანი არ იყოს“, - თქვა თამაზ სოზაშვილმა For.ge-სთან.

„თბილისი პრაიდის“ წევრის, ანა სუბელიანის ინფორმაციით, ხელისუფლების წარმომადგენლებთან შეხვედრა, სავარაუდოდ, 29 ივნისს გაიმართება.

„ჯერჯერობით არ ისმის მათგან ხმა, ველოდებით, რომ მოიწერონ და გვითხრან, თუმცა, შემხვედრი ნაბიჯები მათგან არ ყოფილა. ყველა ვარიანტში, დღეს ან ხვალ მაინც უნდა ვიცოდეთ, რა ხდება. როგორც ვიცი, აპირებენ ამ შეხვედრას, უბრალოდ დროში ძალიან გაიწელა“, - თქვა სუბელიანმა For.ge-სთან.

უნდა აღინიშნოს ისიც, რომ 28 ივნისს გავრცელებულ ერთობლივ განცხადებაში, 28 ევროპარლამენტარმა საქართველოს შინაგან საქმეთა მინისტრს, ვახტანგ გომელაურს მოუწოდა, „დაიცვას თბილისი პრაიდის აქტივისტები და უზრუნველყოს გამოხატვის თავისუფლებისა და მშვიდობიანი შეკრების უნივერსალური უფლების დაცვა“.

ევროპარლამენტარების შეფასებით, „პრაიდის კვირეულის“ გაუქმების თაობაზე „ქართული ოცნების“ თავმჯდომარის, ირაკლი კობახიძის ცოტა ხნის წინანდელი განცხადება „ამ უნივერსალურ უფლებებს ეწინააღმდეგება“.

მათ მხედველობაში კობახიძის 17 ივნისს განცხადება ჰქონდათ, სადაც მან აღნიშნა, რომ „პრაიდის კვირეულის“ ორგანიზატორებს „უარი უნდა ეთქვათ ამ ღონისძიების ჩატარებაზე“ და რომ „ეს იქნებოდა პასუხისმგებლობით გამსჭვალული გადაწყვეტილება“.

„გასულ წლებში ჩვენ ვნახეთ, თუ როგორ იყენებდნენ ლგბტ-ფობიური ჯგუფები ამ ღონისძიებებს თავიანთი სიძულვილის გასაძლიერებლად და ლგბტ მშვიდობიან მომიტინგეებზე თავდასხმისთვის“, – განაცხადეს ევროპარლამენტარებმა.

მათ ასევე აღნიშნეს, რომ საქართველომ ადამიანის უფლებათა ევროპული კონვენციით და ევროკავშირთან ასოცირების შეთანხმებით, რიგი ვალდებულებები აიღო ქალების, ლგბტ პირთა, ასევე ეთნიკური და რელიგიური უმცირესობების წინააღმდეგ დისკრიმინაციასთან ბრძოლის მიზნით.

ინფორმაციისთვის, ულტრამემარჯვენე ჯგუფები და ახალ პოლიტიკურ მოძრაობასთან – „ერთობა, რაობა, იმედი“ დაკავშირებული პირები 5 ივლისს პრაიდის აქტივისტების „ღირსების მარშის“ პარალელურად კონტრაქციის მოწყობას გეგმავენ.