პირველ საუნივერსიტეტო კლინიკაში კორონავირუსით ინფიცირებული ცოლ-ქმარია მოთავსებული. როგორც კლინიკის დირექტორმა, ლალი ტურძელაძემ განაცხადა, ინფიცირებულ ქალს კონტაქტი ჰქონდა კორონავირუსით ინფიცირებულ პაციენტთან, რომელიც ამჟამად თბილისის ინფექციური საავადმყოფოს ბოქსირებულ განყოფილებაში მკურნალობს.

„გუშინ, შუადღის შემდეგ შემოვიდა ორი პაციენტი, მეუღლეები და გვიან ღამით მოხდა დიაგნოზის დადასტურება. სულ ტესტი გუშინ გავუკეთეთ ცხრა პაციენტს და ეს ორი იყო მხოლოდ დადებითი. მათ კონტაქტი ჰქონდათ ერთ ინფიცირებულ პაციენტთან, რომელიც ამჟამად მკურნალობს ინფექციური საავადმყოფოს ბოქსირებულ განყოფილებაში. სწორედ მასთან ჰქონდა ახლო კონტაქტი ქალბატონს. ეს ქალბატონი იყო ბინაზე, ერთი კვირა ჰქონდა ცხელება, შემდეგ თავად მიმართა კერძო გენეტიკურ ლაბორატორიას და გაიკეთა ახალ კორონავირუსზე ტესტი. იქ აჩვენა დადებითი შედეგი, რის შემდეგაც გადმოიყვანა სასწრაფო სამედიცინო ბრიგადამ",- განაცხადა ტურძელაძემ.

მისივე თქმით, აღნიშნულ პაციენტებს ქონდათ თუ არა სხვა ადამიანებთან კონტაქტი, ამას ეპიდემიოლოგთა სამსახური იკვლევს.

„მას შემდეგ, რაც ქალბატონს მისცა სიცხემ, მამაკაცი გადავიდა სხვა სახლში, მაგრამ მასაც დაუფიქსირდა ტემპერატურა, ანუ ორივე პაციენტი სხვადასხვა ადგილიდან გადმოიყვანეს ჩვენთან. ჯანმრთელობის მდგომარეობა ქალბატონთან საშუალო სიმძიმის არის, გამოხატულია დამახასიათებელი პნევმონია, თავის დამახასიათებელი ყველა სურათით კომპიუტერულ ტომოგრაფიაზე. მამაკაცთან შედარებით სუსტად გამოხატული პნევმონიაა. უფრო უკეთესად არის მამაკაცი, ვიდრე ქალბატონი, თუმცა არც ერთი არ არის მართვით სუნთქვაზე გადაყვანილი",- განაცხადა ტურძელაძემ.