ექსპერტი ხათუნა ლაგაზიძე ამერიკის ახალი ელჩის კელი დეგნანის განცხადებაში სამ მთავარ საკითხს გამოყოფს. 

„ამერიკის ახალი ელჩის განცხადებებიდან გამოვყოფდი სამს: პირველი – 2020-ის საპარლამენტო არჩევნებში სამართლიანი და კონკურენტული გარემოს შექმნის მიზნით ყველა პოლიტიკურ ძალასთან თანამშრომლობა; 2 – ხაზგასმა იმაზე, რომ ამერიკამ ხელი უნდა შეუწყოს საქართველოს საზოგადოების მდგრადობის გაზრდას, რათა საქართველომ შეძლოს მზარდი ჩინური (და რუსული) გავლენისგან თავის დაღწევას. ანუ საქართველო ხდება არა მხოლოდ რუსეთ-ამერიკის, არამედ ჩინეთ-ამერიკის ინტერესთა კონფლიქტის ობიექტიც! 3 – საქართველოს სამხედრო მდგრადობის გაზრდა”,- წერს სოციალურ ქსელში ხათუნა ლაგაზიძე.

შეგახსენებთ, საქართველოში აშშ-ის ელჩად წარდგენილი კელი დეგნანი აშშ-ის სენატის საგარეო ურთიერთობების კომიტეტის სხდომაზე სიტყვით გამოვიდა, სადაც მან აღნიშნა,  რომ შეეცდება ორ ქვეყანას შორის არსებულ პროდუქტიულ ურთიერთობაში საკუთარი წვლილი შეიტანოს.