საქართველოში ნატო–ს საპარლამენტო ასამბლეის პრეზიდენტის, მედელინ მუნის ვიზიტის ფარგლებში, საქართველო–ნატო–ს საპარლამენტთაშორისო საბჭოს რიგით მე–9 შეხვედრა გაიმართა. შეხვედრის ფარგლებში კიდევ ერთხელ გამოხატეს საქართველოს სუვერენიტეტისა და ტერიტორიული მთლიანობისადმი, ისევე როგორც ევროატლანტიკური მისწრაფებისადმი მტკიცე მხარდაჭერა.

ვიზიტის ფარგლებში საქართველოში ნატო-ს საპარლამენტო ასამბლეის პრეზიდენტის, მედელინ  მუნის და პარლამენტის თავმჯდომარის არჩილ თალაკვაძის შეხვედრა გაიმართა. როგორც ნატო–ს საპარლამენტო ასამბლეის პრეზიდენტმა აღნიშნა, ნატო აღიარებს, რომ საქართველოს ტერიტორიული მთლიანობა დარღვეულია და მხარს უჭერენ საქართველოს სურვილს გახდენენ ერთიანი ქვეყანა.

„ჩვენ თქვენი წარმატება და წინსვლა გვსურს. არ შემიძლია სიტყვებით გამოვხატო თუ რამდენად მნიშვნელოვნად მიაჩნია ნატო–ს საპარლამენტო ასამბლეას საქართველოსთან თანამშრომლობა და ქვეყნის თნამშრომლობა ევროატლანტიკური ინტეგრაციის გზაზე. ჩვენს ქვეყნებს ჩვენ მოვახსენებთ იმ პროგრესის შესახებ, რასაც საქართველომ მიაღწია და იმ სამომავლო ნაბიჯებზე, რომლებიც უნდა გადაიდგას.

დემოკრატიისკენ მიმავალ გზაზე გამოწვევები ყოველთვის არსებობს. ვიცი, რომ საქართველო ამ გზას წლებია ადგას და შეიძლება გარკვეული იმედგაცრუებაც გქონდეთ, მაგრამ საქართველოს აქვს კარგი ტემპი, რაც ძალიან მნიშვნელოვანია“, – აცხადებს მედელინ  მუნი.

მედელინ  მუნისთან შეხვედრაზე საქართველოს პარლამენტის თავმჯდომარემ აღნიშნა, რომ მოწინააღმდეგეებს ქვეყნის შიგნით თუ გარეთ, აქვთ ძალისხმევა, მოხდეს საქართველოს მიღწევების დისკრედიტაცია. მისი თქმით, ეს არის გამოწვევა ყველა ქვეყნისთვის, რომელმაც დემოკრატია აირჩია. არჩილ თალაკვაძის განცხადებით, საქართველო რთულ რეგიონში იმყოფება, ეს გეოგრაფია არის მოცემულობა და რა თქმა უნდა, ქართული პოლიტიკის დაგეგმვაში ის უნდა იქნას გათვალისწინებული.

„ჩვენ მივესალმებით ამ თანამშრომლობის გაღრმავებას. საქართველო არის სტრატეგიულ მზადყოფნაში, რომ გაწევრიანდეს ნატო–ში. გვეამაყება, რომ ქართველი ჯარისკაცები ნატო–ს ჯარისკაცებთან ერთად მსოფლიოს ყველაზე რთულ ადგილებში იცავენ თავისუფლებას და ღირებულებებს, რომელიც ჩვენ გვაერთიანებს.

საქართველო აძლიერებს თავის დემოკრატიას. რეფორმები, რომელიც ახლა მიმდინარეობს, საარჩევნო სისტემის შეცვლის, მართლმსაჯულების და სასამართლო სისტემის რეფორმის, დემოკრატიული ინსტიტუტების გაძლიერების თვალსაზრისით.

საქართველო რჩება და მომავალშიც იქნება რეგიონში ნატო–ს და დასავლური ოჯახის ერთ–ერთი ყველაზე საიმედო მოკავშირე და პარტნიორი. ჩვენ ვუფრთხილდებით ჩვენს დემოკრატიულ მიღწევებს და უსაფრთხოებას, რომელიც საქართველოს რეგიონში აქვს“, – განაცხადა არჩილ თალაკვაძემ.

ნატოში გაწევრიანება საქართველოს პრინციპული გადაწყვეტილებაა. პარლამენტის თავდაცვისა და უშიშროების კომიტეტის თავმჯდომარის, ირაკლი სესიაშვილის განცხადებით, უსმენენ ექსპერტებს, ყოფილ თუ მოქმედ პოლიტიკოსებს, მაგრამ გადაწყვეტილებას იღებს საქართველო და ნატო–ს წევრი ქვეყნები.

„რამდენადაც ჩვენი მოსახლობის არჩევანია ქვეყნის ევროატლანტიკური ინტეგრაცია, მოსახლეობას მინდა, მკაფიოდ განვუმარტო, ჩვენ და ნატო ვსაუბრობთ ერთ ენაზე. ჩვენი საერთო ენა ემყარება მშვიდობის, უსაფრთხოების, სტაბილურობის, კეთილდღეობის პოლიტიკას. როცა ვსაუბრობთ საქართველოს ნატო–ში გაწევრიანებაზე, აქაც ჩვენ გვაქვს ერთი ენა. როდესაც გვაქვს ძალიან მაღალი სტანდარტის ფორმატები, აქაც გვაქვს ერთი ენა და ეს ენა არის, როგორ გახდეს საქართველო სწორი გზით ნატო–ს წევრი. რა თქმა უნდა, ჩვენ ვუსმენთ ექსპერტებს, ყოფილ თუ მოქმედ პოლიტიკოსებს, მაგრამ გადაწყვეტილებას ვიღებთ ჩვენ და ნატო–ს წევრი ქვეყნები და ჩვენ ვართ ერთიანები“, – აღნიშნა ირაკლი სესიაშვილმა.

