„ბიბლიური თავისუფლების“ წევრებთან დაკავშირებულ სინოდის განჩინებას ეხმაურებიან თეოლოგები. მათი აზრით, სრულიად გაუგებარია, რატომ ეკრძალებათ ამ ორგანიზაციის წევრებს ზიარება, სხვადასხვა საეკლესიო საიდუმლოებებსა და მსახურებაში, ნათლობაში, ჯვრისწერაში, შვიდგზის ზეთისცხებაში მონაწილეობა. რეალურად, ეს ორგანიზაცია ხომ მხოლოდ ფორმალური საერო სამართლებრივი თვალსაზრისითაა რელიგიური ორგანიზაცია და სრულებით არ ქადაგებს რაიმე სახის სარწმუნოებას, რომელიც თანხმობაში ან წინააღმდეგობაში შეიძლება მოდიოდეს მართლმადიდებლურ სარწმუნოებასთან?!

შესაბამისად, ის ახალგაზრდები, რომლებიც მასში მხოლოდ ჯარში გაწვევისგან თავის ასარიდებლად წევრიანდებიან, არ აღიარებენ მართლმადიდებლობისგან რაიმე განსხვავებულ სარწმუნოებას. ამიტომ ისინი ვერ ჩაითვლებიან მართლმადიდებლური საიდუმლოების უარმყოფელებად.

თეოლოგების თქმით, გაუგებარია, ერთი დაუფიქრებელი გადაწყვეტილებით ათასობით ახალგაზრდა მოიკვეთოს ეკლესიის წიაღიდან, მაშინ, როცა „ბიბლიური თავისუფლების“ მცდელობაა ამ ახალგაზრდების დახსნა ერთწლიანი მონობისგან, რასაც დღევანდელი სავალდებულო სამხედრო სამსახური ითვალისწინებს. სავალდებულო სამსახური არ ემსახურება ახალგაზრდების სამხედრო მომზადებას და პატრიოტული სულისკვეთების ამაღლებას, არამედ წარმოადგენს დაკანონებულ ექსპლუატაციას.

ანალიტიკოსი, ყოფილი სახელმწიფო მინისტრი პაატა ზაქარეიშვილი მიიჩნევს, რომ ეკლესია ვერ მოკვეთს იმას, ვინც მისიანი არაა. „გირჩმა“ თავისი არჩევანი გააკეთა, როცა შექმნა ალტერნატიული რელიგიური ორგანიზაცია. ამით „გირჩმა“ თქვა, მე არ ვარ ქრისტიანული, მე რაღაც სხვა ვარ. ბიბლია კი აკერიათ პირზე, რომ თითქოს ქრისტიანობასთან ახლოს არიან, მაგრამ ბიბლიას ეყრდნობა ისლამიც, იუდაიზმიც.

„ასეთი ორგანიზაციების მიმართ მკაცრი დამოკიდებულება ეკლესიის რეპუტაციას ლახავს. „გირჩს“ სულ სხვა ამოცანა აქვს და სხვა ამოცანას ახორციელებს, როცა, ვითომდა, რელიგიურ ორგანიზაციას ქმნის. არაფერი რელიგიური ორგანიზაცია ის არ არის. 21-ე საუკუნეში რელიგიური ორგანიზაციები სასაცილოა, რაღა დროს რელიგიური ორგანიზაციებია, პირიქით, იხურება და იხურება ასეთი ორგანიზაციები და სულაც არ ძლიერდება. ამიტომ „გირჩის“ საქციელი პერფორმანსია, ამით „გირჩს“ ყურადღების მიპყრობა და ახალი რეალობის შექმნა სურს. ის, რომ ეკლესიამ ამას უპასუხა, ეს არის უცნაურობა. ეკლესია ძლიერია, ღონიერია, ქრისტე პირდაპირ ეუბნება პეტრეს, ანუ კლდეს, ანუ ეკლესიას, რომ შენ ხარ კლდე და ჯოჯოხეთის ბჭენი ვერ მოგერევიან შენ და ამათ „გირჩის“ შეეშინდათ?!“ - აცხადებს პაატა ზაქარეიშვილი ჩვენთან საუბრისას.

„გირჩთან“ დაკავშირებით სინოდის გადაწყვეტილებას ეთანხმება ანალიტიკოსი ნიკა ჩიტაძე. ის მიიჩნევს, რომ არსებობს ქართული მართლმადიდებლური ეკლესია, რომელიც ავტოკეფალურია, ანუ ის არ ექვემდებარება არც ერთ სხვა ეკლესიას. მართალია, რანგით შეიძლება კონსტანტინოპოლის პატრიარქი იდგეს მაღლა, მაგრამ ფაქტია, ოფიციალურად არსებობს 15 მართლმადიდებლური ავტოკეფალური ეკლესია, მათ შორის, ერთ-ერთია ქართული.

„აქედან გამომდინარე, რელიგიის მიმდევრებად და სასულიერო პირებად შეიძლება მხოლოდ ის ადამიანები მივიჩნიოთ, რომლებიც საპატრიარქოს ექვემდებარებიან. ყველა სასულიერო პირზე ამას ვერ ვიტყვით, რომ ისინი ნამდვილად რელიგიურები არიან, რადგან, მოგეხსენებათ, ძალიან ბევრი სასულიერო პირი რელიგიურ კანონებს უგულებელყოფს და სპეკულირებს რელიგიით, მართლმადიდებლობით, ძველი აღთქმით, ახალი აღთქმით, მაგრამ „გირჩის“ მიერ დაფიქსირებული ორგანიზაცია სრული აბსურდია. სასულიერო პირებად ვერ ჩაითვლებიან ის ადამიანები, რომლებსაც ჯარში წასვლა და სახელმწიფოს წინაშე ვალდებულების აღება არ უნდათ. ბუნებრივია, ეს ადამიანები სასულიერო ცხოვრებას ვერ განახორციელებენ. შეიძლება, „გირჩი“ ერთ- ერთი პროდასავლური ძალაა, მაგრამ არის რაღაც საკითხები, როცა პოლიტიკური ძალა არ უნდა ერეოდეს ეკლესიის საქმიანობაში“, - აღნიშნა ნიკა ჩიტაძემ for.ge- სთან საუბრისას.