ირაკლი სესიაშვილს გული დასწყდა, რომ ეს პროექტი არ განხორციელდა, - ამის შესახებ "თავისუფალი დემოკრატების" ერთ-ერთმა ლიდერმა ზურაბ აბაშიძემ ე.წ. კაბელების საქმეზე ირაკლი სესიაშვილის დაკითხვის შემდეგ განაცხადა.
როგორც აბაშიძემ აღნიშნა, პროცესზე ირაკლი სესიაშვილმა პირდაპირ აღიარა, რომ მას დაინტერესება ჰქონდა ავთანდილ ჭოლოკავას წინადადებასთან დაკავშირებით, რომელიც თავდაცვის სამინისტროსთვის მაგისტრალური კაბელების მიწოდებას ეხებოდა.
"პირდაპირ აღიარა კიდევაც ბატონმა ირაკლიმ და არც დაუმალავს, რომ ავთანდილ ჭოლოკავას იცნობს. მას ძალიან მოეწონა ჭოლოკავას იდეა და შემდგომ მიმართა ირაკლი ალასანიას, რომ მოჰყოლოდა ამ იდეას ხორცშესხმა, რაც არ განხორციელდა, რადგან სამინისტრომ და შესაბამისმა ხელმძღვანელობამ იმ პერიოდში ჩათვალეს, რომ ეს არ იყო განსახორციელებელი პროექტი. დანარჩენი დეტალები, იყო თუ არა ნასამართლევი ავთანდილ ჭოლოკავა, ან ჰქონდა თუ არა კავშირი უცხო ქვეყნების სპეცსამსაურებთან, როგორც ჩანს, ირაკლი სესიაშვილს არ ახსოვს", - განაცხადა ზურაბ აბაშიძემ.
მისივე თქმით, ის არ იზიარებს მისი კოლეგის, პარლამენტის თავდაცვისა და უშიშროების კომიტეტის თავმჯდომარის პოზიციას იმასთან დაკავშირებით, რომ ავთანდილ ჭოლოკავას სანდოობის შემოწმება მისი კომპეტენცია არ იყო. როგორც ზურაბ აბაშიძემ აღნიშნა, აშკარად გამოჩნდა პროცესზე, რომ სესიაშვილი დაინტერესებული იყო და გული დაწყდა, რომ ჭოლოკავას იდეა და პროექტი არ განხორციელდა.
"მას გული დაწყდა, რომ ეს პროექტი არ განხორციელდა. პირდაპირ აღნიშნა, რომ ეს პროექტი რომ განხორციელებულიყო, უკეთესი იქნებოდა ქვეყნისთვის", - განაცხადა ზურაბ აბაშიძემ.
