ილია ფილფანის გაუჩინარების 2 ახალი ვერსია:

ილია ფილფანის გაუჩინარების 2 ახალი ვერსია: "პოვნის იმედს მაინც არ ვკარგავთ"

სვანეთში დაკარგულ 13 წლის მოზარდს უკვე თითქმის ერთი თვეა უშედეგოდ ეძებენ. სამძებრო სამუშაოები მთელი ქვეყნის მასშტაბით მიმდინარეობს, თუმცა ილია ფილფანის კვალი არსად არ ჩანს. რამდენიმე დღის წინ, საგანგებო სიტუაციების მართვის სააგენტომ მოქალაქეების, პირად სატელეფონო ნომრებზე მოკლე ტექსტური შეტყობინებები გაუგზავნა დაკარგული მოზარდის ფოტოსურათით.

ფილფანის ოჯახი შვილის პოვნის იმედს არ კარგავს. სამძებრო სამუშაოებში, ოჯახთან ერთად, ჩართულია ყველა სახელმწიფო უწყება და მოხალისეთა რამდენიმე ჯგუფი.

ილია ფილფანის გაუჩინარების შესახებ “ფორტუნასთან” ისაუბრა სოფელ ლენჯერში მერიის წარმომადგენელმა. მურთაზ გულედანი მოზარდის გაუჩინარების ორ ვერსიაზე საუბრობს და განმარტავს, რომ ერთ-ერთი ვერსიით 13 წლის მოზარდი მესტია-ჭალას მონაკვეთზე მდინარემ გაიტაცა, ხოლო მეორე ვერსიით, ბავშვი შესაძლოა, ტყეში დაიკარგა და რომელიმე მხეცის მსხვერპლი გახდა.

“თითქმის ერთი თვეა ბავშვს უწყვეტ რეჟიმში ვეძებთ. ყველა სახელმწიფო უწყება ჩართულია და მოხალისეთა ჯგუფებიც გვემატება. მოზარდის კვალი კი არ ჩანს არსად. ოჯახი იმედს არ კარგავს და აცხადებს, რომ გამოჩნდება.

ამ დროისათვის გაუჩინარების ყველა ვერსიას განვიხილავთ, მათ შორის მდინარეში გადავარდნას და ტყეში დაკარგვის ვერსიას. ბოლო ერთი წელია სოფელში მხეცებს პირუტყვიც არ გაუტაცებიათ, არც ადამიანის შემთხვევა გვქონია, მაგრამ ბავშვი სად წავიდა არ ვიცით. იქნებ ტყის მიმართულებით არის წასული და გზა აებნა.

რაც შეეხება მდინარეში გადავარდნის ვერსიას, სანაპირო პირადად მაქვს დათვალიერებული რამდენჯერმე და გარწმუნებთ, იქ იმდენი ციცაბო ადგილია, სადაც თავისუფლად შეიძლება გადავარდნა. თუ საბანაოდ შევიდა, ველოსიპედს ნაპირზე ხომ დატოვებდა? არც ველოსიპედი ჩანს. ესე იგი ველოსიპედიანად გადავარდა. მაინც არ ვკარგავთ პოვნის იმედს” – აცხადებს მურთაზ გულედანი.

Katana . ღმერთმა ქნას, ოჯახის იმედი გამართლდეს!... მაგრამ მე ბოლო ვერსია მგონია მართალი, სამწუხაროდ...
ენგური ისეთი ვერაგი მდინარეა, ველოსიპედიანი ბავშვი კი არა, 1982 წელს ბორის კახიანი ისე გააქრო, არამცთუ მიცვალებული, მანქანაც კი ვერ იპოვეს...
1 თვის უკან