ხელისუფლების გადაბარების პროცესი თითქოს ექსცესების გარეშე მიმდინარეობს, მაგრამ გარკვეული პრობლემები შეიქმნა კულტურის სამინისტროში, სადაც მინისტრობის კანდიდატის, გურამ ოდიშარიას მიერ მივლენილი სამუშაო ჯგუფის სამინისტროს თანამშრომლებთან შეხვედრა პრაქტიკულად ჩაიშალა. ამის შემდეგ კულტურისა და ძეგლთა დაცვის სამინისტროს თანამშრომლებმა გურამ ოდიშარიას სპეციალური განცხადებით მიმართეს. განცხადებაში ნათქვამია, რომ 2012 წლის 12 ოქტომბერს სამინისტროში უნდა შემდგარიყო პირველი სამუშაო შეხვედრა სამინისტროს დეპარტამენტების დირექტორებსა და მინისტრობის კანდიდატის წარმომადგნელებს შორის.

"შეხვედრის მიზანი, ჩვენი აზრით, იყო სამინისტროს საქმიანობის უკვე განხორციელებული, ასევე მიმდინარე პროექტების გაცნობა, რომელიც არაკონსტრუქციულობის გამო ჩაიშალა. თუ გაქვთ სურვილი, რომ უახლოეს მომავალში ჯანსაღ გარემოში წარიმართოს საქმიანობის გადაბარების პროცესი, გთხოვთ, სამუშაო ჯგუფი დააკომპლექტოთ მეტად კომპეტენტური, კორექტული და პროფესიონალი პირებით" - აღნიშნულია განცხადებაში.

გურამ ოდიშარიას წარმომადგენლობას თამარ ჩარკვიანი ხელმძღვანელობდა და for.ge შეეცადა მისგან გაერკვია, რამ გამოიწვია კულტურის სამინისტროს თანამშრომლების პროტესტი და რატომ დატოვეს მათ შეხვედრა.

თამარ ჩარკვიანი: მე ხელში მიჭირავს ეს განცხადება და გეტყვით, რომ ცოტა ხმამაღალი ნათქვამია, რომ კულტურის სამინისტროს თანამშრომლებმა გაავრცელეს ეს განცხადება. ხაზს ვუსვამ, რომ შეხვედრა მხოლოდ „ჰედ-ოფისმა“ დატოვა, დანარჩენი ადამიანები დარჩნენ ამ შეხვედრაზე. განსაკუთრებით გამოიკვეთა ხუთი ადამიანი, რომელთაგან სამის ვინაობა შემიძლია დაგისახელოთ, ესენი არიან მარინა ბერიძე, დავით ცხადაძე და მაკო ჭოღოშვილი. ამიტომ ხაზგასმით აღვნიშნავ, რომ მხოლოდ ეს ადამიანები გაღიზიანდნენ. ამას ძალიან დიდი მნიშვნელობა აქვს, რადგან შეხვედრაზე უამრავი სხვა ადამიანი იყო - ძეგლთა დაცვის დეპარტამენტის წარმომადგენლები და სხვები, და ისინი დარჩნენ.

რამ გამოიწვია იმ ხუთი ადამიანის გაღიზიანება, რომლებმაც შეხვედრა დატოვეს?

- საერთოდ, მგონია, რომ ეს წინასწარ იყო დაგეგმილი და გეტყვით რატომ ვფიქრობ ასე. ბატონმა მერაბ შათირიშვილმა ამ ადამიანებს მიმართა - იქნებ არის რაღაც ისეთი, რაც გინდოდათ გაგეკეთებინათ, მაგრამ ვერ გააკეთეთ, ან უბრალოდ რაღაც ზეწოლის გამო ვერ აკეთებდით, ან საერთოდ რას თვლით თქვენს მიღწევადო. მიმაჩნია, რომ ძალიან ლოიალური კითხვა იყო და სწორედ აქედან დაიწყო საუბარი. ბატონმა ცხადაძემ თქვა, რომ ყველაფერს ვაკეთებდითო. საერთოდ მინდა აღვნიშნო, რომ მისი მხრიდან ძალიან ირონიული და კულტურის სამინისტროსთვის ცოტა უკულტურო ნოტით მიდიოდა საუბარი. დავით ცხადაძემ აღნიშნა, რომ მათი მიღწევა არის ბაგრატის ტაძარი, რაზეც მერაბ შათირიშვილმა ჰკითხა - მაინცდამაინც ამას რატომ თვლით მიღწევადო. მეც ვუთხარი, რომ განსხვავებული აზრი მაქვს და თუკი ისინი ავთენტურობის დაცვას გულისხმობდნენ, სწორედ ავთენტურობის დაცვაში ლიფტი არ იგულისხმება-მეთქი. ჩემი პროფესიიდან გამომდინარე, თავს უფლებას მივცემ ჩემს აზრზე დავრჩე და მე ვთვლი, რომ ბაგრატის ტაძარი მიღწევად არ შეიძლება ჩაითვალოს. დარწმუნებული ვარ, ეს პოზიცია პირველად ჩემგან არ მოისმინეთ და მანამდეც ბევრი პროფესიონალისგან გაგიგიათ.

