ზუსტად 8 წელი ელოდნენ „მილანის“ გულშემატკივრები ამ დღეს, მაგრამ „როსონერიმ“ პირველი „მატჩპოინტი“ წყალს გაატანა. „როსონერიმ“ ბოლოს ჩემპიონთა ლიგის საგზური რომ მოიპოვა, 2013 წლის მაისი იყო და ამჯერად, ამ უფსკრულის დასრულება მარტივად იყო შესაძლებელი - საკმარისი გახლდათ „მილანს“ შინ „კალიარი“ დაემარცხებინა და ჩემპიონთა ლიგაზე ოფიციალურად გავიდოდა.

„კალიარის“, რომელსაც არავითარი სატურნირო მოტივაცია არ ჰქონდა, სერია A-ში ადგილი შენარჩუნებული ჰქონდა. თუმცა, სტეფანო პიოლის გუნდმა ეს შანსი ვერ გამოიყენა და სარდინიულ გუნდს ვერაფერი დააკლო - უგოლო ფრე. უფრო მეტიც, თუ ვინმეს მოგება შეეძლო, ეს „კალიარი“ იყო, რომელიც რამდენჯერმე ახლოს იყო გოლთან, მაგრამ ჯანლუიჯი დონარუმა დიდებულად ირჯებოდა.

"მილანი" ისევ ოთხეულშია და ისევ საკუთარ თავზეა დამოკიდებული - ბოლო ტურში "ატალანტას" დამარცხება სჭირდება. თუმცა, თუ "ნაპოლი" ან "იუვენტუსი" ვერ მოიგებს, "როსონერი" წაგების შემთხვევაშიც გავა ჩემპიონთა ლიგაზე. ბევრი ვარიანტია და ყველაფერს ბოლო ტური გაარკვევს.

"ნაპოლი" "ვერონას" მასპინძლობს, "მილანი" "ატალანტას" ესტუმრება, "იუვენტუსი" კი "ბოლონიას". ამ გუნდებს შორის, ქულათა სხვაობა ერთადერთია, მაგრამ "იუვეს" ორივე კონკურენტთან ურთიერთშეხვედრებში უარესი მაჩვენებელი აქვს, "მილანის" კი უკეთესი და ეს ფაქტორი შესაძლოა ბოლო ტურში მნიშვნელოვანი გამოდგეს.