ლევან ვასაძემ კომბლების რევოლუცია გადაიფიქრა. მას შემდეგ, რაც შს სამინისტრომ ვასაძის ფორმირებებზე გამოძიება დაიწყო, ბიზნესმენმა განაცხადა, რომ პატრულირებას აუქმებს, რადგან ენდობა შს სამინისტროს.

თუმცა მანამდე მისი ტონი კატეგორიულად ჟღერდა: „ღმერთი არ გაგიწყრეთ და არ დაუწყოთ ცემა ჩვენებს, მაგ შემთხვევაში, თქვენ მიიღებთ პასუხს, ეს კომბალი არ მოხვდეს არც ერთ გარყვნილ ადამიანს, არც ერთ ქათამს, არც ერთ თხას. ჩვენ თავს არ გაგალახინებთ, ძმაო, ეს გამორიცხულია, თქვენ მიიღებთ მსოფლიოში პირველ კომბლების რევოლუციას“.

კომბლების რევოლუცია არა, მაგრამ ახდა მისი გარემოცვიდან გამოჟონილი ინფორმაცია, რომ ლევან ვასაძე ივნისის თვეში უნდა გააქტიურებულიყო.

ანალიტიკოსი დავით ზარდიაშვილი მიიჩნევს, რომ ეს ტალღაც გადაივლის და მთელი ეს ამბავიც ჩაცხრება. For.ge დავით ზარდიაშვილს ესაუბრა.

სამშობლოსთვის შეფიცულები, ნამდვილ მამაკაცთა კრება, - ასეთი ეპითეტები ისმოდა ლევან ვასაძის გააქტიურების კვალდაკვალ ლგბტ პრაიდის წინააღმდეგ. რა პერსპექტივა ექნება ვასაძეს 2020 წლისთვის?

- რა თქმა უნდა, ეს ყველაფერი გარკვეულ ემოციურ მუხტს ატარებს, ლგბტ თემა საკმაოდ სენსიტიურია და რაღაც აფექტს, ემოციების ზღვარს ჩვენს საზოგადოებაში იწვევს, მაგრამ შეუძლებელია ეს ყველაფერი პოლიტიკის საგნად იქცეს. ეს საკითხი პოლიტიკის რანგში თუ გადავა და სერიოზულ თემად იქცევა, მაშინ დაიღუპება ჩვენი ქვეყანა. იმედია, ასე არ მოხდება. თანდათანობით ეს ტალღაც გადაივლის, ემოციური ფონი, ლეგიონი და მთელი ეს ამბები ჩაცხრება. ლევან ვასაძის პოლიტიკაში სერიოზულ გამოჩენას მე არ ველი. რომც გამოჩნდეს, შანსი არ ექნება და ეს უკვე იქიდანაც ჩანს, რაც მან ამ დღეებში გააკეთა. არავითარი რეალური პერსპექტივა მის ძალას არ ექნება.

მაგრამ ამ ადამიანმა მოახერხა ვერის პარკში მამაკაცების მობილიზება, მას შეუერთდა პარლამენტარი ემზარ კვიციანი და წარსულის წლები გაიხსენა, როცა ბატალიონ „მონადირის“ აქტიურობის პერიოდში მსგავსი ფიცი დადო და ამ ფიცისთვის არ უღალატია.

- ესეც ღრმად არასერიოზულია. ამას შედეგი არ ექნება.

ალბათ, დაგვეთანხმებით, რომ ქვეყანაში ბევრ ადამიანს აქვს ლევან ვასაძის მსგავსი განწყობა, ამ დღეებში ხშირად ახსენებენ ალენ დალესის დოქტრინას, რაც ფასეულობების გაყალბებას, ახალგაზრდობის გარყვნას, პატიოსნებისა და წესიერების წარსულის გადმონაშთად გადაქცევას გულისხმობს. აქედან გამომდინარე, ლევან ვასაძე ამ კონკრეტულ სამიზნე ჯგუფსაც ვერ აიყოლიებს? თუნდაც მრევლი მას არ გაყვება?

- ეს არ მივა რეალურ პოლიტიკურ მოქმედებამდე და იმ ძალების სოციალურ კონსოლიდაციამდე, რომლებსაც პოლიტიკური მიზნები ექნებათ, რადგან ეს სრულიად ირაციონალური ცდაა და არ არის დაკავშირებული კონკრეტულ ინტერესებთან. პოლიტიკური განზომილება ამ საკითხს არ აქვს. ეს რომ პოლიტიკურ პროგრამად აქციონ, წარმოუდგენელია. როგორ შეიძლება, განსხვავებული სექსუალური ორიენტაციის ადამიანებთან ბრძოლა პოლიტიკურ მიზნად გამოაცხადო?! ეს ხომ არასერიოზულია?!

