მედიასაშუალებების წარმომადგენლებთან საუბრისას ბიძინა ივანიშვილის სამოქმედო გეგმამ და ხედვამ საზოგადოებრივი მაუწყებლის გენერალური დირექტორის გია ჭანტურიას გაღიზიანება გამოიწვია. მან და ლევან გახელაძემ პროტესტის ნიშნად დატოვეს შეხვედრა სასტუმრო „რედისონში“.

თუმცა მანამდე „რედისონში“ საქართველოს პრესის ასოციაციის ორგანიზებით ჩატარებული შეხვედრა ნორმალურად მიმდინარეობდა. ბიძინა ივანიშვილმა ჟურნალისტებისა და მედიის ხელმძღვანელობის შეკითხვებს უპასუხა. მისი თქმით, „ქართული ოცნების“ გამარჯვების შემთხვევაში, მედია მეოთხე ხელისუფლების ფუნქციას დაიბრუნებს.
გია ჭანტურია განსაკუთრებით რადიო „პალიტრის“ წარმომადგენლის თამარ ცაგარეიშვილის კითხვამ აღაშფოთა და მას მხარე უწოდა. კერძოდ, თამარ ცაგარეიშვილი დაინტერესდა, ხელისუფლებაში მოსვლის შემთხვევაში, როგორ წარმოუდგენია ბიძინა ივანიშვილს საზოგადოებრივი მაუწყებლის როლი.
გიორგი ჭანტურიამ აღნიშნა, რომ რადიო „პალიტრისგან“ შენიშვნას ვერ მიიღებს, რადგან „ის მხარეა“, რამაც შეხვედრაზე მყოფი მედიასახლ „პალიტრის“ წარმომადგენლების აღშფოთება გამოიწვია.

საკუთარი სიტყვების არგუმენტად გიორგი ჭანტურიამ ეუთოს მონიტორინგის ჯგუფის მიერ შედგენილი რეიტინგი დაასახელა, რომელშიც, მისი თქმით, „პალიტრა“ „ყველაზე მიკერძოებულ რადიოდ არის წარმოდგენილი“.
მედიასაშუალებების წარმომადგენლებთან ბიძინა ივანიშვილის შეხვედრა კი გიორგი ჭანტურიამ „საზოგადოებრივი მაუწყებლის კრიტიკისთვის გამიზნულ შეკრებად“ ჩათვალა და პროტესტის ნიშნად შეხვედრა ხმაურით დატოვა.

თუმცა ინციდენტი ამით არ ამოწურულა და სიტყვიერმა დაპირისპირებამ მოგვიანებით სასტუმრო „რედისონის“ ფოიეში გადაინაცვლა, ამჯერად ტელეკომპანია „მაესტროს“ ერთ–ერთ მფლობელ მამუკა ღლონტსა და გია ჭანტურიას შორის.

„წესი არ იციან, როგორ ფინანსდება საზოგადოებრივი მაუწყებელი. რაღაც კომისიას ქმნიან და ჩვენი ლანძღვა დაიწყეს... კითხვები გვქონდა და პასუხები არ გაგვცეს... ექვსი მედიასაშუალება საზოგადოებრივ მაუწყებელს ლანძღავს“, -აცხადებდა გიორგი ჭანტურია.

ამასობაში მამუკა ღლონტმაც არ დააყოვნა და გია ჭანტურიას მიმართა: „ამერიკის ელჩთანაც გითხარი, კოლმეურნეობის თავმჯდომარე ხარ. მალე წახვალ საზოგადოებრივი მაუწყებლის ხელმძღვანელობიდან, რადგან უზრდელი პრეზიდენტის უზრდელი მონა ხარ“.

გია ჭანტურიამ ამ ყველაფერს კამერებთან დადგმული სცენარი უწოდა და მამუკა ღლონტის მისამართით დაიქადნა, რომ ღლონტი „ახლა ვერ მიიღებს იმას, რასაც მისგან ელის და, რომ ეს სხვა დროს უნდა იყოს.“ „შე ჩმორო“, „კურდღელი ხარ“ - ასე მჭევრმეტყველურად გაისმოდა ეს შეძახილები.    