ბატონი დავითი ძალიან გაღიზიანდა და ამას მისი მხრიდან ამ თემაზე დაახლოებით 15-წუთიანი ლექცია მოჰყვა. მე ვუთხარი, რომ მისი პასუხი გასაგები იყო ჩემთვის, მაგრამ მან მიპასუხა, უმრავლესობის თანხმობით (ცხადია, ისინი უმრავლესობაში იყვნენ, რადგან ჩვენ მხოლოდ ხუთნი ვიყავით) აუცილებლად უნდა გითხრათ, რატომ არის ლიფტი კარგიო. ამ საუბარში მან საკმაოდ შეურაცხმყოფელი კითხვა დაუსვა ბატონ მერაბ შათირიშვილს - თქვენ საერთოდ იცით, რა არის ქოროო (ამის გამო, ბატონმა ცხადაძემ მოგვიანებით ტელეეთერით, პრინციპში, ბოდიშიც მოიხადა)? დავით ცხადაძეს მისი ამ ნათქვამის საპასუხოდ კორექტულობისკენ მოვუწოდე.

საერთოდ კულტურის სამინისტრო არის უწყება, რომელიც ნიჭიერ ადამიანებს უნდა ემსახურებოდეს. მათ განცხადებაში წერია, რომ ისინი ფიქრობდნენ, თითქოს ჩვენ უკვე განხორციელებული და სამომავლო პროექტების გამო მივდიოდით მათთან შეხვედრაზე. არა, ბატონო, ჩვენ დავით ცხადაძესა და მარინა ბერიძესთან ერთად განსახორციელებელი პროექტების გამო არ მივსულვართ და ხომ არ მოვიტყუები? ჩვენ მივედით იმისთვის, რომ ჩავიხედოთ სამინისტროს სტრუქტურაში და როგორც კი საქმე საბუთებამდე მივიდა, მაშინვე მივხვდით, რომ პროვოკაციას ჰქონდა ადგილი. აქ ძაღლის თავი არის არამიზნობრივად გახარჯული ვეებერთელა ფინანსები, რასაც ალბათ იურისტები მიხედავენ, ეს ჩემი საქმე არ არის. მიმაჩნია, რომ ეს იყო ძალიან კარგად დაგეგმილი პროვოკაცია, მაგრამ არა უშავს, თავად მათივე თანამშრომლები ამბობენ - რვა წელიწადია ჩვენ ამ სათაო ოფისის წნეხის ქვეშ ვმუშაობთო და რა გასაკვირი იქნებოდა, რომ მათ ეს პროვოკაცია მოეწყოთ.

ამდენად, თქვენ ამბობთ, რომ გარკვეული დოკუმენტაცია გამოითხოვეთ და ინციდენტი ამას მოჰყვა?

