ბრიუსელში, ირაკლი კობახიძისა და შარლ მიშელის შეხვედრა დასრულდა. პარტია „ქართული ოცნების“ თავმჯდომარის თქმით, მან ევროპული საბჭოს პრეზიდენტს გაწეული ძალისხმევისთვის მადლობა გადაუხადა.

„ძალიან მეგობრული შეხვედრა მქონდა ევროპული საბჭოს პრეზიდენტთან. შარლ მიშელს პირადად გადავუხადე მადლობა ძალისხმევისთვის, რომელიც მან გასწია ამ შეთანხმების ხელმოწერისთვის.

მიგვაჩნია, რომ ეს არის არა „ქართული ოცნების“ ან პარტნიორების, არამედ ეს არის საქართველოს გამარჯვება“, - განაცხადა ირაკლი კობახიძემ.

ევროპული საბჭოს პრეზიდენტმა, შარლ მიშელმა პოლიტიკურ პარტიებს ახალი წინადადება შესთავაზა. მას ხელი „გირჩმა“ მოაწერა. ცოტა ხნის წინ ცნობილი გახდა, რომ ევროპელი მედიატორის მიერ შედგენილ დოკუმენტს ხელს „ლელოც“ მოაწერს. შეთანხმების ხელმოწერის შესახებ „ქართულ ოცნებაშიც“ განაცხადეს. ევროპელი მედიატორების შემოთავაზებულ დოკუმენტს ხელს ზურაბ ჯაფარიძეც მოაწერს.