”ნაციონალური მოძრაობა” იმსჯელებს, თუ რა ფორმით იქნება წარმოდგენილი პარტია საკონსტიტუციო კომისიაში, თუმცა ზოგადად გვაქვს გადაწყვეტილება მიღებული, რომ ყველა მიმართულებით უნდა ვიბრძოლოთ, - ამის შესახებ ”ინტერპრესნიუსს” ”ნაციონალური მოძრაობის” წერმა სერგო რატიანმა განუცხადა, რომელიც გამოეხმაურა პარლამენტის თავმჯდომარე ირაკლი კობახიძის განცხადებას, რომ საკონსტიტუციო სასამართლოს ერთადერთი თავმჯდომარე თავად იქნება.
კითხვაზე, თუ როგორ აფასებს რატიანი იმ გადაწყვეტილებას, რომ პრეზიდენტის თანათავმჯდომარეობის საკითხი, რისი ინიციატივითაც თავად პირველი პირი გამოვიდა, ”ქართული ოცნების” ხელისუფლების მხრიდან იგნორირებულ იქნა, რატიანმა აღნიშნა, რომ ამ გადაწყვეტილებით ჩანს, რომ ”ქართული ოცნება” პატივს არ სცემს ინსტიტუციებს.
”ინსტიტუციებს შორის ბალანსი და ურთიერთპატივისცემა დღეს ხელისუფლებას აღარ აქვს. ეს ბიძინა ივანიშვილის კაპრიზია, რომ პრეზიდენტი უნდა იყოს გარიყული და დასჯილი. სწორედ ამასთან არის დაკავშირებული ის გადაწყვეტილება, რომელიც დღეს ხელისუფლებამ მიიღო”, - განაცხადა სერგო რატიანმა.
საკონსტიტუციო კომისია იმავე ფორმატით შეიქმნება, როგორც სამი წლის წინ და მას პარლამენტის თავმჯდომარე უხელმძღვანელებს. ამის შესახებ პარლამენტის თავმჯდომარემ ირაკლი კობახიძემ დღეს გამართულ პრესკონფერენციაზე განაცხადა.
„მინდა გაცნობოთ, რომ გუშინ ინიცირებულ იქნა საქართველოს პარლამენტის დადგენილების პროექტი სახელმწიფო საკონსტიტუციო კომისიის შექმნის შესახებ. დადგენილების პროექტი ითვალისწინებს სახელმწიფო საკონსტიტუციო კომისიის დაფუძნებას იმავე ფორმატით, ის შეიქმნა ზუსტად სამი წლის წინ. კომისიის თავმჯდომარე იქნება საქართველოს პარლამენტის თავმჯდომარე. კომისიის შემადგენლობაში შევლენ როგორც საპარლამენტო და არასაპარლამენტო პარტიები, ასევე, კონსტიტუციური ორგანოების წარმომადგენლები, სამოქალაქო სექტორის წარმომადგენლები და ექსპერტები. კომისიის საქმიანობა დაეფუძნება გამჭვირვალობის პრინციპს და მასში უზრუნველყოფილი იქნება ყველა დაინტერესებული მხარის ფართო ჩართულობა. გარდა ამისა, უზრუნველყოფილი იქნება შემუშავებული პროექტის შეფასებაში ჩვენი უცხოელი პარტნიორების, განსაკუთრებით - ვენეციის კომისიის აქტიური მონაწილეობა, რასთან დაკავშირებითაც უკვე იმართება მოლაპარაკებები ჩვენს უცხოელ მეგობრებთან. კომისიის მიზანია კონსტიტუციის გადასინჯვის იმგვარი კანონპროექტის შემუშავება, რომლის მიღება უზრუნველყოფს კონსტიტუციის სრულ შესაბამისობას კონსტიტუციური სამართლის ფუნდამენტურ პრინციპებთან და ქვეყნის გრძელვანიანი დემოკრატიული განვითარების ინტერესის შესაბამისი კონსტიტუციური სისტემის ჩამოყალიბებას“, - განაცხადა კობახიძემ.