For.ge გია ჭანტურიას ესაუბრა, თუმცა იგი აგრესიულ ტონს ინარჩუნებდა, ხმას უმაღლებდა, მოულოდნელად კი ტელეფონი გაგვითიშა და ბოლომდე კითხვის დასმის საშუალება არ მოგვცა.

„რედისონში“ შეხვედრისას რამ გამოიწვია თქვენი გაღიზიანება? როდესაც ბიძინა ივანიშვილი საუბრობდა, თქვენ გაღიზიანდით და დატოვეთ დარბაზი.

- როგორც ჩვენ აგვიხსნეს, ბიძინა ივანიშვილი იქ იმის გამო მოვიდა, რომ გარკვეული კითხვებისთვის პასუხი გაეცა. მედიასაშუალებების წარმომადგენლები მიგვიწვიეს, მე ლაშა ტუღუშს დიდ პატივს ვცემ და დავთანხმდი. ჩვენ ბევრ რამეში ვთანამშრომლობთ. იმის ნაცვლად, რომ კითხვები დაგვესვა, ჯერ დაგვმოძღვრა, შემდეგ, რამდენიმე მედიასაშაულება ბატონ ბიძინას ეკითხებოდა, ხელისუფლებაში მოსვლის შემთხვევაში, როგორ გადაწყვეტდა საზოგადოებრივი მაუწყებლის საკითხს. ბოდიში, მაგრამ ახლა საზოგადოებრივი მაუწყებლის სტატუსი და მომავალი ბიძინა ივანიშვილის, მამუკა ღლონტისა და რამდენიმე პოლიტიკურად ანგაჟირებული რადიოს გადასაწყვეტი ნამდვილად არ არის.

მაშინ ვისი გადასაწყვეტია ეს თემა? უკვე კარგა ხანია, საუბრობენ, რომ საზოგადოებრივი მაუწყებელი ასრულებს ხელისუფლების დავალებას.

- ვინ საუბრობს, მითხარით?

ვინ და - საზოგადოება.

- ვინ არის საზოგადოება?

ჩვენ, ყველანი, საზოგადოების წევრები არ ვართ?

- თქვენ ყველანი როგორ ხართ? თქვენ ახლა მედიასაშუალების წარმომადგენელი ხართ.

როგორ, მეც ხომ ვარ საზოგადოების წევრი, როგორც მედიასაშუალების წარმომადგენელი?

- უკაცრავად, ჩემო კარგო, ერთი წუთით, ბოლოს როდის უყურეთ პირველ არხს?
ხანდახან ვუყურებ ხოლმე.

- როდისმე რამე არ მოგეწონათ?

ახლა დაკითხვებს მიწყობთ? ეს არის ტენდენციური არხი, ასეა აღიარებული საზოგადოებაში.

- ვინ აღიარებს?

მაშინ, გვითხარით, პროცენტულად რამდენი უყურებს საზოგადოებრივ მაუწყებელს?

- ეგ რა შუაშია? პროცენტულად ბევრმა უნდა უყუროს?

ანუ, თქვენ ფიქრობთ, რომ არხი ტენდენციური არ არის და ამის მიუხედავადაც, არ უყურებენ?

- უკაცრავად, საზოგადოებრივ მაუწყებელზე, სხვათა შორის, დასკვნა გამოაქვეყნა ეუთომ, გაეროს მონიტორინგმა, რომელიც რამდენიმე თვეა, მიმდინარეობს და აღიარებენ, რომ ერთადერთი არხია, რომელიც მიუკერძოებლად აშუქებს მოვლენებს. ის, რომ ახლა რომელიღაც პოლიტიკურად ანგაჟირებულ ადამიანს არ მოსწონს რომ ჩვენ ნეიტრალურები ვართ, ეს გასაგებია. მაგრამ საზოგადოების სახელით, ძალიან დიდი ბოდიში, ვერც მამუკა ღლონტი დამელაპარაკება, ვერც ბიძინა ივანიშვილი, მით უმეტეს, საერთოდ, ამ ქვეყნის მოქალაქე არ არის და ჯერჯერობით შეუძლია, ფრანგული საზოგადოებრივი მაუწყებლის ბედზე იზრუნოს. საზოგადოებრივი მაუწყებლის ფორმატი  კომერციული არხებისგან განსხვავებულია. ერთ დღეში შემიძლია ეს არხი უფრო ყურებადი გავხადო.

