„უცხო ქვეყნის მიერ დაფინანსებული აგენტურის მოტივია შეარყიონ ყველაზე ძლიერი ინსტიტუცია - ეკლესია“

„უცხო ქვეყნის მიერ დაფინანსებული აგენტურის მოტივია შეარყიონ ყველაზე ძლიერი ინსტიტუცია - ეკლესია“

საპატრიარქოს საზოგადოებასთან ურთიერთობის სამსახურის ხელმძღვანელი, ანდრია ჯაღმაიძე ამბობს, რომ ნინოწმინდის მზრუნველობამოკლებულ ბავშვთა სახლის მიმართ მიმდინარე გაუგონარი პროპაგანდისტული შტურმი, თავისი ბუნებით და დროის მიხედვით, პირდაპირ კავშირშია ივლისში დაანონსებული ე.წ. ლგბტ კვირეულის ორგანიზებასთან. მისი თქმით, ეს არის შესავალი და მოსამზადებელი ეტაპი, რაც ემსახურება ეკლესიის დისკრედიტაციას მოსახლეობის ფართო მასებში. თეატრის მხატვარი, შოთა გლურჯიძე ფიქრობს, რომ თუ ხელისუფლება შესაბამისად არ იმოქმედებს, ლგბტ–ს მიერ დაგეგმილი კვირეული შესაძლებელია დაპირისპირების მოტივი გახდეს.

for.ge შოთა გლურჯიძეს ესაუბრა.

ბატონო შოთა, როგორ ხსნით იმ მოვლენებს, რომელსაც ჩვენ ვაკვირდებით?

შოთა გლურჯიძე: მე ასე ვიტყოდი – რასაც მამა ანდრია ვერ იტყვის, ჩვენ, ეკლესიის წევრები ვალდებულები ვართ ამაზე ვისაუბროთ. რა თქმა უნდა, ეს არის ეკლესიის წინააღმდეგ შეტევა, რომელიც კარგად არის დაგეგმილი. საქართველოს ეკლესია ერთადერთი ინსტიტუციაა, რომელსაც ძალიან მყარი ნდობა აქვს. ეს ინსტიტუცია არის ჩვენი ქვეყნის ერთადერთი სტაბილური პატრონი. რა თქმა უნდა, არის ხელისუფლება, რომელიც საქართველოს შემთხვევაში ძალიან ხშირად იცვლება და რეალურად მომკითხავი არ არსებობს - რეალურად ქვეყანას პატრონი არ ჰყავს. ერთადერთი სტაბილური პატრონი არის ეკლესია, რომლის შვილები ვართ ჩვენ ყველა. შეტევა მიდის ერთადერთ პატრონზე, რომ ეს ქვეყანა საერთოდ უპატრონოდ დარჩეს, რადგან მერე უკვე ადვილია, ასეთი ქვეყანა მოაქციო უფრო დიდი გავლენის ქვეშ და დაამკვიდრო ყველაფერი ის უკუღმართობა, რისი დამკვიდრებაც უნდათ. ამ ქვეყნის დაშლა უნდათ და ეს, რა თქმა უნდა, გარედან ხდება, „კეთილის მსურველები“ ბევრი გვყავს გარეთ.

გარე ძალებში ვის გულისხმობთ, რუსეთს?

– არა მხოლოდ. ჩვენი დაუძინებელი მეგობრები. ზოგი მეზობელი, ზოგი ოკეანის გაღმელი და ა.შ. ორკესტირებული და ერთად მართული შეტევაა პატრონის წინააღმდეგ, ერთადერთი ინსტიტუციის წინააღმდეგ, რომლის მიმართ არსებობს უდიდესი ნდობა. შეგიძლიათ მითხრათ ერთი ადამიანი პოლიტიკაში, ან სხვა სფეროში, რომელსაც ისეთი ნდობა ჰქონდეს, როგორიც აქვს ქართულ მართლმადიდებლურ ეკლესიას? ასეთი არ არსებობს.

ძალიან ნიშანდობლივია ისიც, რომ ჩვენი პოლიტიკურ ელიტას უჭირს ეკლესიის პოზიციის დაცვა და ეს კარგად გამოჩნდა ნინოწმინდის პანსიონის გარშემო განვითარებული მოვლენების შეფასებისას. როგორ ხსნით ამ თავშეკავებულობას?

