ბაჩალიაშვილის საქმის ადვოკატი სკანდალურ განცხადებას აკეთებს, იგი ამბობს, რომ მედიკამენტები, რომლებიც თავიდან თქვეს, რომ ყველა თამარის მიერ არის აფთიაქში შეძენილი, ასე არ აღმოჩნდა:
"ყველაზე საინტერესო სიახლე არის წამლებთან დაკავშირებით. მედიკამენტები, რომლებიც აღმოაჩინეს მანქანაში და თამარის ორგანიზმში და რომელზეც ამბობდნენ, რომ ამა და ამ კონკრეტულ აფთიაქებში შეიძინაო, გაირკვა, რომ ეს წამლები ამ აფთიაქებში საერთოდ არ არის ნაყიდი. ამას ამბობენ ჩვენებაში აფთიქის გამყიდველები და ამას მოწმობს ქვითრებიც.
როგორ აღმოჩნდა მის სხეულში და ჩანთაში ეს წამლები სხვა წამლებთან ერთად? ეს უნდა დაადგინოს გამოძიებამ.
გამოძიება მიგვითითებს ოთხ აფთიაქზე, სადაც თითქოს თავის მოსაკლავად თამარმა წამლები შეიძინა. არადა, ახლა მტკიცდება, რომ წამლები, რომელიც ლეტალური შედეგის მომტანი აღმოჩნდა, ამ აფთიაქებში საერთოდ არ არის შეძენილი.
ვინ და რა მიზნით შეიძინა ეს წამლები? როგორ აღმოჩნდა ბაჩალიაშვილთან? ეს არის სწორედ ახლა გამოსარკვევი. ქვითრებში არ ფიქსირდება ის მთავარი წამლები, რომელსაც ფატალური შედეგის მოტანა შეეძლო. ამგვარ წამლებს ასე მარტივად არ გასცემენ აფთიაქიდან. კი, რამდენიმე წამალი ემთხვევა აფთიაქში ნაყიდს, მაგრამ ის ძირითადი წამალი, რომელმაც ფატალური შედეგი გამოიწვია მის მიერ ნაყიდი არ არის", - განუცხადა "პრაიმტაიმს" ადვოკატმა.
