ერთია გამოხატვის თავისუფლება, რომელიც დაცული, უზრუნველყოფილი და გარანტირებულია, მაგრამ მეორეა, როდესაც ეს ყველაფერი გადადის ძალადობაში, - ამის შესახებ პრეზიდენტის ადმინისტრაციის უფროსმა გიორგი აბაშიშვილმა ბათუმში განაცხადა.
პრეზიდენტის ადმინისტრაციის უფროსი, უშიშროების საბჭოს მდივანთან ერთად ბათუმში პრეზიდენტის დავალებით ჩავიდა, რათა არსებულ ვითარებას ადგილზე გაცნობოდა.
როგორც გიორგი აბაშიშვილმა განაცხადა, ყოვლად დაუშვებელია ძალადობა, რომელიც რამდენიმე საათის წინ ბათუმის ქუჩებში ხდებოდა.
”ერთია გამოხატვის თავისუფლება, რომელიც დაცული, უზრუნველყოფილი და გარანტირებულია, მაგრამ მეორეა, როდესაც ეს ყველაფერი გადადის ძალადობაში, რაც კატეგორიულად მიუღებელია და რომელსაც სჭირდება, შესაბამისი, ადეკვატური პასუხი სახელმწიფოს მხრიდან. აუცილებელია ჩატარდეს შესაბამისი საგამოძიებო მოქმედებები იმისთვის, რათა გაირკვეს, იყო თუ არა სამართალდამცავთა მხრიდან ძალის გადამეტება და ასევე, მეორე მხრივ, რას უკავშირდებოდა ძალადობრივი ფაქტები და ვინ იყო ამ ძალადობის შესაძლო ორგანიზატორი და მეორე მხრივ, შემსრულებელი. ჩვენ შესაბამის კომუნიკაციაში ვიმყოფებით შს მინისტრთან, ასევე აჭარის მთავრობის მეთაურთან”, - განაცხადა აბაშიშვილმა და აქვე აღნიშნა, რომ უშიშროების საბჭოს მდივანთან ერთად ის შესაბამის შეხვედრებს ადგილზე გამართავს.
რაც შეეხება პროცესის შესაძლო მართულობის შესახებ დასმულ კითხვას, როგორც პრეზიდენტის ადმინისტრაციის უფროსმა აღნიშნა, ამაზე საუბარი ჯერჯერობით ნაადრევია.
