რუსულმა გამოცემა Sport-express-მა გაავრცელა ინფორმაცია, რომ ხვიჩა კვარაცხელიას „აიაქსში“ ტრანსფერს ლობირებს, ხოლო კახა კალაძე - „მილანში“. თუმცა, არველაძემ ეს ინფორმაცია უარყო და ის სწორედ Sport-express-ს გაესაუბრა.

„მე კარგად ვიცნობ ხვიჩას მამას და მის აგენტსაც, მაგრამ ასეთ გარიგებებში არ ვერევი და არ ვმონაწილეობ მსგავს საკითხებში. მე არ ვლობირებ ხვიჩას „აიაქსში“, ეს არ არის სიმართლე. იმედი მაქვს, მას ყველაფერი შესანიშნავად ექნება და როდესაც დრო მოვა, როცა წარმატებას მიაღწევს, ევროპაში ითამაშებს“, - თქვა არველაძემ.

„აიაქსის“ მხრიდან დაინტერესება რუსულ მედიასთან ნიდერლანდური გრანდის სპორტულმა დირექტორმა მარკ ოვერმარსმაც უარყო. მოგეხსენებათ, კვარაცხელიას სატრანსფერო ღირებულება Transfermarkt-ის მონაცემებით 5 მილიონი ევროთი გაძვირდა და ახლა ჩვენებური 15 მილიონ ევროდ ფასობს, „რუბინი“ კი მასში სავარაუდოდ უფრო მეტსაც მოითხოვს.

შეგახსენებთ, კვარაცხელიას საქართველოს ნაკრებში 8 მატჩში 3 გოლი აქვს გატანილი, ხოლო „რუბინში“ მიმდინარე სეზონში 22 შეხვედრაში თავი 4 გოლით, ამდენივე საგოლე პასითა და მოპოვებული პენალტით გამოიჩინა. ქართველ შემტევს ბოლო დროს „მილანს“, „იუვენტუსს“, „ბაიერნს“ და „დორტმუნდს“ უკავშირებენ.