როგორ?

- ლათინური სერიალების ხარჯზე.

ანუ კიდევ უფრო დააკნინოთ?

- გაწყობთ თქვენ ეს?
თუ არხის დაკნინებას გულისხმობთ, მე ეს არ მაწყობს, მაგრამ აბა ლათინური სერიალები რა არის?!

- რა თქმა უნდა, პირველი, რაც გავაკეთე, ესენი ამოვიღე ეთერიდან. მე მაქვს გადაცემა, როგორიც არის კახა თოლორდავას „უცნობი მუსიკა“. გაქვთ ნანახი?

თქვენს არხს ძალიან იშვიათად ვუყურებ.

- თუ არ უყურებთ, ჯერ უყურეთ. მე იქ დავინახე, რომ „მაესტროს“ ხელმძღვანელობა, ბიძინა ივანიშვილი და რადიო „პალიტრის“ ხელმძღვანელობა იყო ერთ მხარედ წარმოჩენილი და ბიძინა ივანიშვილმა გვითხრა, რომ შეცვლის დაფინანსების წესს. როდესც ვკითხე, ახლა როგორია ეს წესი, მან ვერ გამცა პასუხი, რადგან არ იცის, როგორია მაუწყებლის დაფინანსების წესი. ვინც არ იცის და მაინც სურვილი აქვს, რაღაცები შეცვალოს, ეს პოპულიზმია. მერე, ბატონმა მამუკა ღლონტმა განაცხადა, რომ ცოტა ხანში მოვა ახალი ხელისუფლება და ის გამიშვებს საზოგადოებრივი მაუწყებლიდან. მედიასაშუალების ხელმძღვანელი ასეთ რამეს არ უნდა იძახდეს. ეტყობა, ვიღაცამ ვერ აუხსნა ბატონ მამუკას, რომ, რაც არ უნდა კომერციული ან საზოგადოებრივი იყოს მედიასაშუალება, რაღაც ჟურნალისტური ეთიკის ნორმები არსებობს, რომელიც ყველამ  უნდა დაიცვას. ტყუილად ჰგონიათ, რომ, თუ ისინი არიან კომერციული არხები, მათ უფლება აქვთ, მხარეები იყვნენ.

თქვენ ხომ საუბრობდით და ახლა მეც მინდა, რაღაც გკითხოთ. შეიძლება ჩაგეკითხოთ? რატომღაც ღიზიანდებით…

- არ ვღიზიანდები, მეუბნებით, ეს არხი ხომ ის არის?! როგორ არის ის? 500 ორგანიზაცია იძახის, რომ ეს არხი ერთადერთი მიუკერძოებელია და ამ დროს თქვენ ამას მეუბნებით. ახლა თქვენ უფრო კარგად იცით თუ ეუთოს მონიტორინგმა, ბოდიში რა?

თქვენ აცხადებთ, რომ 500 ორგანიზაცია და ეუთოს მონიტორინგი ამ არხის მიუკერძოებლობას ადასტურებს, მაგრამ ამის მიუხედავად, როგორ ფიქრობთ, თქვენი არხი რატომ არ არის საზოგადოებაში ყურებადი? დასკვნები ერთია, მაგრამ რეალობა სხვაა.

- უკაცრავად, მაგრამ „ბიბისი“ უფრო ნაკლებ ყურებადია ვიდრე, მაგალითად, „სკაი ნიუსი“.

მაგრამ „ბიბისის“ ხომ არ შეედრებით საზოგადოებრივი მაუწყებელი?

- არა, რატომ? აბა, ვის უნდა შევედარო, უკაცრავად?

