ნატო არის პირველ რიგში ღირებულებითი კავშირი, - ამის შესახებ საქართველოს პრეზიდენტმა გიორგი მარგველაშვილმა დღეს ვარშავაში პრესკონფერენციაზე განაცხადა, სადაც ნატო-ს სამიტის შედეგები შეაჯამა.
საქართველოს პრეზიდენტმა კომენტარი გააკეთა ნატო - საქართველოს კომისიის სხდომის შემდეგ მიღებულ ერთობლივ განცხადებაზე, სადაც ალიანსი საქართველოში საპარლამენტო არჩევნების უმაღლესი დემოკრატიული სტადრატებით ჩატარდებასთან დაკავშირებით იმედს გამოთქვამს.
გიორგი მარგველაშვილის თქმით, ალიანსის წევრები დარწმუნებულები არიან, რომ შემდეგი არჩევნები საქართველოში ქვეყნის დემოკრატიულობის თვალსაზრისით კიდევ ერთხელ მტკიცედ გადადგმული ნაბიჯი იქნება.
„ნატო არის პირველ რიგში ღირებულებითი კავშირი. ქვეყნები, რომლებიც გაერთიანებული არიან ნატოში და ქვეყნები, რომლებიც ესწრაფვიან გაერთიანებას ნატოში, ერთიანდებიან არამარტო სამხედრო დაცულობის თვალსაზრისით, არამედ იმ ღირებულებების ირგვლივ, როგორიც არის დემოკრატია და პიროვნული თავისუფლებები. ამ თვალსაზრისით არჩევნები ბუნებრივია არის უმნიშვნელოვანესი ნაბიჯი ჩვენი ქვეყნის დემოკრატიულობის განმტკიცების თვალსაზრისით. ნატოს პოზიცია მდგომარეობს იმაში, რომ ისინი დარწმუნებულები არიან, რომ შემდეგი არჩევნები იქნება კიდევ ერთხელ მტკიცედ გადადგმული ნაბიჯი ჩვენი ქვეყნის დემოკრატიულობის თვალსაზრისით. ეს არის ბუნებრივი გამომდინარე იქედან, რომ ჩვენ ვერთიანდებით ღირებულებების ირგვლივ, ვერთიანდებით დემოკრატიული სახელმწიფოს განტკიცების ირგვლივ“, - განაცხადა მარგველაშვილმა.
