„ბიძინა ივანიშვილი უნდა დავამხოთ, ერთხელ თუ არ იქნება საკმარისი, 2-ჯერ, 32-ჯერ“, - აცხადებს ნიკა გვარამია, რომლის საქმესაც გრიფი „საიდუმლო“ დაედო.

„ჩვენ ჩავსვამთ მაგათ ქუთაისის აეროპორტში და მოვაშორებთ აქედან“, - აგრესიულობას ვერ მალავს გრიგოლ ვაშაძე.

„ამ გაწევ-გამოწევაში და ბავშვების ცემა-ტყეპაში ვინმე არ შემოგაკვდეთ, თორემ პიკეტი კი არა, ნახევარი მილიონი ქართველი გამოვა თოფებით და თქვენზე დაიწყებენ ნადირობას“,-ეს გუბაზ სანიკიძის ომახიანი ტემბრია.

„ყველას სახლის მისამართი ვიცით! ყველას მოგეკითხებათ!“ - ეს კი კიევიდან შემოთვლილი მუქარაა მისი შეუცვლელი ავტორის თამადობით.

რას ნიშნავს სამომავლო შურისძიების დაანონსება და ოპოზიციის გამუდმებული მუქარა?

ბოლო დროს შექმნილი ვითარება ანალიტიკოს ვახტანგ მაისაიას აფიქრებინებს, რომ არსებობს სახელმწიფო გადატრიალების რეალური საფრთხე, რაც რუსეთის მიერაა მართული. ამ სცენარის შემსრულებელი უშუალოდ ოპოზიციაა ექსპრეზიდენტ სააკაშვილის ხელმძღვანელობით. სააკაშვილი და „ნაცმოძრაობა“ უკვე აშკარად თამაშობენ რუსულ თამაშს და შემთხვევითი არ არის, რომ ნინო ბურჯანაძის მოსკოვში გამგზავრებაც „ნაცმოძრაობას“ მაინცდამაინც არ დაუგმია.

მაისაიას აზრით, საქართველოში სახელმწიფო გადატრიალება, პირველ რიგში, აწყობს კრემლს, კრემლის ინტერესებს სააკაშვილი და გვარამია ახმოვანებენ, ვაშინგტონი კი კრემლის მიზნებს ხვდება, ამიტომაც აძლიერებს აქტიურობას საქართველოში.

თუ გავითვალისწინებთ, რომ პოლიტიკოსებს უფრო მეტად მოეთხოვებათ პასუხისმგებლობა, რას ნიშნავს სააკაშვილისა და სხვა პოლიტიკოსების მხრიდან ხმაშეწყობილი მუქარა? არის თუ არა სახელმწიფო გადატრიალების საშიშროება ჩვენს ქვეყანაში?

სახელმწიფო გადატრიალების ალბათობას ანალიტიკოსი გია ხუხაშვილი გამორიცხავს. For.ge-სთან საუბრისას ის აცხადებს, რომ სახელმწიფო გადატრიალების შესახებ ოთხი საქმეა აღძრული ამ ქვეყანაში, ამ ხელისუფლების პირობებში, მაგრამ ყველა ამ საქმეს მტვერი ედება. უბრალოდ, აღძრავენ არჩევნების წინ ამ საქმეებს და მერე იკარგება.

უახლოეს პერიოდში გია ხუხაშვილი მოელის კიდეც, რომ მიშა სააკაშვილის ვიღაცასთან საუბრის ჩანაწერს მოგვასმენინებენ და შეეცდებიან ამაზე სახელმწიფო გადატრიალების მორიგი საქმე შეკერონ. ახლა ეს ტექნოლოგიური საკითხია და ამ პოლიტიკური თამაშით კიდევ ერთხელ ეცდებიან, გამორეცხონ ტვინები.