„ბიბისის“ ედრებით? ყველანაირად გაქვთ ამის მონაცემები?

- გეტყვით, რატომ არის ნაკლები რეიტინგი, რადგან ჩვენ ყველა ფენასა და ყველა სოციალურ ჯგუფზე თანაბრად ვანაწილებთ ჩვენს ეთერს და ერთ კონკრეტულზე აქცენტს არ ვაკეთებთ. ძალიან დიდი ბოდიში, მაგრამ საბავშვო გადაცემას ჩვენთან უყურებენ მხოლოდ ბავშვები, მუსიკაზე გადაცემას - ვისაც მუსიკა აინტერესებს. ჩვენი პროდუქტი ყველაზე არ არის გათვლილი, არამედ ეს არის ძალიან რთული. ახლა როგორ დაგიწყოთ ამის ახსნა საზოგადოებრივი მაუწყებლის პრინციპების შესახებ?! ეს ძალიან რთულია.

ახლა ამდენის ახსნა არც მინდა…

- ამიტომ, რეიტინგი არაფერ შუაშია, ჩემო კარგო. თუმცა საზოგადოებრივი მაუწყებლის ფუნქცია ცოტა სხვა რამეა, ვიდრე რეიტინგი. მან უნდა მოიცვას საზოგადოების ყველა ფენა. თუ ყველა ფენას მოიცავ, რეიტინგი ვერ გექნება ისე მაღალი.

გასაგებია, მაგრამ  იმ დროს, როდესაც საქართველოში ასეთი კატაკლიზმური მდგომარეობაა, არჩევნების წინაშე ვდგავართ, ამ დროს არის თუ არა საზოგადოებრივი მაუწყებლის მოვალეობა, პოლიტიკურად ისეთი გახადოს გადაცემები, რომ საზოგადოებისთვის ყურებადი იყოს?

- თქვენ თუ არ გინახავთ, როგორ მეუბნებით უფრო პოლიტიკური გახადოსო?

მაგრამ საზოგადოებას ხომ სწორი არჩევანის გაკეთებაში უნდა დაეხმაროთ?

- ჩვენი არხი ძალიან პოლიტიკურია. ერთი წუთით... დებატები ჩავატარეთ, არავის სხვას ასეთი არ ჩაუტარებია. ყოველთვიურად „მოამბის“ გამოშვებაში რომელიმე საარჩევნო სუბიექტის წარმომადგენელია, რაც მეოთხე თვეა, გრძელდება. კვალიფიციურ სუბიექტებს შორის ბალანსი ზედმიწევნით დაცულია. გვაქვს გამოშვებები მაჟორიტარებზე.

არ გვინდა, ასე თქვენი რეკლამა გამოგდით.

- უკაცრავად, მაგრამ თქვენ გინდათ, მე მხარე ვიყო?

მე მხარედ ყოფნას არ გთხოვთ. მე გეუბნებით, როდესაც პოლიტიკურად აქტიური პროცესები მიმდინარეობს საქართველოში, ნუთუ არ არის საზოგადოების დაკვეთა, მოთხოვნა, რომ პოლიტიკური რეალობის შეფასება უფრო მეტად გქონდეთ? ერთადერთი გადაცემა მახსოვს, როდესაც საზოგადოებრივ მაუწყებელზე შედარებით ბალანსირებულად გავიდა ციხეებში მომხდარი ამბავი (ხსენებული აქციების შემდეგ) და მე თვითონაც გამიკვირდა, ნუთუ ეს საზოგადოებრივი მაუწყებელი იყო?! დანარჩენ შემთხვევაში, ასეთი რამ არ ხდება.

- უკაცრავად, მაგრამ ერთადერთი არხი იყო, რომელიც პენიტენციალურ სისტემაში პრობლემებზე საუბრობდა. ყველა სხვა დანარჩენი დუმდა და ამაზე ორი ვრცელი სიუჟეტი გვქონდა, თანაც საკმაოდ კრიტიკული მაშინდელი მინისტრის მიმართ.

