რუსუდან გლურჯიძის ფილმი "სხვისი სახლი" კარლოვი ვარის კინოფესტივალის გამარჯვებული გახდა. როგორც „ინტერპრესნიუსს“ საქართველოს კინემატოგრაფიის ეროვნული ცენტრიდან აცნობეს, "სხვისი სახლი" საუკეთესო ფილმად საკონკურსო პროგრამაში - East of the West - აღიარეს. დაჯილდოების ცერემონია, რომელსაც ფილმის შემოქმედებითი ჯგუფი დაესწრო, 9 ივლისს კარლოვი ვარში გაიმართა. აღსანიშნავია, რომ ფესტივალის ძირითადი საკონკურსო პროგრამის ჟიურის ერთ-ერთი წევრი წელს ცნობილი ქართველი რეჟისორი გიორგი ოვაშვილი იყო, რომელსაც კარლოვი ვარის კინოფესტივალზე მთავარი პრიზი "ბროლის გლობუსი" აქვს მიღებული ფილმისთვის "სიმინდის კუნძული" (2014). ფესტივალის ოფიციალურ პარალელურ პროგრამაში "მომავლის კადრები" აჩვენეს კიდევ ერთი ქართველი რეჟისორის, დავით ფირცხალავას მოკლემეტრაჟიანი ფილმი "მამა", ლევან კოღუაშვილის დოკუმენტური ფილმის პროექტი "გოგიტას ახალი ცხოვრება" კი Docu Talents from the East 2016-ში მონაწილეობდა.
კარლოვი ვარის ფესტივალი ცენტრალური და აღმოსავლეთ ევროპის წამყვანი და ყველაზე პრესტიჟული კინოფესტივალია, რომელიც ჩეხეთის ქალაქ კარლოვი ვარში 1946 წლიდან იმართება.
