ესპანეთის ლიგა ენდესას მეცხრე ტურის ცენტრალურ შეხვედრაში „ბარსელონას“ დაუმარცხებელი „იბეროსტარ ტენერიფე“ ესტუმრა. გიორგი შერმადინმა შესანიშნავად ითამაშა, მაგრამ მისი გუნდი სეზონში პირველი მარცხისგან ვერ იხსნა. კატალონელებმა მეორე პერიოდში 10-ქულიანი უპირატესობა მოიპოვეს და 81:74 მოიგეს.

ქართველმა ცენტრმა 27:13 წუთში 19 ქულა, 6 მოხსნა, 2 პასი და 1 დააფრება მიითვალა. გიორგიმ 12-დან 8 ორქულიანი (67%) და 3-დან 3 საჯარიმო (100%) ჩააგდო, შედეგად მისი მარგი ქმედების კოეფიციენტი 25-ს გაუტოლდა. ნიშანდობლივია, რომ ქულებით და მარგი ქმედების კოეფიციენტით შერმადნი ორივე გუნდში საუკეთესო იყო.

„ბარსელონას“ კი გამარჯვებაში ალექს არბინესი (16 ქულა), ნიკ კალატესი (14 ქულა, 5 მოხსნა, 5 პასი) და ნიკოლა მირიტოჩი (13 ქულა, 5 მოხსნა) დაეხმარნენ.

„იბეროსტარ ტენერიფეს“ 6 მოგების წილ 1 წაგება აქვს (სხვებთან შედარებით ნაკლები მატჩები ჩაატარა) და მეხუთე ადგილზეა, მომდევნო თამაშს კი 8 ნოემბერს, შინ „ბეტისთან“ გამართავს.