ზოგადად ხელისუფლების მიმართ რატომ არ ხართ ისე კრიტიკული, როგორც ოპოზიციის მიმართ?
- აბსოლუტურად დაბალანსებულია, თანაბრად ნაწილდება დრო, ნეგატიური და პოზიტიური ტონიც კი დაბალანსებულია. თუ ოპოზიციურ პარტიაზე ვინმე ცუდს იტყვის, ჩვენ საერთოდ არ ვამბობთ, ჩვენი ჟურნალისტები არანაირ სარედაქციო ჩარევას არ ახდენენ. ხვდებით, ჩვენი სტილი როგორია?

ანუ, გამოდის, თქვენი ჟურნალისტები არც აშუქებენ ისეთ ფაქტებს, როგორიც კარალეთში, გორში მომხდარი ცემა-ტყეპა იყო? ეს ფაქტები როგორ გაშუქდა?

- შეხედეთ და ჩართეთ ჩვენი არხი, ჩემო კარგო.

არა, თქვენგან მაინტერესებს, დაბალანსებულად გაშუქდა?

- ყველა იმ ფაქტს, რაც საქართველოს მოსახლეობისთვის მნიშვნელოვანია, მაუწყებელი აშუქებს, ოღონდ - არატენდენციურად. სამწუხაროდ, სხვადასხვა პოლიტიკური პარტიების მხრიდან არის სურვილი, ჩვენ ეს ტენდენციურად გავაშუქოთ, რათა მათ წისქვილზე დავასხათ წყალი, რასაც ჩვენ არ ვაკეთებთ.

ისევ შეგეკითხებით: კარალეთის, გორის ინციდენტები ხომ გახსოვთ - ცემა-ტყეპა რომ იყო ატეხილი, ასევე, ჟურნალისტების დევნა, თქვენ გააშუქეთ ეს ფაქტები?
- აბსოლუტურად ყველაფერს, რაც კი ხდება ქვეყანაში, ვაშუქებთ.

და როგორ ასახეთ ფაქტები - კახი კალაძემ გამოიწვია დაპირისპირება და წინააღმდეგობა გაუწია მოსახლეობასო, თუ პირიქით, რომ გამგებლები და ნაციონალები მონაწილეობდნენ ჩხუბში?

- ვაიმე, თქვენ მხარე ხართ ახლა.

საერთოდ, ჟურნალისტები მხარეები არიან და ისინი საზოგადოებას წარმოადგენენ.

- ჟურნალისტი თუ მხარეა, მაშინ მე თქვენ რაზე გელაპარაკებით? როგორ წარმოადგენთ საზოგადოებას?! თქვენ ხართ მხარე.

შეიძლება, თქვენ ასე ჩათვალოთ, მაგრამ საზოგადოება არის მხარე, ამ შემთხვევაში კი, მე მათ კითხვებს ვახმოვანებ.

- ამ შემთხვევაში, ნახვამდის, კარგად ბრძანდებოდეთ.

თქვენ ხომ ლაპარაკი გაცალეთ, იქნებ, მეც მინდა, შეკითხვები დაგისვათ.

- რა უნდა დაგაცალოთ, არაპროფესიონალი ვიღაც მხარე ხართ, პოლიტიკურად ანგაჟირებული.

ამ სიტყვებთან ერთად მობილური გათიშა და ხელმეორედ დარეკვის შემდეგაც ზარებს არ პასუხობდა. მოკლედ, გია ჭანტურია ისევე გაექცა ჩვენთან საუბარს, როგორც „რედისონის“ დარბაზს. თუმცა გვინდოდა, გაგვეგო მისი მოსაზრება, რატომ შუქდებოდა ცალმხრივად მის არხზე 26 მაისის მოვლენები, რატომ დუმდნენ ისინი გახმაურებული მკვლელობების და სხვა ფაქტების შესახებ?! ასევე, გვაინტერესებდა, რატომ უკრძალავს იგი თამარ ცაგარეიშვილს შეკითხვის დასმას, მაშინ, როცა ჟურნალისტის თითქმის ნებისმიერი კითხვა ლეგიტიმურია, მით უფრო, გასაღიზიანებელი არ უნდა ყოფილიყო ჟურნალისტის დაინტერესება, თუ რა გეგმა ჰქონდა ბიძინა ივანიშვილს საზოგადოებრივ მაუწყებელთან მიმართებით.