– არ მესმის, იმ ტანსაცმელს რომ ჩაიცვამენ და ჰალსტუხს დაიკიდებენ, მერე აღარ არიან ქრისტიანები? ჩვენი, როგორც ქრისტიანების ვალია, დავიცვათ ჩვენი დედა ეკლესია. რატომ უჭირთ? ამაზე დიდი საქმე აქვთ რაიმე? თუ პრეზერვატივებზე ვისი სახე იქნება გამოკრული, ეს არის პარლამენტის საქმე? ვინმეს დაუყენებია საკითხი პარლამენტში რატომ ხდება ორკესტრირებული შეტევა ეკლესიაზე? – არა. ანუ, იმ ძალების სამსახურში არიან, ვინც ეკლესიის წინააღმდეგ ორკესტრირებულ შეტევას უკვეთავს. ის, რაზეც მამა ანდრია საუბრობს, ესეც პატარა სიუჟეტია. მე მგონია, რომ აქ დაპირისპირება შეიძლება მოხდეს საზოგადოებასა და ხელისუფლებას შორის და არა ე.წ. ლგბტ ჯგუფს შორის.

ანუ, დაპირისპირება შეიძლება უფრო მასშტაბური იყოს?

– რა თქმა უნდა. იმიტომ, რომ ხელისუფლება რომელსაც ჩავაბარეთ ამ სახელმწიფოს მართვა, ვალდებულია აღკვეთოს ყველა ის ქმედება, რომელიც ზნეობრივად მიუღებელია იმ მოქალაქეებისთვის, რომლებმაც ის აირჩია. ეს არ არის საზოგადოების ვალი. ეს ვალდებულება აქვს სახელმწიფოს. უნდა გაირკვეს საიდან იღებენ ისინი დაფინანსებას, ფაქტია, რომ საკმაოდ მაღალ დაფინანსებას იღებენ. თუ ეს დაფინანსება მოდის იმისთვის, რომ გაილაშქრონ ისეთი ინსტიტუციის წინააღმდეგ, როგორიც არის მართლმადიდებელი ეკლესია, ადამიანის ზნეობის საწინააღმდეგო აქცია ჩაატარონ ქალაქში, ეს ხომ ერთგვარი პროვოკაციაა? აქედან გამომდინარე, სახელმწიფო უსაფრთხოების სამსახური ვალდებულია გაარკვიოს, ვინ აფინანსებს ამ ორგანიზაციას და რა თანხებით ხდება ჩვენთან არეულობის შემოტანა.

მე მგონია, რომ ეს არის სუს–ის საქმე და თავისი სიტყვა უნდა თქვას. თუ არ გააკეთებს ამას ხელისუფლება, მაშინ, ალბათ, უნდა გამოვცვალოთ და სხვა ისეთი დავნიშნოთ, ვინც ამას გააკეთებს, იმიტომ, რომ აქ შეიძლება ძალიან ცუდი რაღაცებიც მოხდეს და დაპირისპირება გადავიდეს ქუჩაში. შეიძლება ეს დაპირისპირება ორივე მხრიდან იყოს დადგმული და არ არის გამორიცხული, რომ ის ხალხი, რომელიც შეიძლება წამოიკიდონ, დაფინანსებული იყოს. მე არ მგონია, რომ შემთხვევით მოხდა ის, რასაც ნინოწმინდის პანსიონთან დაკავშირებით ვაკვირდებით. ხელისუფლება ვალდებულია აღკვეთოს ის, რაც ხდება.

როგორ უნდა აღკვეთოს ეს ხელისუფლებამ?

– არ უნდა მიეცეს ასეთი აქციების მოწყობის უფლება იმ ადამიანებს, რაც ეწინააღმდეგება საზოგადოებრივ წესრიგს და მორალს. მაგალითად დედა ენის ბაღში არ უნდა დაიდგას ე.წ. უბორნია – მე ასე დავარქვი. ეს შეურაცხოფა არ არის? დედა ენა ჩვენთვის არის სიმბოლო. რატომ ხდება ასეთ წმინდა ადგილებში ასეთი აქტები, ეს ხომ მიზანმიმართულად ხდება. ამიტომ, უნდა გამოიკვლიონ ასეთი ფაქტების უკან დგას თუ არა დაპირისპირების, არეულობის პროვოცირება. ეს არის სუს–ის საქმე და მეტი არავისი. იცით, 50 ლარად დაქირავებულ ადამიანებთან არაფერი მაქვს გასარჩევი, ისინი არ უნდა წამოიკიდოს გარედან დაფინანსებულმა ორგანიზაციებმა და ეს უნდა გაარკვის ხელისუფლებამ. უცხო ქვეყნის მიერ დაფინანსებული აგენტურის მოტივია, შეარყიონ ყველაზე ძლიერი ინსტიტუცია.

