ოფიციალური მოსკოვი თვლის, რომ განცხადებები იმის თაობაზე, რომ რუსეთს კომპრომატი გააჩნია აშშ-ის ახლად არჩეულ პრეზიდენტზე დონალდ ტრამპზე წარმოადგენს ორმხრივი ურთიერთობებისთვის ზიანის მიყენების მცდელობას, - განაცხადა რუსეთის პრეზიდენტის პრესმდივანმა დიმიტრი პესკოვმა.
„ამაზე რეაგირება იუმორით უნდა მოხდეს. თუმცა, არის სამწუხარო მხარეც: რეალურად არსებობენ ისინი, ვინც ისტერიას ქმნიან, მხარს უჭერენ ამ კუდიანებზე ნადირობას“, - განაცხადა პესკოვმა.
რუსეთის პრეზიდენტის პრესმდივანმა აღნიშნა, რომ „კრემლი არ არის დაკავებული კომპრომატების შეგროვებით“.
CNN-ის ინფორმაციით, აშშ-ის სპეცსამსახურების წარმომადგენლებმა დონალდ ტრამპს 6 იანვარს ნიუ-იორკში გამართულ სპეციალურ ბრიფინგზე ინფორმაცია მიაწოდეს იმის თაობაზე, რომ რუსეთის სპეცსამსახურები მასზე პირადი და ფინანსური ხასიათის კომპრომატს ფლობენ.
თავის მხრივ, CNN აშშ-ის მთავრობის წარმომადგენლებისგან მიღებულ ინფორმაციას ეყრდნობა.
CNN-ის წყაროს ინფორმაციით, რუსეთის სპეცსამსახურებმა აშშ-ის ახლად არჩეულ პრეზიდენტზე კომპრომატი მისი მოსკოვში 5-დღიანი ვიზიტისას მოიპოვეს, მათ შორის, სექსუალური ხასიათის ჩანაწერები.