- დიახ, ბუნებრივია, როდესაც რაღაც უწყების გადმობარება ხდება, იურისტებმა გარკვეული დოკუმენტაცია მოიკითხეს. მე ვუყურებდი სამინისტროს წარმომადგენლების სახეებს, ამას მოჰყვა მათი ცინიკური ჩაქირქილება, შეურაცხყოფა - თქვენ საერთოდ იცით, რა არის გუმბათიო? და ა.შ. მე კონსერვატორია მაქვს დამთავრებული (საფორტეპიანო განყოფილება), 1986 წლიდან პუბლიცისტიკაში ვმუშაობ, მეორადი ფაკულტეტი ხელოვნებათმცოდნეობა მაქვს დამთავრებული და ამიტომ, როდესაც დავით ცხადაძე არაკომპეტენტურობაზე მელაპარაკება, მაპატიეთ, მაგრამ მისგან ასეთი ტონით საუბარს ვერ მივიღებ. ასევე ვერ მივიღებ მარინა ბერიძისგან. თუკი ის ჯეოსტარის ბავშვებთან ცინიკურ და უკმეხ საუბარს არის მიჩვეული, არ მგონია, რომ ეს ის ადგილი იყოს, სადაც ასე უნდა ვისაუბროთ. ეს ჩემი აზრია და, საერთოდ, მიმაჩნია, რომ შესაძლოა ჩემი კატეგორიულობა ბაგრატის ტაძართან და საერთოდაც, მათ რვაწლიან კულტურულ ესთეტიკასთან დაკავშირებით, განსხვავებული რადიკალური აზრი იყოს, მაგრამ ამის გამო კულტურის სამინისტროში ადამიანები ასე უკულტუროდ არ იქცევიან, რომ შეხვედრა დატოვონ. ეს ჩემი მოკრძალებული აზრია.

მას შემდეგ, რაც ამ ადამიანებმა ოთახი დატოვეს, შეხვედრა ჩაიშალა?

- ალბათ, ეს ადამიანები ფიქრობენ, რომ შეხვედრა ჩაიშალა, მაგრამ იქ სამინისტროს დანარჩენი თანამშრომლები დარჩნენ. ამიტომ მე ნამდვილად არ ვთვლი, რომ შეხვედრა ჩაიშალა, მით უმეტეს, ჩვენ რა ინფორმაციის მიღებაც გვინდოდა, დარჩენილი ადამიანებისგან მივიღეთ. ასე რომ, მათ რაც უნდა ის იფიქრონ, მე ვთვლი, რომ უსამოვნო პროვოკაციას ჰქონდა ადგილი.

ამდენად, თქვენს მიერ მოთხოვნილი დოკუმენტაცია მიიღეთ?

- იცით რა… მათგან არ მიგვიღია, მაგრამ გარკვეული დოკუმენტაცია იურისტების მიერ უკვე ამოღებულია.

მომავალში როგორ გაგრძელდება თქვენი სამინისტროს წარმომადგენლებთან თანამშრომლობა?

- ნორმალურად. მიმაჩნია, რომ ალბათ ჩვენ ჩვენს განსხვავებულ აზრებზე საერთოდ აღარ ვისაუბრებთ, რადგან ეს ყველაფერი უკვე ვიცით და ამიტომ მიმაჩნია, რომ აბსოლუტურად მშვიდ გარემოში გაგრძელდება ეს თანამშრომლობა. მე ძალიან კარგად ვიცნობ კულტურის სამინისტროს და მინდა განვაცხადო, რომ იქ ზოგიერთი ისეთი ინტელექტუალი და კარგი ადამიანი მუშაობს და, სხვათაშორის, ისინი ცოტა ხანში გააკეთებენ განცხადებას იმასთან დაკავშირებით, ამ ჰედ-ოფისის წნეხის ქვეშ როგორი მუშაობა უხდებოდათ. ეს უნდა დამთავრდეს. კულტურის სამინისტროს პრინციპი არის ის, რომ ნიჭიერი ადამიანების და არა პოლიტიზირებული და ანგაჟირებული, უგემოვნო მომღერლების პოპულარიზაციით. ვეებერთელა თანხები არის კლიპებზე გამოყოფილი.

ჩვენ ვართ ვეებერთელა კოლტურის ქვეყანა და ნიჭიერ ადამიანებს აქვთ უფლება, სამინისტროს გამჭვირვალობა ნახონ. ერთი რაც შემიძლია ბატონ გურამზე ვთქვა - გარდა იმისა, რომ კარგი მწერალია და დიდი ხანია, რაც მის მწერლობას ვიცნობ, ეს არის უპატიოსნესი ადამიანი. შეიძლება ვინმეს ვესიმპათიურებოდე, ან არ ვესიმპათიურებოდე, ეს ძალიან სუბიექტურია, მაგრამ თავს უფლებას მივცემ განვაცხადო, რომ ოპონენტებიც კი წესიერ ადამიანად მიცნობენ. მე თუ მომეცემა საშუალება, რომ ბატონ გურამის ხელმძღვანელობით მოვემსახურო და პროპაგანდა გავუწიო ვეებერთელა კულტურას, უბედნიერესი ადამიანი ვიქნები. თითოეული ნიჭიერი ქართველი დაცვა და შველა არის ჩვენი სამომავლო დანიშნულება.