ბატონი ლევან მურუსიძე მოიაზრება იმ კანდიდატებს შორის, რომლებსაც აქვთ უფლება უვადოდ განმწესების მოთხოვნით მიმართონ იუსტიციის უმაღლეს საბჭოს, - ამის შესახებ იუსტიციის უმაღლესი საბჭოს მდივანმა გიორგი მიქაუტაძემ განაცხადა, რითაც გამოეხმაურა საბჭოს ყოფილი მდივნის, ლევან მურუსიძის მოსამართლედ უვადოდ განმწესების საკითხს.
”განცხადებით მომართვის შემთხვევაში, რა თქმა უნდა, დავიწყებთ შესაბამის პროცედურებს და მივიღებთ გადაწყვეტილებას მის დანიშვნასთან თუ არდანიშვნასთან დაკავშირებით. ჩემი პირადი პოზიციაა ლევან მურუსიძეზე, თუ სხვა ნებისმიერ მოსამართლეზე, რომელიც თეორიულად აკმაყოფილებს ამ კრიტერიუმებს წინასწარ გაჟღერებული არ იქნება”, - განაცხადა გიორგი მიქაუტაძემ.
რაც შეეხება ლევან მურუსიძის მიმართ გამოთქმულ კრიტიკას, მათ შორის გირგვლიანის საქმესთან დაკავშირებით, გიორგი მიქაუტაძე აცხადებს, რომ მსგავსი პრეტენზიები იქონიებს თუ არა გავლენას ლევან მურუსიძის უვადოდ განმწესებასთან დაკავშირებულ საკითხზე, ამის განხილვის დრო არ დამდგარა.
”თუ იქნება შემოტანილი ლევან მურუსიძის მხრიდან მომართვა, ჩვენ განვიხილავთ და საბჭო პროცედურების დაცვით შესაბამის გადაწყვეტილებას მიიღებს”, - განაცხადა მიქაუტაძემ.
იუსტიციის უმაღლესი საბჭოს მდივანმა მოსამართლეების უვადოდ განმწესებასთან დაკავშირებით რეგლამენტით დამტკიცებაზე გააკეთა განმარტებები.
”როგორც ცნობილია, საკონსტიტუციო სასამართლომ მიიღო გადაწყვეტილება, რის შესაბამისადაც შეიცვალა კანონი და დადგინდა წესი, თუ როგორ უნდა დაინიშნონ ის მოსამართლეები უვადოდ, რომლებსაც აქვთ სამწლიანი გამოცდილება. დღეს იუსტიციის უმაღლესმა საბჭომ რეგლამენტში შეიტანა ცვლილება, რომლითაც განისაზღვრა წესი, თუ როგორ უნდა დაინიშნონ მოსამართლეები უვადოდ. ჩვენ სრულ შესაბამისობაში მოვიყვანეთ რეგლამენტი მოქმედ კანონთან და ვფიქრობ, ის უზრუნველყოფს ყოველგვარი შეკითხვების გარეშე ამ პროცედურების განხორციელებას”, - განაცხადა გიორგი მიქაუტაძემ.