თუ გამოძიებამ დაადგინა, რომ სახალხო დამცველმა და საეჭვო წარმომავლობის არასამთავრობო ორგანიზაციებმა ცრუ განგაში ატეხეს და სრულიად მიზანმიმართულად შეულახეს სახელი ამ პანსიონს, როგორ ფიქრობთ, რა სასჯელი უნდა დაემუქროთ ამისათვის? აქვე შეგახსენებთ, რომ საქართველოში არ მოქმედებს მუხლი ცილისწამების შესახებ...

– ამიტომ, სასწარაფოდ უნდა შევცვალოთ ეს ხელისუფლება, იმიტომ, რომ ისინი დაუკრეფავში გადავიდნენ. ეს ხელისუფლება რომ შეიცვლება, უნდა შემოვიღოთ ცილისწამების მუხლი, რომ დაფინანსებულმა აგენტურამ ასეთი რამ ვერ განახორციელოს.

ვინ უნდა შეცვალოს ხელისუფლება...

– ხალხმა და ისევ ხალხმა უნდა აირჩიოს ახალი ხელისუფლება. ის, ვინც არ იქნება გარედან დაფინანსებული და არ შეუერთდება საქართველოს დაშლის დოქტრინას.

ვინ არის ასეთი ძალა?

– ასეთი ძალა უნდა ჩამოყალიბდეს. ჯერჯერობით რასაც ვხედავ, იმ 15 პარტიიდან, რომელიც პარლამენტშია, აქედან არც ერთი არ უნდა აირჩიონ. მე არ ავირჩევ. იმედი მაქვს, რომ მოქმედ ხელისუფლებაში არის ძალიან ბევრი ნორმალური ხალხი, უნდა დაფიქრდნენ და იმოქმედონ, რომ აღკვეთონ პროვოკაციები და დივერსიები. წინააღმდეგ შემთხვევაში ეს ხელისუფლებაც უნდა შეიცვალოს უმოქმედობისთვის, ან ამ დივერსანტების ჩუმად დახმარებისთვის.

და, რაში უნდა აძლევდეს ხელს ხელისუფლებას დივერსანტების ჩუმად დახმარება?

– მე, ამას ვერ დავამტკიცებ, რომ ჩუმად ეხმარებიან და აფინანსებენ, მაგრამ ფაქტია, რომ არ მოქმედებენ და ესეც ხელშეწყობაა. დივერსანტი რომ ქვეყანაში ასაფეთქებელ მოწყობილობას გიდებს და შენ არ მოქმედებ, რა თქმა უნდა, შენც პასუხისმგებელი ხარ. მე ასე ვუყურებ მოვლენებს.

ტრადიციულად, საქართველოში პოლიტიკური ფონი დაძაბულია. გადადგა პრემიერ–მინისტრი და მას მმართველი გუნდი ბრალს სდებს სახელმწიფოს ღალატში. პრემიერობიდან წასული გახარია ისევ პოლიტიკაში შემოვიდა, ასევე არის ლევან ვასაძე. გახარიას და ვასაძეს პოლიტიკაში შემოსვლა შეცვლის არსებულ დაძაბულ პოლიტიკურ კლიმატს?

– რაც შეეხება გახარიას ღალატს, მტკიცებულება ხელისუფლებამ უნდა დადოს, რაც ჯერჯერობით ვერ დავინახე. არ ვიცი რა ფორმას მიიღებს გახარიას პარტია იმიტომ, რომ იქ არის ხალხი, რომელიც იყო წინა ხელისუფლებაში, მაგალითად ქალბატონი მეზვრიშვილი, რომელიც პატარაიას მეგობარია. როდესაც პირველ ნომრად ასეთი ქალბატონი გყავს, ამით ყველაფერია ნათქვამი. რაც შეეხება ლევან ვასაძეს, მიჭირს მასზე ლაპარაკი იმიტომ, რომ ჩემი მეგობარია. ძალიან მძიმე ტვირთს აიღებს, თუ შემოვა პოლიტიკაში, მაგრამ, ალბათ, მისი ვალდებულებაც არის როგორც ქრისტიანის და როგორც საქართველოს მოქალაქის, რომ რაღაცა გააკეთოს.

