გაოცებული ვარ მხოლოდ იმით, როგორ გაძლო ”რესპუბლიკურმა პარტიამ” 4 წელი მმართველ გუნდთან, - ამის შესახებ ”ინტერპრესნიუსს” ექსპერტმა სოსო ცინცაძემ ”რესპუბლიკური პარტიის” დღევანდელი გადაწყვეტილების შესახებ განუცხადა. მისი თქმით, ”რესპუბლიკური პარტია” ნომერ პირველი ინტელექტუალური პარტიაა.
”მე მაგალითად მხოლოდ ერთი რამით ვარ გაოცებული თუ როგორ გაძლეს ამ კამპანიაში 4 წელი. ვფიქრობდი, რომ ”რესპუბლიკელები” თავიანთ ჭკუაზე მოიყვანდნენ პოლიტიკურ ზოოპარკს, პარლამენტს რომ უწოდებენ ჩვენთან ან დროზე ადრე მიატოვებდნენ მმართველ პარტიას. თუმცა, ჯობს გვიან ვიდრე არასდროს. ზოგს მოწონს ”რესპუბლიკური პარტია”, ზოგს არა. ის არის ნომერ პირველი ინტელექტუალური პარტია. ის არის ერთადერთი პარტია, რომლის მმართველი ბირთვი არ არის აქეთ-იქით მხტომელი. ჩვენ გვყავს პარტიები, რომლებიც მიუტოვებიათ მეორე-მესამე კაცებს. ”რესპუბლიკელები” ამით დაცულები არიან. მხოლოდ მედროვეები, რომლებიც მიეკედლნენ მხოლოდ მას შემდეგ რაც ივანიშვილის გარემოცვაში დომინირებულ ძალად იქცნენ, ისინი წავლენ და მიატოვებენ ალბათ”, - განაცხადა ცინცაძემ.
მისივე თქმით, ”რესპუბლიკური პარტია” ერთადერთი პარტიაა, რომელსაც აქვს ნათლად გამოკვეთილი იდეოლოგიური პლატფორმა.
”კონსერვატორები კონსერვატორობას იმით ამტკიცებენ, რომ ჩოხებით სიარულს მოითხოვენ, მმართველ პარტიას საერთოდ რა პლატფორმა აქვს - მემარჯვენეა, მემარცხენეა ვერ გეტყვიან. ამ პარტიაში რამდენსაც არ უნდა კითხო, სხვადასხვა პასუხს მიიღებთ”, - აღნიშნა ცინცაძემ.
ცინცაძე ვარაუდობს, რომ ”რესპუბლიკურმა პარტიამ” 4 წელი ნაყოფიერად გამოიყენა, შექმნა რეგიონებში მძლავრი პარტიული ინფრასტრუქტურა, რომელიც პარტიას დაეხმარება არჩევნებში მინიმუმ ბარიერის გადალახვაში.
”თუ ვინმეს ეკუთვნის ქართულ პარლამენტში ყოფნა, ერთ-ერთი ”რესპუბლიკური პარტიაა”. თუ ნორმალური არჩევნები იქნება და ჩვენი საზოგადოება ამ დებილობის პოზიციიდან ნორმალიზაციისკენ ერთ ნაბიჯს მაინც გადადგამს, ”რესპუბლიკური პარტიის” ადგილი არის პარლამენტში”, - აღნიშნა ცინცაძემ.
მისივე თქმით, ”რესპუბლიკურ პარტიას” სისტემური ნაკლი არ აქვს.
”გია ხუხაშვილს უთქვამს, რომ სისტემური ნაკლი აქვსო. არავითარი სისტემური ნაკლი არ აქვს. თუ სისტემურ ნაკლზე შეიძლება ლაპარაკი, უნდა ვილაპარაკოთ ისევ იმ პარტიაზე, სადაც 4 წლის წინ მთავარი ვიოლინო იგივე გია იყო. იქ ეძებოს სისტემური ნაკლი”, - განაცხადა ცინცაძემ.