მისივე თქმით, ექსპერტების მოსაზრებები საინტერესოა, მაგრამ მიზანი ერთია – საქართველო გახდეს ნატო–ს წევრი, ამ გზაზე კი გადაწყვეტილებები მიიღება შეთანხმებულად და ერთობლივად.

„ჩვენ უნდა გამოვიყენოთ ყველა გზა, ყველა საშუალება, რომ რაც შეიძლება მალე გავხდეთ ნატო–ს წევრი. ამის ინტერესი აქვს ნატო–საც, ამის ინტერესი გვაქვს ჩვენც. დანარჩენი უკვე პროცესზეა დამოკიდებული. ჩვენთვის ექსპერტების, მოქმედი თუ ყოფილი ლიდერების მოსაზრებები მნიშვნელოვანი და საინტერესოა, თუმცა როცა ვსაუბრობთ გადაწყვეტილებაზე, ამას იღებს საქართველო წევრ ქვეყნებთან ერთად.

ეს არის მუდმივი პროცესი, ეს არის დღესდღეობით ყველაზე ინტენსიური პროცესი და ყველა არსებულ ვარიანტს განვიხილავთ, რომ საქართველო ნატო–ს წევრი გახდეს. საქართველო გახდება ნატ–ს წევრი ტერიტორიული მთლიანობით და ყველა იმ სიკეთით რაც აქვს საქართველოს“, – განაცხადა ირაკლი სესიაშვილმა.

საქართველოს ხელისუფლების პოზიცია ნატოში გაწევრიანებასთან დაკავშირებით, არასაკმარისია „ნაციონალური მოძრაობისთვის“. სალომე სამადაშვილის განცხადებით, დღევანდელი ხელისუფლება საკუთარი პოლიტიკით ჩვენს მომავალს ნატო–ში საფრთხეს უქმნის.

„არ შეიძლება, ქვეყანაში დემოკრატიული პროცესისთვის შექმნილმა პრობლემებმა შეაფერხოს ჩვენი წინსვლა ნატო–სკენ. ნატო ეს არის დემოკრატიული სახელმწიფოების გაერთიანება და ჩვენი პარტნიორებისთვის ძალიან მნიშვნელოვანია პროცესები, მათ შორის, რაც საქართველოში მიმდინარეობს. დავაფიქსირეთ შეშფოთება, რომ დღევანდელი ხელისუფლება საკუთარი პოლიტიკით საფრთხეს უქმნის ჩვენს მომავალს ნატო–ში.

რაც შეეხება ქვეყნის ტერიტორიული მთლიანობისა და ნატო–ში გაწევრიანების საკითხს. მეხუთე მუხლთან დაკავშირებით განხილვები და ეს საკითხი დიდი ხანია, არსებობს, მაგრამ არ არსებობს ერთიანი ჩამოყალიბებული ხედვა. ამიტომ ამ საკითხზე გავაცანით ასამბლეის პრეზიდენტს ჩვენი ხედვა და გვქონდა საუბარი იმაზე, რომ ძალიან მნიშვნელოვანია, ეს საკითხი არ იყო გამოყენებული რუსეთისა და რუსული პროპაგანდის მიერ ქვეყნის ნატო–ში გაწევრიანების მიზნის საწინააღმდეგოდ“, – განაცხადა ჟურნალისტებთან საუბარში სალომე სამადაშვილმა.

ტრადიციულად ნატოში გაწევრიანების წინააღმდეგი არის „პატრიოტთა ალიანსი“. როგორც გიორგი ლომია აცხადებს, საქართველო ნატო–ს წევრი ვერ გახდება სოხუმისა და ცხინვალის გარეშე. მისი თქმით, საქართველოს უკვე 30 წელია სურს, გახდეს ალიანსის წევრი, მაგრამ სამწუხაროდ, ამას ვერ მიაღწია.

„ნატო-ს ოფიციალური პოზიცია დღეს მოვისმინეთ, სადაც ითქვა, რომ გამორიცხულია, საქართველო ნატო–ს წევრი ვერ გახდება სოხუმისა და ცხინვალის გარეშე, ვიდრე ეს ტერიტორიები ოკუპირებული იქნება. ჩვენ ეს საკითხი დავაყენეთ და კიდევ ვთქვით, რომ იმ მოდელზეც, ალბათ, დათანხმდებოდა ადამიანი, თუ ეს მოხდებოდა ორ–სამ თვეში და არა 10 ან 20 წელიწადში, ანუ ისევ დროში არ გაიწელებოდა. ნატო–ს საპარლამენტო ასამბლეის პრეზიდენტს ამ შემოთავაზებაზე არ უსაუბრია, პასუხი არ გაუცია. ეს არ ყოფილა ნატო–ს ოფიციალური პოზიცია. ეს იყო უბრალოდ შემოგდებული საკენკი, რის გარშემოც დისკუსია მოხდა. ვფიქრობ, ამ თემაზე ნაადრევი დისკუსია მოხდა. ამ თემაზე პოლიტიკურ ისტეიბლიშმენტს არც უნდა გვესაუბრა“, – განაცხადა გიორგი ლომიამ.