ძალიან პოზიტიურად ვუყურებ ლევანის პოლიტიკაში შემოსვლას. არ ვიძახი, რომ გახარიას უყურებ არაპოზიტიურად, მაგრამ არ ვიცნობ გახარიას და მის გუნდს. ვისურვებდი, რომ გახარიამაც ძალიან მკაფიო პოზიცია დააფიქსიროს იმასთან დაკავშირებით, რაც ეკლესიის წინააღმდეგ ხდება. არ ჩაჯდეს იმ ნავში, რომელიც ეკლესიის წინააღმდეგ არის მიმართული. მინდა პოზიტიურად შევხედო, დადგეს სწორ მხარეს. სწორი მხარე არის შენი ქვეყნის, ეკლესიის და ხალხის მსახურება.

ვასაძესთან დაკავშირებით მთავარი კითხვის ნიშანი არის მისი მეგობრობა დუგინთან, დუგინიზმში სდებენ ბრალს. როგორ ფიქრობთ, ამომრჩევლის რა კატეგორია დადგება ვასაძის გვერდით?

– ალბათ, მე ვარ ვასაძის ამომრჩეველი. პირველად, 30-წლიან ისტორიაში ის იქნება ადამიანი, რომელიც არ ავნებს არც ჩვენს ქვეყანას და არც ჩვენს ეკლესიას. ეს ჩემთვის ძალიან მნიშვნელოვანია. მე კარგად ვიცნობ ლევან ვასაძეს და ზუსტად ვიცი, რომ არ ავნებს საქართველოს. სხვათა შორის, დუგინსაც ვიცნობ. არ ვიცი რა დოქტრინაა დუგინიზმი, მაგრამ დუგინს ვიცნობ, როგორც ძალიან კარგ ინტელექტუალს, საინტერესო კაცს და მნიშვნელოვან ფიგურას, როგორც კარგ ფილოსოფოსს.

შეიძლება არის კარგი ფილოსოფოსი, მაგრამ მის გამონათქვამებს აფხაზეთთან, სამხრეთ ოსეთთან დაკავშირებით პრობლემურად არ აღიქვამთ?

– იცით რა, ადამიანები 7 წელიწადში ერთხელ იცვლებიან.

ანუ, დუგინიც შეიცვალა?

– 2008 წლის მერე გავიდა ძალიან ბევრი დრო და მან შეცვალა თავისი პოზიცია. მე მინახავს მისი საუბარი იგივე თემაზე. მან ბოდიში მოიხადა და თქვა, რომ არასწორი იყო საქართველოსთან მიმართებაში. ამ შემთხვევაში ჩვენ შეიძლება ვაპატიოთ, ან შეიძლება არ ვაპატიოთ. მე მგონია, რომ ამაში ძალიან დიდი წვლილი მიუძღვის ლევან ვასაძეს. მან ბევრი რუსი ნაციონალისტი მოაქცია. ლევანი ძალიან დიდი სამუშაოს ატარებდა რუსეთში, რომ რუს ნაციონალისტებს შეეცვალათ პოზიცია საქართველოსთან მიმართებაში.

სად ჩანს რუსი ნაციონალისტების მიერ პოზიციის შეცვლა, როცა ჩვენ ყოველდღე ვაკვირდებით მცოცავ ოკუპაციას?

– ლევანის ხელი არ მიუწვდებოდა რუს პოლიტიკურ ელიტასთან. მან გარდატეხა შეიტანა ინტელექტუალურ სფეროში. ეს პატარა ამბავი არ არის. ორი წლის წინ სანქტ–პეტერბურგში ფორმუზე მოხსენებით გამოვდიოდი, ძალიან ბევრი რუსი ინტელექტუალი ვნახე, პირველი იმას მეკითხებობდნენ – ვიცნობ თუ არა ლევან ვასაძეს. გაკვირვებული ვიყავი. როცა ჩამოვედი ლევანს ვკითხე, რა ქენი ასეთი, რომ ეს ხალხი ასე არის შემობრუნებული-თქო? ძალიან მნიშვნელოვან როლს ასრულებდა რუსეთში საჩვენოდ.

