შემოდგომაზე საქართველოს ჩრდილოატლანტიკური ალიანსის საბჭო ეწვევა, - ამის შესახებ საქართველოს პრეზიდენტმა გიორგი მარგველაშვილმა დღეს ვარშავაში გამართულ პრესკონფერენციაზე განაცხადა, სადაც ნატო-ს სამიტის შედეგები შეაჯამა.
გიორგი მარგველაშვილმა მადლობა გადაუხადა ყველას, ვინც მუშაობდა ამ სამიტის მოსამზადებლად. პრეზიდენტმა აღნიშნა, რომ საქართველო რეგიონის უსაფრთხოების და ქვეყნის თავდაცვისუნარიანობის ამაღლებისკენ მტკიცე ნაბიჯების გადასადგმელად საკითხებზე თავის პარტნიორებთან ერთად მუშაობდა.
„ჩვენ დავამთავრეთ მუშაობა ნატოს ვარშავის სამიტზე. მე მინდა მადლობა ვუთხრა ყველას, ვინც მუშაობდა ამ სამიტის მოსამზადებლად. ჩვენ ვმუშაობდით ჩვენს პარტნიორებთან და მეგობრებთან ერთად. ვმუშაობდით იმისთვის, რომ გლობალური უსაფრთხოების, ჩვენი რეგიონის უსაფრთხოების და საქართველოს თავდაცვისუნარიანობის ამაღლებისკენ მტკიცე ნაბიჯები გადაგვედგა. დავიწყოთ, იმით, რომ ნატოს სამიტზე დაფიქსირდა საქართველოს სრული და უპირობო მხარდაჭერა, უპირობო მხარდაჭერა ჩვენი ტერიტორიული მთლიანობისა და სუვერენიტეტის და იმ გზის , რომელსაც საქართველო ახორციელებს ნატოში ინტეგრაციის გზაზე“, - განაცხადა საქართველოს პრეზიდენტმა.
მისივე თქმით, ამ სამიტზე საქართველომ მიიღო რეალური ინსტრუმენტები, იმისთვის, რომ გააძლიეროს და გააღრმავოს საქართველოს ინტეგრაციის პროცესი.
„ჩვენ სხვა ქვეყნის ლილდერებთან ერთდ ჩამოვყალიბდით ავღანეთში გლობალური უსაფრთხოების თვალსაზრისით მისიის შემდგომ ნაბიჯებზე და ჩამოვყალიბდით იმასთან დაკავშირებით, რომ ავღანეთს სჭირდება კიდევ ერთხელ დახმარება და მხარდაჭერა. უმნიშვნელოვანესი არის ის, რომ ნატო იწყებს დისკუსიას შავი ზღვის აუზის უსაფრთხოების საკითხებთან დაკავშირებით და საქართველო ამ დისკუსიის ბუნებრივი და შემადგენელი ნაწილი იქნება. ასევე საქართველო და ნატო ჩამოყალიბდნენ საჰაერო თავდაცვის გაძლიერების მიმართულებით თანამშრომლობაზე, სამხედრო განათლების სფეროში თანამშრომლობაზე და სტრატეგიული კომუნიკაციების მიმართულებით თანამშრომლობაზე, ასევე იქნება დაკავშირებული ნატოს ტრანსფორმაციის სარდლობასთან. ჩამოყალიბდა ნათელი ხედვა ფინანსურ თანამშრომლობასთნ დაკავშირებით და ქვეყნების ჩართულობასთან დაკავშირებით საქართველოს თავდაცვისუნარიანობის ამაღლებიის თვალსაზრისით“, - აღნიშნა პრეზიდენტმა.
მისივე განცხადებით, შემოდგომაზე საქართველოს ჩრდილოატლანტიკური ალიანსის საბჭო ეწვევა, რაც საქართველოს მიმართ პოლიტიკური მხარდაჭერის გამოხატვის კიდევ ერთი ნათელი ნაბიჯი იქნება.
