20 ივნისის ღამის შემდეგ ცალკეული ადამიანები პოლიციის რეფორმის ჩატარების აუცილებლობაზე ალაპარაკდნენ. მათი აზრით, პოლიციის რეფორმა საჭიროა, რათა პოლიციელები თუ სპეცრაზმელები ასე დამიზნებით არ ესროდნენ საკუთარ მოქალაქეებს, უფრო ზნეობრივი გახდეს მათი ქმედება და ეს არ ჰგავდეს ზონდერების ნამოქმედარს.

პოლიციის რეფორმაზე ფიქრი, ალბათ, საჭირო იყო ჯერ კიდევ 7 ნოემბრისა და 26 მაისის შემდეგ დაგვეწყო, რათა პოლიციელებს გაეთავისებინათ, რომ მათ აქვთ თმენის ვალდებულება და, თუ ძალის გამოყენების გარდაუვალი აუცილებელობაა, თავში და უშუალოდ თვალებში მაინც არ დაემიზნებინათ მომიტინგეებისთვის.

პოლიტოლოგი სოსო ცინცაძე იზიარებს მოსაზრებას, რომ პოლიციის რეფორმის ჩატარება აუცილებელია. ის აცხადებს, რომ, საერთოდ, პროფესიონალიზმის კუთხით, საზოგადოებრივი წესრიგის დაცვის მხრივ ჩვენს პოლიციას გამოცდილება არ აქვს. ჩვენთან ან საერთოდ მიუშვებენ პოლიციელებს თავიანთ ნებაზე და ქაოსია, ან არის 7 ნოემბერი, 26 მაისი და 20 ივნისი. რასაკვირველია, ევროპაშიც ძალის გამოყენებით შლიან მომიტინგებს, მაგრამ საფრანგეთში ყვითელი ჟილეტების დროს ვინმე მოკვდა, ან დასახიჩრდა?!

„ევროპელმა სამართადამცავებმა ვინმეს თვალი რომ დათხარონ, მეორე დღესვე მთელი მთავრობა გადადგება. ხანდახან ამერიკაში ხდება ხოლმე ძალის გადაჭარბება, როდესაც შავკანიანებს შემოაკვდებათ შავკანიანი და მერე ამაზე ლამის რევოლუცია იწყება, არის გამოსვლები და პოლიტიკურ კრიზისამდე მიდის სიტუაცია. საქართველოში კი დილეტანტიზმია და რატომღაც მიაჩნიათ, რომ ოპოზიცია მტერია. გავიხსენოთ, მიშას დროს როგორ ეპყრობოდნენ ოპოზიციას, როგორც მტერს, ახლა როგორ ეპყრობიან. პოლიციის რეფორმა აუცილებელია, ასევე, აუცილებელია პოლიციელთა პროფესიონალიზმი, რომ მიტინგები არ გადაიზარდოს ქაოსში და მომიტინგეები ბრბოდ არ იქცნენ. საზოგადოებრივი წესრიგის დაცვა ცივილიზებული მეთოდებით უნდა მოხდეს და პოლიციელები არ უნდა გადიოდნენ მიტინგის დასაშლელად, როგორც ბრძოლის ველზე. ჯერ გამოვლენ ოპოზიციის დასაშლელად, შემდეგ გაისვრიან, მერე დაიმალებიან, კედელს მიეფარებიან, ისევ გამოვლენ, ისევ ისვრიან და ყველას რატომღაც თავში ხვდება ტყვია“,-აცხადებს სოსო ცინცაძე ჩვენთან საუბრისას.

მისი თქმით, პოლიციელთა უმრავლესობას, თუ სპეცრაზმს ჰგონია, რომ ესვრის მტერს, რადგან მათ თავიანთი უფროსებისგან ესმით, რომ ესენი არიან ნარკომანები, უსაქმურები, ვიღაცისგან მართულები, რომ ამათ ფული მისცა ოპოზიციამ და უნდათ სახელმწიფოს გადატრიალება, თითქოს ამ გოგო-ბიჭებს უნდათ მოვიდნენ და ყველანი გახდნენ პარლამენტის წევრები. სოსო ცინცაძის აზრით, ახალი ხელისუფლების მოსვლის შემდეგაც არაფერი შეიცვლება და პოლიციელები ყოველთვის ძალას გადააჭარბებენ, რადგან აქ არის სრული კოქტეილი დილეტანტიზმის, დემაგოგიის, მტრული პროპაგანდის.

ანალიტიკოსი დავით ზარდიაშვილი იზიარებს მოსაზრებას, რომ პოლიციის რეფორმა აქტუალურია. რასაკვირველია, რეზინის ტყვიების, მით უმეტეს, ნახევრად ლეტალური, რაკეტისმაგვარი ტყვიების რეგლამენტირება უფრო მკაცრი უნდა იყოს, რის შესახებაც გახარიამაც აღნიშნა კიდეც, რომ ამას სჭირდება სერიოზული ანალიზი.

„რამდენად შესაძლებელია, ჩვენმა პოლიციამ ამ ტყვიების გარეშეც თავისი ფუნქციები ეფექტურად შეასრულოს. ძალიან მძიმეა ამაზე რომ ვსაუბრობ, მაგრამ, რაც ჩვენ ვნახეთ, ანუ პარლამენტში შევარდნის მცდელობა, ეს ტყვიები რომ არ გამოეყენებინათ, დიდი რისკი იყო, ყველაფერი ცუდად დამთავრებულიყო. თუმცა თავში დამიზნება არაფრით შეიძლება. მტკიცებულებითი ფორმით ვერ ვიტყვი, რომ გინდა თუ არა პოლიციელს სურდა, ვინმესთვის თვალი ამოეთხარა, ეს გამოძიებამ უნდა დაადგინოს, მაგრამ ასეთი იარაღი უნდა გამოიყენონ უკიდურესი აუცილებლობისას. ჩვენ გვინახავს საერთაშორისო პრაქტიკა, როცა პარლამენტში შეჭრაზეა საუბარი, ამ შემთხვევაში, არათუ რეზინის ტყვიებს, პირდაპირ ცეცხლსასროლ იარაღსაც იყენებენ“, - აცხადებს დავით ზარდიაშვილი ჩვენთან საუბრისას.

მისი თქმით, რაღაც მომენტში კონტროლს გარეთ გავიდა მომიტინგეთა მოქმედება, რეალურად, მათ ქალაქის დარბევა დაიწყეს. ასეთ დროს პოლიცია ვალდებული იყო, ძალა გამოეყენებინა, მაგრამ მინიმალურად, რომ არავინ დაზარალებულიყო.

„პოლიტიკურად მე გახარიას ვენდობი. დარწმუნებული ვარ, ის ამ გამოძიებას ბოლომდე მიიყვანს და ჩვენ ვნახავთ, თითოეულ ასეთ შემთხვევაში, როდესაც პოლიციის მიერ არაპროპორციული ძალა იყო გამოყენებული, შესაბამისი რეაგირება იქნება“.