ვისი კონკურენტი იქნება ვასაძე?

– მე ასე ვიტყოდი – მისი კონკურენტი იქნება ის 15 პარტია, რომელიც პარლამენტშია და რომელმაც ხელი მოაწერა ათასგვარ უმსაგვსობას. ძალიან მკაფიოდ დადგება საკითხი – სად დადგება ქართველი ხალხი.

გახარიასგან განსხვავებით, პოლიტიკურ შეფასებებში გაცილებით რადიკალურია ვასაძე, ამის მიუხედავად ხელისუფლება რადიკალური არ არის ვასაძესთან მიმართებაში. ვასაძის პოლიტიკაში შემოყვანით „ქართულმა ოცნებამ“ მართვადი კონკურენტი ხომ არ გაიჩინა?

– წარმოუდგენლად მიმაჩნია ლევან ვასაძე დათანხმდეს იმას, რომ იყოს მართვადი. არ არის ასეთი კაცი ლევანი. ის, რომ ლევანი რაღაცა საკითხებში პოზიტიურად არის განწყობილი ხელისუფლების მიმართ, ეს არ არის გასაკვირი. მე ძალიან ბევრი მეგობარი მყავს ხელისუფლებაში. ბევრი პატრიოტია, წესიერი ხალხია, მაგრამ ისეთებიც არიან, რომლებიც ჩემთვის მიუღებელია. ამიტომ ასეთი მსჯელობა არასწორია.

პროფესიონალებს და კვალიფიციურ ადამიანებს უნდა მიეცეთ საშუალება, რომ თავის ქვეყანას ემსახურონ. ლევანიც ასე უყურებს. ბიძინა ივანიშვილი ძალიან ცუდი პოლიტიკოსია, ამ თავისი შემრიგებლობით არასწორ გზაზე მიჰყავს საქართველო. მაგრამ ივანიშვილს ძალიან ბევრი საქველმოქმედო და კარგი პროექტი აქვს გაკეთებული. უნამუსო კაცი უნდა იყო, რომ ეს დაივიწყო.

როგორ ფიქრობთ, „ქართული ოცნება“ დაინტერესებულია ოპონენტად ჰყავდეს ისეთი დესტრუქციული პოლიტიკური ძალა, როგორიც არის „ნაციონალური მოძრაობა“, რაც უხანგრძლივებს პოლიტიკურ ცხოვრებას?

– ალბათ, ორად გავყოფდი „ოცნებას“. ნაწილის მიზანი, რა თქმა უნდა, არის სააკაშვილის დაბრუნება ხელისუფლებაში, რაც მკვდარი ნომერია.

ეს რა ნაწილია?

– ის ნაწილი, რომელიც სააკაშვილის ხელისუფლებაში მსახურობდა. იგივე მდინარაძე და ეს ხალხი. რამდენადაც მე ვიცი, ახლაც არ გაუწყვეტიათ კავშირი, ურთიერთობა აქვთ. მათთვის შეიძლება კომფორტულიც იყოს მიშას დაბრუნება. მაგრამ არის ნაწილი, რომელიც ამაზე არასოდეს დათანხმდება. მე მგონია, რომ ეს ძალაც გაიყოფა. ყველას მოუწევს გადაწყვეტილების მიღება, რომელ მხარეს დადგნენ. მე საერთოდ ვერ ვხედავ როგორ შეიძლება ქართველმა კაცმა აირჩიოს ის პარტია, რომელმაც 15 პარტიასთან ერთად ხელი მოაწერა ამ საზიზღრობას.

Katana . "ძალიან მკაფიოდ დადგება საკითხი – სად დადგება ქართველი ხალხი."

