თბილისის მერიის თანამშრომელი ოთარ აბესაძე მის მიმართ წაყენებული ბრალის კვალიფიკაციას არ ეთანხმება. როგორც ჟურნალისტებს აბესაძის ადვოკატმა ირმა ჭკადუამ განუცხადა, დაცვის მხარეს ექნება გარკვეული დასაბუთება სასამართლოში ამასთან დაკავშირებით და კვალიფიკაციის შეცვლას მოითხოვენ.
რაც შეეხება პროკურატურის მოთხოვნას აღკვეთის ღონისძიების სახით პატიმრობის შეფარდებასთან დაკავშირებით, როგორც ადვოკატმა აღნიშნა, ამის საპირისპიროდ დაცვის მხარე სასამართლოს გირაოს შესთავაზებს.
"ჩვენ, რასაკვირველია, ალტერნატივის სახით შევთავაზებთ გირაოს და გარდა ამისა, გვექნება გარკვეული დასაბუთება კვალიფიკაციასთან დაკავშირებით, ვინაიდან ოთარ აბესაძე არ იყო საჯარო მოხელე. არ ვეთანხმებით კვალიფიკაციას. 2017 წლის 1-ელი ივლისიდან ოთარ აბესაძე არ იყო საჯარო მოხელე. ამ საქმეზე კი გამოძიება დაწყებულია 2017 წლის 8 ივლისს", - განაცხადა ირმა ჭკადუამ.
ოთარ აბესაძისთვის აღკვეთის ღონისძიების შეფარდებაზე სასამართლოში პროცესი ამ წუთებში უნდა დაიწყოს.
