ყველაზე მშვიდობიან, ან ყველაზე უარეს ვარიანტში, ”ნაციონალური მოძრაობა” ჩვეულებრივი დაბალრეიტინგული პარტია იქნება, როგორიც ბევრია ქართულ პოლიტიკაში, - ამის შესახებ ”ინტერპრესნიუსს” ექსპერტმა რამაზ საყვარელიძემ ”ნაციონალურ მოძრაობაში” მიმდინარე მოვლენების შეფასებისას განუცხადა.
საყვარელიძის თქმით, მსგავსი მოვლენები, რაც დღეს პარტიაში ხდება, უკვე ვნახეთ 2016 წელს, მაშინ როცა ”გირჩი” და ვაშაძის გუნდი გამოეყო ”ნაციონალურ მოძრაობას”.
”2016-მა წელმა უკვე გვაჩვენა ანალოგიური მოვლენა, ”გირჩი” და ვაშაძის გუნდი იყვნენ მაგალითები, რომლებიც ასეთი გაყოფით გაჩნდნენ ქართულ პოლიტიკაში, ”ნაციონალების” გაყოფით, ოღონდ სააკაშვილის გარეშე. კარგად მოგვეხსენება, თუ რა ხმები აიღეს მათ. ამ ფაქტიდან გამომდინარე, ვვარაუდობ, რომ დღეს იქნება თუ ხვალ, ცალკე გამოყოფილი გუნდი სააკაშვილის გარეშე ქართულ პოლიტიკაში დაახლოებით ანალოგიურ სიტუიაციაში აღმოჩნდება. მათ მოუწევთ საკუთარ რეიტინგზე ზრუნვა, როგორც დღეს ”გირჩი” ზრუნავს საკუთარ მომავალზე. მარიხუანას მიმართავს, მიშას მაგივრად და ეგაა”, - განაცხადა რამაზ საყვარელიძემ.
რაც შეეხება პარტიის კიდევ ერთ სახეს, გიგი უგულავას, ექსპერტი მიიჩნევს, რომ უგულავა არ არის ისეთი ფიგურა, რომელიც შეიძლება შემრიგებლად გამოდგეს.
”გიგი უგულავამ თქვა შემრიგებელი ვიქნებიო, მაგრამ დიდი ოპტიმიზმი მასაც არ ეტყობოდა. თქვა, რომ თუ არ გამოგვივა დავშორდეთ ცივილიზებული ფორმებითო, ასე, რომ მგონი თვითონაც იცის, რომ ასეთი გამძაფრებული დაპირისპირების მოხსნა რთული საქმეა და უგულავა არ არის ის ფიგურა, რომელიც გადამწყვეტ როლს შეასრულებს ამ ყველაფრის დარეგულირებაში, ასეთი ფიგურა ალბათ სააკაშვილია. მას რომ ჰქონდეს სურვილი, შეიძლება ჰქონდეს რესურსი მხარეთა შერიგების. სხვას მეეჭვება, რომ ვინმეს აღმოაჩნდეს ამის უნარი”, - აღნიშნა ექსპერტმა.