„ეცდება თუ არა სააკაშვილი და „ნაცმოძრაობა“ სახელმწიფო გადატრიალების მოწყობას? რეალურად, ამ ტიპის გადატრიალების არანაირი რესურსი დღეს არ არსებობს. „ნაციონალური მოძრაობა“ ერთგვარი ჩაკეტილი სისტემაა, კარგად მობილიზებული და კარგად ორგანიზებული, მაგრამ ჩვენ უნდა გვესმოდეს ერთი რამ, ხალხის მხარდაჭერის გარეშე ასეთი პროცესები არ იწყება, მით უმეტეს, ისეთი ძალის მხრიდან, როგორიც „ნაცმოძრაობაა“, რომელიც კომპრომეტირებულია თავისი წარსულით. აქედან გამომდინარე, რევოლუციაზე ლაპარაკი უფრო ხელისუფლების ინტერესშია. იგივე ხდებოდა გავრილოვის ღამესაც, როდესაც პარლამენტში შევარდნა რაღაც საშინელებად და სახელმწიფო გადატრიალებად მონათლეს. ესეც სისულელე იყო. მოდით, პირდაპირ ვთქვათ, კარგით, შევიდოდნენ პარლამენტში და მერე რა მოხდებოდა? არც არაფერი. ამიტომ ან ძალიან ეშინიათ, ან პროპაგანდისტულად ბერავენ ამ ყველაფერს და ადამიანებს კიდევ ერთხელ ურეცხავენ ტვინს იმ მიზნით, რომ უფრო უარესი არ მოხდეს და ისევ ბიძინა ივანიშვილი დარჩეს. ეს არის კონტექსტი, მეტი არაფერი“,-განმარტავს გია ხუხაშვილი.

პოლიტანალიტიკოსი ვაკა გორგილაძე ჩვენთან საუბრისას აცხდებს, რომ ამ საპროტესტო მასის შემყურე, ადეკვატურად მოაზროვნე ადამიანს შეუძლია დასკვნის გამოტანა, რომ რევოლუციური სცენარის განვითარებაზე საუბარიც ზედმეტია. საამისო მუხტი აშკარად არასაკმარისია და ამას მარიონეტული ოპოზიციაც კი ხვდება, რომელიც „ნაცმოძრაობის“ ორბიტაშია მოქცეული.

„რაც შეეხება დასავლურ ჯგუფებს, თუ რუსულ დაჯგუფებებს, ბუნებრივია, ოპოზიციაში მყოფი ნებისმიერი პოლიტიკური პარტია შეეცდება იმის დამტკიცებას, რომ მათ ხელთ უპყრიათ გარკვეული საგარეო ბერკეტები. ყველაზე საგანგაშო ის არის, რომ ე.წ. პროდასავლური და ე.წ. პრორუსული ძალები გაერთიანებულნი არიან ამ სურვილით და იმის დემონსტრირებით, თითქოსდა, გააჩნიათ საგარეო ბერკეტი, რათა მოახდინონ საქართველოს ხელისუფლებაზე ზეწოლა. ჩემი აზრით, კრისტალიზაციის პროცესი, რაც დღეს მიმდინარეობს, წაეხმარება საქართველოს ხელისუფლებას იმაში, რომ რეზისტენტული იყოს ყველანაირი საგარეო გავლენისგან. იქნება ეს რუსეთი, ევროსაბჭო, აშშ, ჩინეთი თუ ავსტრალია. ჩვენი ხელისუფლება გარკვეული ტიპის ორგანიზაციების კომენტარების გავლენის ქვეშ კი არ უნდა მოექცეს, არამედ უნდა განახორციელოს პოლიტიკა, რომელიც მიზნად ისახავს ქვეყანაში სტაბილიზაციის, უსაფრთხოების დამყარებას. საქართველო თავისი დღის წესრიგით უნდა დაკავდეს და ავითარებდეს საკუთარ პოლიტიკას“, - მიიჩნევს ვაკა გორგილაძე.