ჩვენ რადიო „პალიტრის“ წარმომადგენლს თამარ ცაგარეიშვილსაც დავუკავშირდით, რომლის შეკითხვამაც გია ჭანტურია გააღიაზიანა.

„ვერანაირი გია ჭანტურია ვერ მასწავლის მე კითხვის დასმას. როგორი დაფინანსების  ახალი ვერსიაც არ უნდა შემოგვთავაზოს ჭანტურიამ და, სხვათა შორის, იგი ამით ლავირებდა, რომ თქვენ არ იცით დაფინანსების პრინციპი, საზოგადოებრივი მაუწყებელი ის არხია, რომელიც ფინანსდება ყველა ჩვენგანის ჯიბიდან. მან კარგად უნდა იცოდეს, რომ ეს შიდა ეროვნული პროდუქტი ჩვენს ფულზეა და საზოგადოების კაპიკებზეა. ამიტომ საზოგადოების ყველა წევრს განსაკუთრებული დამოკიდებულება და მონიტორინგის განსაკუთრებული შესაძლებლობა უნდა ჰქონდეს ამ მაუწყებლის მიმართ“, - აცხადებს თამარ ცაგარეიშვილი.

მისი თქმით, წლების მანძილზე საზოგადოებრივ მაუწყებელზე ეს საერთოდ მომსპარი იყო. ამის მიუხედავად კი, ჭანტურია აპელირებს, რომ საერთაშორისო რეიტინგის მიხედვით, ისინი ყველაზე დაბალანსებულები არიან. თამარ ცაგარეიშვილის აზრით, რომელიმე რეიტინგმა კი არ უნდა შეაფასოს მათი დაბალანსებულობა, არამედ ჭანტურია უნდა გავიდეს ქუჩაში, სიმართლეს თვალებში შეხედოს და საქართველოს მოსახლეობას ჰკითხოს, რამდენად დაბალანსებულად მიაჩნია საზოგადოებრივი არხის პოლიტიკა.

ამ მხრივ ჟურნალისტისთვის ბოლო დროის პირველი ინდიკატორი იყო, თუ როგორ გააშუქებდა ეს არხი სასჯელაღსრულების დეპარტამენტში არსებულ სიმახინჯეს. თუმცა ცაგარეიშვილის შეფასებით, ეს იყო ჩვენი დაცინვა. ამის გამო პროტესტის გრძნობა ამ არხის ერთგულ თანამშრომლებსაც გაუჩნდათ და ისინიც შეაწუხა მოქალაქეობრივმა პასუხისმგებლობამ და სინდისმა, რასაც ჟურნალისტი ჭანტურიას შესახებ ვერ იტყვის:

„რამ აღაშფოთა, არ ვიცი. დიახაც, მაინტერესებს, როგორ პასუხისმგებლობას იღებს ივანიშვილი საზოგადოებრივი მაუწყებლის წინაშე, რადგან ეს მაუწყებელი ყველაზე მეტად არის პასუხისმგებელი საზოგადოების მიმართ. ამის თქმის უფლებას მაძლევს ჩემი 25 წლიანი მოღვაწეობა, რომელიც მე გავატარე საზოგადოებრივ მაუწყებელში“.

თამარ ცაგარეიშვილის თქმით, იგი გია ჭანტურიასთან შესახვედრად არ მისულა, უბრალოდ, იგი მივიდა იმ კაცთან შესახვედრად, რომლისთვისაც ხმის მიცემას აპირებს. მას აინტერესებდა, თუ რას იტყოდა საზოგადოებრივი მაუწყებელის შესახებ „ქართული ოცნების“ ლიდერი, რაც განსაზღვავდა მისდამი დამოკიდებულებას, მისცემდა თუ არა იგი არჩევნებში მას ხმას. ჟურნალისტი მიიჩნევს, რომ უნდა გაიმარჯვოს იმ ხელისუფლებამ, რომელიც მედიას სწორად უყურებს.