მათ იმედი აქვთ, რომ მსოფლიოშიც იმძლავრებენ პატრიოტები. მიგრანტების მოძალებამ, ლგბტ-ეების გააქტიურებამ მთელ მსოფლიოში მართლაც გაზარდა ხელისუფლებაში ეროვნული ძალების მოყვანის სურვილი.

- ეს სხვა შემთხვევაა, რადგან მსოფლიოს პატრიოტულ ძალებს განსხვავებული პოლიტიკური დისკურსი შემოაქვთ. ამ დისკურსის ნაწილი შეიძლება იყოს სექსუალური თემაც, მაგრამ ამ თემის გარშემო პოლიტიკური ორგანიზმის შექმნა ძნელი წარმოსადგენია. თავის დროზე ფაშისტებიც მოვიდნენ ხელისუფლებაში და მათ უფრო რადიკალური პროგრამებიც ჰქონდათ, მაგრამ ძალიან დიდი კატასტროფა უნდა მოხდეს, რომ მსგავსი ძალები პოლიტიკაში რეალური შედეგებით მოვიდნენ. ეს იქნება ქვეყნის დიდი უბედურება.

სხვათა შორის, თინა ხიდაშელმაც ფაშისტური ნარატივი ახსენა.

- რა თქმა უნდა, ყველას თავისებური ემოციური მიმართება აქვს განსხვავებული სექსუალური ორიენტაციის ადამიანებთან, მაგრამ როგორც კი ეს პოლიტიკაში გადადის და იწყება ნადირობა კუდიანებზე, როცა განსხვავებული ორიენტაციის ადამიანების დევნა პოლიტიკურ მიზნად ცხადდება, ეს უკავშირდება ფაშიზმს. თუმცა ფაშიზმს უფრო დახვეწილი და შორსმიმავალი პოლიტიკური მიზნები ჰქონდა - გერმანელი ერის მსოფლიო ბატონობა. ის, რაც საქართველოში ხდება, ფაშიზმიც არ არის, ეს ღრმად არასერიოზულია. 2020-ზე გათვლაც არარეალისტურია, რადგან ეს თემა ჩაწყნარდება. მეორე მხრივაც რომ დავფიქრდეთ, ლგბტ-ეები და მათი დაცვა ყურით მოთრეული საკითხია, არავითარი ლგბტ თემი საქართველოში არ არსებობს. თემი მექანიკურ ერთობა არ არის, ეს არის სოციალური ორგანიზმი, რომელიც ორგანიზებული ძალაა და შეუძლია, საკუთარი ინტერესებისთვის ბრძოლა. ასეთი რამ საქართველოში არ არის, უბრალოდ, არასამთავრობო სექტორში არის რაღაც სეგმენტი, რომელიც უცხოურ გრანტს გამოეკიდა და ვითომ ლგბტ-ეების უფლებებს იცავს. რეალურად, შეუძლებელია მათი უფლებების დაცვა, რაც არ არსებობს, ლგბტ თემი არ არსებობს. ცხადია, არსებობს განსხვავებული სექსუალური ორიენტაციის ადამიანები, მაგრამ საკითხის ისე წარმოჩენა, თითქოს მათ აქცენტირებული ინტერესები აქვთ, რეალობისგან ძალიან შორსაა. ამაზე ლევან ვასაძისეული რეაქციის გამოხატვა ყველაფერს სცდება, ეს ჭიქაში ატეხილი ქარიშხალია.

ხომ შეიძლება ვასაძემ და მისმა მომხრეებმა დაიწყონ ლგბტ თემით, მაგრამ პოლიტიკაში შემოსვლა გააგრძელონ სხვა სერიოზული თემებით? იქნებ, ზნეობრივი საკითხების წინ წამოწევა ჩვენს საზოგადოებას იზიდავს?

- ზნეობის ასე გამარტივება, ბოდიში და, პედერასტებთან ომამდე დაყვანა, სწორედ ზნეობის დისკრედიტაციაა. ეს ღირებულებების გავულგარულებაა. მით უმეტეს, ქართული ღირებულებები მნიშვნელოვანია. ქამრებით შევკრავ განსხვავებული ორიენტაციის ადამიანებს, ეს ხომ ზნეობრივი ნორმების დისკრედიტაციაა. გარდა ამისა, გაისმა მუქარა, პოლიციას განვაიარაღებთ და წესრიგს ჩვენ დავამყარებთო. ეს ჯერ კიდევ დასრულებული დანაშაული არ იყო, თუმცა ამას პრევენცია სჭირდებოდა, რათა მუქარიდან ქმედებებზე არ გადასულიყვნენ.

