რეჟისორი ბუბა ხოტივარი საარჩევნო ციებ-ცხელებაზე საუბრობს. მისი აზრით, არჩევნების პირველი ტური კარგი იყო "ქართული ოცნების" გამოსაფხიზლებლად. მათ ბევრი დააშავეს.
"პირველი ტურის შედეგები კანონზომიერი იყო. მოსახლეობამ ყვითელი ბარათი უჩვენა მთავრობას, მაგრამ ეს არ ნიშნავს, რომ დამარცხებას ვაღიარებ. უნდა გაიმარჯვოს "ქართულმა ოცნებამ"! თუ გაიმარჯვებს რუსეთის სპეცსამსახურების ოფიცერი, საქართველო დაიღუპება. "ნაციონალურ მოძრაობას" რუსული სპეცსამსახურები ხელმძღვანელობენ, გრიგოლ ვაშაძე კი რიგითი ოფიცერია, ისევე როგორც სააკაშვილი და დანარჩენები. ესენი არიან საქართველოს დასანგრევად დაპროგრამებული მართვადი დაჯგუფება.
მე გრიგოლ ვაშაძის არც ერთი სიტყვის არ მჯერა. ვაშაძე, რომელსაც ბავშვებისთვის მოსწავლე-ახალგაზრდობის ისტორიული შენობის წართმევა უნდოდა, რა ნამუსით აპირებს პრეზიდენტობას? მისი გამარჯვება არ შეიძლება! საქართველოს ინტერესებიდან გამომდინარე. ივანიშვილს კიდევ ერთხელ დავუჯერებთ, მაგრამ თუ ცვლილებები ვერ დავინახეთ - უკანასკნელად..." - აცხადებს "კვირის პალიტრასთან" ხოტივარი.
