ჟენევაში, გაერო-ს რასობრივი დისკრიმინაციის აღმოფხვრის კომიტეტმა საქართველოს მთავრობის მიერ 2014 წლის 2 ივლისს, „რასობრივი დისკრიმინაციის ყველა ფორმის აღმოფხვრის შესახებ“ საერთაშორისო კონვენციის შესაბამისად წარდგენილი ანგარიშები განიხილა.
განხილვაში მონაწილეობა მიიღო შერიგებისა და სამოქალაქო თანასწორობის საკითხებში სახელმწიფო მინისტრის აპარატის საერთაშორისო ორგანიზაციებთან ურთიერთობისა და სამართლებრივი უზრუნველყოფის დეპარტამენტის უფროსმა თინა ღოღელიანმა.
როგორც ”ინტერპრესნიუსს” სამინისტროდან აცნობეს, ქართულმა მხარემ გაერო-ს რასობრივი დისკრიმინაციის აღმოფხვრის კომიტეტის წევრებს ინფორმაცია მიაწოდა საქართველოს მიერ კონვენციის იმპლემენტაციის შესახებ და ამ მიმართულებით განხორციელებულ რეფორმებზე.
მათივე ინფორმაციით, აქცენტები გაკეთდა საქართველოს ოკუპირებულ ტერიტორიებზე არსებულ ადამიანის უფლებათა მდგომარეობაზე და ეთნიკური ნიშნით ქართველების დევნა-შევიწროებაზე.
კომიტეტის წევრებმა ასევე მოისმინეს ინფორმაცია სამოქალაქო ინტეგრაციის მიმართულებით განხორცილებულ ღონისძიებებზე, ეთნიკური უმცირესობების პოლიტიკურ ცხოვრებაში ჩართულობისა და ბოშათა ინტეგრაციის საკითხებზე.
კომიტეტის წევრებმა მადლობა გადაუხადეს საქართველოს დელეგაციას გაწეული სამუშაოსათვის და მიწოდებული ინფორმაციისათვის.
განხილვის შედეგად კომიტეტი მიიღებს დასკვნით მოსაზრებებს, რომელშიც მოცემული იქნება რეკომენდაციები.
