“ასეთ “ნიუსებს” რომ ვაწყდები, სულ ის მახსენდება, რამდენჯერ ვყავარ ნალანძღი…”

“ასეთ “ნიუსებს” რომ ვაწყდები, სულ ის მახსენდება, რამდენჯერ ვყავარ ნალანძღი…”

ფსიქიატრები რომ გაუქმდნენ ვიცი, მაგრამ ხულოს სამხატვრო გალერეა რა არის? სამხატვრო გალერეა და ხულო რა შუაში ერთმანეთთან? – ამის შესახებ ექსპრეზიდენტმა, მიხეილ სააკაშვილმა მიუნხენში ემიგრანტენთან შეხვედრის დროს ხულოს მაჟორიტარ დეპუტატზე საუბრისას განაცხადა.

სააკაშვილმა ბოლქვაძეს, რომელიც ორჯერ „ნაციონალური მოძრაობის“ სახელით იყო არჩეული პარლამენტში, „დეგრადირებული“ და „სუნიანი“ უწოდა.

„არის ერთი დეგრადირებული, ყოფილი დეპუტატი ხულოში, ბოლქვაძე. ჩემი სირცხვილი, რომ ეგ ჩემი პარტიის წევრი იყო. ანზორ ბოლქვაძე რომ ჩემ გვერდზე დაჯდებოდა და მისი სუნი რომ არ მაწუხებდა, ესეც ჩემი პრობლემაა. ანზორ ბოლქვაძემ ამას წინათ თავი გამოიჩინა თავისი სისულელეებით და ცოლი გაფორმებული ჰყავს ხულოს სამხატვრო გალერეის თანამშრომლად. კიდევ ერთხელ ვიმეორებ – ხულოს სამხატვრო გალერეა. ფსიქიატრები რომ გაუქმდნენ ვიცი, მაგრამ ხულოს სამხატვრო გალერეა რა არის? სამხატვრო გალერეა და ხულო რა შუაშია ერთმანეთთან?!” – განაცხადა სააკაშვილმა.

ყოფილი პრეზიდენტის შეურაცხმყოფელ განცხადებას ჟურნალისტი თამარ ჩერგოლეიშვილი გამოეხმაურა და სოციალურ ქსელში დაწერა, რომ მიხეილ სააკაშვილმა გამაოგნებელი დეგრადაცია განიცადა.

„სუნიანიაო ვიღაც ქოცზე ამბობს ეს მორალურად აყროლებული. ვიღაც არარაობის გამო, შეუძლია რომ ასეთი ამაზრზენი უკულტურობა გამოავლინოს საჯაროდ. გამაოგნებელი მასშტაბის დეგრადაცია განიცადა”, – დაწერა ჟურნალისტმა სოციალურ ქსელში.

თამარ ჩერგოლეიშვილის შეფასებას კი ჟურნალისტი მერაბ მეტრეველი გამოეხმაურა:

“ასეთ ნიუსებს რომ ვაწყდები, სულ ის მახსენდება, რამდენჯერ ვყავარ ნალანძღი თამარს მიშას გამო”, – დაწერა მეტრეველმა “ფეისბუქის” პირად გვერდზე.