ზოგიერთი ფიქრობს, რომ ლევან ვასაძის პოლიტიკაში შემოყვანით ბიძინა ივანიშვილია დაინტერესებული.

- ეს შეთქმულების თეორიაა, რომლისაც არ მჯერა. რაში უნდა აინტერესებდეს ბიძინა ივანიშვილს ასეთი ისტერიკა? შესაძლოა, ვიღაცას რაღაც საკითხებისგან ყურადღების გადატანა სურდეს, მაგრამ არა მგონია, ეს მეთოდი ბიძინა ივანიშვილს გამოადგეს. ვასაძის რუსულ კავშირებზე საუბარიც შეთქმულების თეორია მგონია, არ არის ისე, თითქოს ლევან ვასაძე რუსეთის ხელი ან თავია საქართველოში. რუსეთს თავისი პოლიტიკის განხორციელებისთვის გაცილებით მძლავრი ინსტრუმენტები აქვს, ვიდრე ვასაძეა. მას არაფერში სჭირდება საქართველოს შიდა პოლიტიკაში ჩარევა, რადგან მუშაობს „ტაპორით“. როცა რუსეთს რაღაც დასჭირდება, პირდაპირ იმას იზამს, რაც აგვისტოს ომში გააკეთა. რაში სჭირდება რუსეთს ვასაძესა და ასეთ სიგიჟეებში ფულის ყრა, ეს ხომ არარაციონალურია? რაც შეეხება „მხედრიონთან“ პარალელს, „მხედრიონი“ კიდევ სხვა რამე იყო, ის იყო ნახევრად კრიმინალური წარმონაქმნი, მასში შეიმჩნეოდა კრიმინალური რომანტიკაც, გადაჯაჭვული პატრიოტულ, ჭეშმარიტ რომანტიკასთან, მაგრამ ლევან ვასაძის თანამოაზრეები კრიმინალები არ არიან. ესენი არიან დაბნეული ადამიანები, რომლებსაც ჰგონიათ, ჰომოფობია პოლიტიკურ დროშად უნდა აქციონ, რაც არასერიოზულია. არ ვამბობ, რომ ეს საშიშია, უბრალოდ, პერსპექტივა არ აქვს.

მათ ვერის პარკში ბევრი ხალხი შეაგროვეს.

- არც ისე, რა გითხრათ... მე ამაში ვერ ვხედავ მომავლის განვითარების პროცესებს, უბრალოდ, ხანდახან შეიკრიბებიან, პუბლიკას გაამხიარულებენ, ზოგჯერ შეიძლება მათი ქმედება საშიშიც აღმოჩნდეს, როგორც ის შემთხვევა, ტაბურეტებით რომ გარბოდნენ.

აქციაზე იმყოფებოდნენ სასულიერო პირებიც, ეს საპატრიარქოს თანადგომას ნიშნავს?

- საპატრიარქოს ოფიციალური პოზიცია ეს არ არის. ეს არის მხოლოდ ცალკეულ სასულიერო პირთა პოზიცია. საპატრიარქოს პოზიციაა, რომ სექსუალური გადახრები მიუღებელია, ეს რწმენის ამბავია და საპატრიარქოს ასე სჯერა, მაგრამ ამის წინააღმდეგ რომ ქამრებით ვიბრძოლოთ, ეს საპატრიარქოს პოზიცია ვერასდროს იქნება. საპატრიარქო ძალადობას გაემიჯნება. მით უმეტეს, ორგანიზებული სახით ლგბტ საზოგადოება საქართველოში არ არსებობს. არსებობს ორი ათეული ადამიანი, არასამთავრობო, რომელიც ელემენტარულად ამით პურს ჭამს.

მაინც მეჩვენება, ლევან ვასაძე იწყებს ლგბტ თემით და მერე შეიძლება სხვა მნიშვნელოვანი თემებით გააგრძელოს.

- არ ვიცი, ესეც ვნახოთ, თორემ თუ ლევან ვასაძეს მხოლოდ ის მოწოდება ექნება, ლეგიონს შევქმნი, რომ პედერასტები ქამრებით დავიჭიროო, ეს საკმარისი არ იქნება.