ჩვენ გვჭირდება პრეზიდენტი, რომელიც ვიზიტებში ლამაზად შეფუთული თაიგულივით კი არ ივლის, არამედ, მისი ყოველი ვიზიტი დაკავშირებული იქნება ახალი ინვესტიციის მოზიდვასთან,- განაცხადა ჟურნალისტებთან საუბარში „ევროპული საქართველოს“ ერთ-ერთმა ლიდერმა გიგი უგულავამ. 
დღეს „ევროპულმა საქართველომ“ პრეზიდენტობის კანდიდატად დავით ბაქრაძე წარადგინა. 

"ივანიშვილის მმართველობა დასასრულს უახლოვდება, ეს მას სურს თუ არა, დროის ამ დინებას ვერაფერი შეაჩერებს, ეს არის კანონზომიერი და ლოგიკური. ამიტომ მომდევნო პრეზიდენტის ამოცანა უნდა იყოს ქვეყანაში ცვლილებები დადგეს, რყევებისა და არეულობის გარეშე და სწორედ ამის გამკეთებელი არის პრეზიდენტი დავით ბაქრაძე. ჩვენ გვჭირდება პრეზიდენტი, რომელიც ვიზიტებში უბრალოდ კი არ ივლის ლამაზად შეფუთული თაიგულივით, არამედ, ყოველი მისი ვიზიტი დაკავშირებული იქნება ახალი ინვესტიციის მოზიდვასთან, რომელიც აუცილებელია სამუშაო ადგილების შექმნისთვის“, -განაცხადა გიგი უგულავამ და დასძინა, მილიონობით ადამიანი მთავრობას უპატრონოდ ჰყავს მიტოვებული. 

„ხშირად ემიგრანტები შიშის ქვეშ მუშაობენ, რომ აქ დარჩენილი ოჯახები გამოკვებონ. სწორედ ბაქრაძე იქნება ისეთი პრეზიდენტი, რომელიც ამ ყველაფერზე იზრუნებს. საპრეზიდენტო ფონდის 50 პროცენტზე მეტი დაიხარჯება განათლებაზე. მნიშვნელოვანია ასევე გზავნილი სოფლისათვის, მაგრამ მთავარი გზავნილი არის, ის რომ დავით ბაქრაძე იქნება ყველას პრეზიდენტი, რადგან საზოგადოების გახლეჩა დღეს ყველაზე დიდი პრობლემაა. მიმაჩნია, რომ ბაქრაძე იქნება ის პრეზიდენტი, რომელიც ამ ჩიხური მდგომარეობიდან, რომელიც "ქართულმა ოცნებამ" შექმნა, მშვიდად გაიყვანს ქვეყანას და ჩვენ გვექნება საიმედო პროგნოზირებადი ხვალინდელი დღე“, - განაცხადა გიგი უგულავამ.