ესპანეთის ლიგა ენდესას XXIII ტურში ქართული დერბი შედგა, თორნიკე შენგელია გიორგი შერმადინის წინააღმდეგ. მიმდინარე სეზონში „იბეროსტარ ტენერიფე“ უკეთ ირჯება, მაგრამ დღეს „ბასკონიამ“ იძალა და დამაჯერებლად, 75:58 იმარჯვა.
ვიტორიელებმა პირველი და ბოლო მეოთხედი თითო ქულის სხვაობით წააგეს, მაგრამ სამაგიეროდ, მეორე-მესამე პერიოდები იმდენად კომფორტული სხვაობით მოიგეს, რომ მათ გამარჯვებაში ეჭვი არავის შეუტანია.
თორნიკე შენგელიამ 24:45 წუთში 11 ქულა, 5 მოხსნა და 2 პასი მიითვალა. ქართველმა მძიმე ფორვარდმა 4-დან 2 ორქულიანი (50%) და 8-დან 7 საჯარიმო (88%) ჩააგდო, ხოლო ორი სამქულიანი ააცილა (0%). შედეგად, მისი მარგი ქმედების კოეფიციენტი 17-ს გაუტოლდა, რაც მხოლოდ გიორგი შერმადინზე და თანაგუნდელ ლიმანე დიოპზე (19) დაბალი შედეგი გამოდგა.
რაც შეეხება შერმადინს, ქართველმა ცენტრმა 25:08 წუთში 16 ქულა, 9 მოხსნა, 1 პასი და 1 დაფარება მიითვალა, შედეგად ორმაგ დუბლამდე ერთადერთი მოხსნა დააკლდა. გიორგიმ 11-დან 7 ორქულიანი (64%) და 4-დან 2 საჯარიმო ჩააგდო. მისი მარგი ქმედების კოეფიციენტი 20-ს გაუტოლდა, რაც ორივე გუნდში ყველაზე მაღალი მაჩვენებელი იყო, თუმცა, რადგან „იბეროსტარმა“ წააგო, ჩვენებური MVP-ის ტიტულის გარეშე დარჩა.
„ბასკონიამ“ ზედიზედ მესამე თამაში მოიგო და პლეი-ოფის ზონაში შეაბიჯა. ვიტორიელებს 12 მოგების წილ 11 წაგება აქვთ და მერვე ადგილზე არიან, ხოლო მომდევნო ტურში 15 მარტს, „ვალენსიას“ ესტუმრებიან. „იბეროსტარ ტენერიფე“ კი 14 გამარჯვებით და 8 მარცხით იწონებს თავს, რაც მეოთხე შედეგია. შერმადინი და მისი თანაგუნდელები 14 მარტს, ბექა ბურჯანაძის „გრან კანარიას“ სტუმრად დაუპირისპირდებიან.