ქართველი ხალხისა არ ვიცი, მაგრამ მე ვდგები ლევან ვასაძის მხარეს!
1 თვის უკან
trampi ვასაძე ყველას ყელში ეჩხირებათ--- გაეჩხირებათ.......
თუ ის ბატონთ ბატონი (პატრიოტები) თავის პარტიანად, ვასაძესთან საერთო ენას გამონახავენ .....ეგრევე მინიმუმ 30% აიღებენ
მაგრამ ეს ბატონთ - ბატონი რარაც ზედმეტად იჭიმება
1 თვის უკან
trampi ბასკეტბალისტის ბიჭი.........................
კაი კაცის, კაი შვილი
1 თვის უკან
გრიგორი დუგინი შეიცვალაო !!!! რაზე უნდა ესაუბრო ამის შემდეგ ამ "პატრიოტს" ??? არ მჯერა კომბლესი და რა ვქნა! მარგველა მქსოველის და ფუნას მეგობარი გადაარჩენს საქართველოს ?!
1 თვის უკან
Ninja არ ვარ წინააღმდეგი რუსეთთან კარგი ურთიერთობის და არც ლევან ვასაძის, მაგრამ არ მჯერა, რომ დუგინმა აზრი შეიცვალა და თან ვასაძის გავლენით. დუგინი განათლებული კაცია და მანამ რამეს იტყოდა 2008 წლის ამბებზე, კარგად დაფიქრდებოდა. ახლა, უბრალოდ, აზრი კი არ შეიცვალა, არამედ ტაქტიკა შეცვალა, თორემ მოუწოდოს პუტინს ჯარები გაიყვანოს ოკუპირებული ტერიტორიებიდან, თუ ჩვენ მეგობრობაზე დებს თავს.
1 თვის უკან
Katana . Ninja:
"...აზრი კი არ შეიცვალა, არამედ ტაქტიკა შეცვალა, თორემ მოუწოდოს პუტინს ჯარები გაიყვანოს ოკუპირებული ტერიტორიებიდან, თუ ჩვენ მეგობრობაზე დებს თავს."
:))
ეს ჩვენ და ჩვენი "სტრატეგიული პარტნიორები" ვიძახით, რომ ოკუპირებული აქვს, თორემ რუსეთმა ყველაფერი ზუსტად გათვალა საკუთარი სახელმწიფოებრივი ინტერესების მიხედვით: ჯერ წააქეზა და მერე დაეხმარა აფხაზეთსა და "სამხრეთ ოსეთს" საქართველოსაგან "განთავისუფლებაში"; შემდეგ აღიარა დამოუკიდებელ სახელმწიფოებად, დადო მათთან სამხედრო ხასიათის ხელშეკრულებები, - (ანუ, მათი დაცვა აგრესიისაგან თავის თავზე აიღო, როგორც ერეკლეს დროს - საქართველოსი) და დააბრუნა იქ თავისი სამხედრო ბაზები...
მიზანი - ნატოს არშემოშვება ამ რეგიონში!!!
ვინმეს წარმოუდგენია, რომ რუსეთი თავის ჯარებს გაიყვანს და ამ ტერიტორიას მოუღიავებს ნატოს ბაზებს?!
ან ვინმეს სჯერა, რომ ნატო ჩაეჩხირება იმ რეგიონის შუაგულში, სადაც რუსეთს სამხედრო ბაზები აქვს ირგვლივ შემოწყობილი (აფხაზეთში, "სამხრთ ოსეთში", სომხეთში და ახლა უკვე აზერბაიჯანშიც) ?!
მე რეალისტი და ობიექტური კაცი მგონია თავი და ამიტომ, კი, ძალიან მწყინს, მაგრამ სულაც არ მიკვირს რუსეთის საქციელი: ამერიკას თუ აქვს თავისი ინტერესები დედამიწის სფეროს დიამეტრალურად საპირისპირო მხარეზე - საქართველოში, რუსეთს არ ექნება ანალოგიური ინტერსები თავის საზღვართან, თავის ყოფილ ტერიტორიებზე?
ხრუშჩოვმა რომ რაკეტები დადგა კუბაში, როგორი რეაქცია ჰქონდა კენედის? - წაიღეთ უკან, თორემ ატომურ ბომბს დავარტყამ კუბასო!..
ახიკეს და წამოიღეს.
აქ კი ძალიან გვიკვირს, - რატომ არ უნდა შემოვიდეს ნატო, ვინ ჰკითხავს რუსეთსო!..
ის ჰკითხავს, ვინც გპირდება: აუცილებლად შემოვალო... ოდესმე!
1 თვის უკან