„ჭანტურია რომ არ დამენახა, ცოტა სხვანაირად დავსვამდი ამ შეკითხვას. დიდ მნიშვნელობას ვანიჭებ ეთიკას და, შესაძლოა, არაეთიკურად მიმეჩნია, მომეთმინა და სხვა გზით გამეგო ამაზე პასუხი. მაგრამ, როცა დავინახე ჭანტურია და, განსაკუთრებით, გახელაძე, ამის უფლება მივეცი ჩემს თავს და, მე მგონი, ძალიან სწორადაც“.

ჟურნალისტის სიტყვით, იგი ვალდებულია, იყოს საზოგადოებრივი მაუწყებლის მსაჯული. უფრო მეტიც, მათ მუშაობას არაპროფესიულად, არაეთიკურად, დანაშაულებრივადაც მიიჩნევს, რადგან ისინი რეალობას მალავენ.

„პალიტრა მედიას მხარე იმიტომ უწოდა, რომ ყოველთვის სუსტი იწყებს ჩხუბს, იწყებს ხელების ქნევას და იმ მოედნის დატოვებას, სადაც იცის, რომ ის დამარცხებული იქნება. მის მხარეს არ არის სიმართლე, ამიტომაც გაიქცა. დარჩენილიყო, რა ახლა, თოფს ვესროდით, ან ივანიშვილი ესროდა, თუ რაშია საქმე?! რაც შეეხება პალიტრა მედიას, ზუსტად საზოგადოებრივი კვლევების მიხედვით, ირიბი და პირდაპირი საუბრის თვალსაზრისით, აქ საკმაოდ მრავალფეროვანი სურათია“.
თუ რატომ არ აშუქებს საზოგადოებრივი მაუწყებელი ცალკეულ მოვლენას, ამის შესახებ თამარ ცაგარეიშვილი კონკრეტული პროექტების ჩამოთვლას საჭიროდ არ მიიჩნევს, თუმცა აცხადებს, რომ ამ არხის პოზიცია თვალნათელია - ეს არ არის საზოგადოებრივი მაუწყებელი, ეს არის მიკერძოებული  სახელმწიფო მაუწყებელი.

„ეკა კვესიტაძის სტუმრები აიღეთ, მისი, როგორც წამყვანის, პოზიცია გაიხსენეთ, დავით პაიჭაძის სტუმრები და მისი დამოკიდებულება გაიხსენეთ, სად არის თოქ-შოუები? როგორ, მაგათ გირგვლიანი არ იცოდნენ? ან კიდევ 26 მაისი? სად იყო მაშინ საზოგადოებრივი მაუწყებელი, როდესაც მსოფლიოში საუკუნის პანორამა დაიდო.  შესაძლოა, ციხეებზე ერთი ან ორი სიუჟეტი დადონ, მაგრამ საგანგებო მაუწყებლობაზე უნდა გადასულიყვნენ, უნდა გადასულიყვნენ პირდაპირ ეთერზე, უნდა გაეხსნათ ეთერი და შემოეშვათ მთელი ეს განრისხებული საქართველო“.

აქვე თამარ ცაგარეიშვილმა პასუხი გასცა გია ჭანტურიას მხრიდან ჟურნალისტების მხარეებად წარმოჩენის მცდელობას. მისი თქმით, მისთვის ყველაზე მნიშვნელოვანი  ღირსებაა და იგი არავის მხარეს არ წარმოადგენს.

„ბიძინა ივანიშვილი აქამდე თვალით არ მინახავს. მე მგონი, მასაც არ ვუნახივარ არასდროს. არ გავკარებივარ ბიძინა ივანიშვილს. ძალიან უწყინარი შეკითხვა დავსვი და გია ჭანტურია რამ გააღიაზიანა, როცა ვინმეს მომხრეები გვიწოდა?!“ - კითხულობს ჟურნალისტი.