ექსპერტი გია ხუხაშვილი ფილმის „და ჩვენ ვიცეკვეთ“ გარშემო ატეხილ აჟიოტაჟს სოციალური ქსელით ეხმაურება.

ხუხაშვილის თქმით, ამ ამბით საპატრიარქოში მიმდინარე მოვლენები გადაფარეს.

“ქვეყანაში აგრესიული კონფორმიზმი ზეიმობს. პრობლემებია ხელისუფლებაში? საკუთარი უმოქმედობა გადაფარე სისხლიანი 9 წლით. პრობლემებია საპატრიარქოში? გადაფარე ფილმით. გადაფარე, სინდისი მიაძინე და შენც ტკბილად დაგეძინება“,- წერს ხუხაშვილი.

შეგახსენებთ, რომ ქართულ-შვედური ფილმის - „და ჩვენ ვიცეკვეთ" ჩვენება საქართველოს კინოთეატრებში გუშინ დაიწყო. ბიზნესმენი ლევან ვასაძე და მისი თანამოაზრეები, „ქართული მარშის“ წევრები და მხარდამჭერები ფილმის კინოთეატრებში ჩვენებას ეწინააღმდეგებოდნენ და პრემიერის ჩაშლას გეგმავდნენ, რასაც დაპირისპირება რამდეჯერმე მოჰყვა. 8 ნოემბერს, თბილისისა და ბათუმის კინოთეატრებთან გამართულ აქციებზე სულ 28 პირი დააკავეს. სისხლის სამართლის დანაშაულისთვის დაკავებულია 1 პირი, ადმინისტრაციული სამართალდარღვევისთვის კი 27 პირი. ინციდენტების დროს დაშავდა ორი სამართალდამცველი, რომლებსაც საავადმყოფოში შესაბამისი მკურნალობა ჩაუტარდათ.