კონსტიტუციონალისტი ვახუშტი მენაბდე ეჭვობს, რომ საკონსტიტუციო ცვლილებების საყოველთაო სახალხო განხილვის საორგანიზციო კომისიის მიერ პარლამენტისთვის შეთავაზებული პროექტის მიღება ვერ მოესწრება.
როგორც მენაბდემ ჟურნალისტებს პარტიებისა და არასამთავრობო სექტორის წარმომადგენლებთან აღნიშნული კომისიის წევრების შეხვედრის დაწყებამდე განუცხადა, კონსტიტუციით, იმისთვის, რომ პარლამენტმა საკონსტიტუციო ცვლილებები მიიღოს, საჭიროა ორი თანმიმდევრული სესია, კენჭისყრებს შორის პერიოდი კი 3 თვეზე ნაკლები არ უნდა იყოს.
"ამის გათვალისწინებით, მე ძალიან რთულად წარმომიდგენია, რომ ეს ცვლილებები მოესწროს. ერთ რამეზე მინდა გავამახვილო ყურადღება, თუ დავაკვირდებით საერთო სახალხო განხილვას, მასში ხელისუფლება არ მონაწილეობს. ეს არის ხალხის მიერ ინიცირებული პროექტი, რომელსაც 200 000-ზე მეტმა ამომრჩეველმა მოაწერა ხელი და ზუსტად ამდენივე ამომრჩეველმა მიმართა პარლამენტს ინიციატივით. ძალიან სამწუხაროა, რომ არსებული ხელისუფლება გულგრილად ეკიდება ხალხის შეთავაზებას და იმის ღირსადაც კი არ თვლის საზოგადოებას, რომ მის ინიციატივაზე იმსჯელოს", - განაცხადა ვახუშტი მენაბდემ.
ცნობისთვის, ამ წუთებში სასტუმრო "ქორთიარდ მარიოტში" საკონსტიტუციო ცვლილებების საყოველთაო სახალხო განხილვის საორგანიზაციო კომისიის შემაჯამებელი სხდომა მიმდინარეობს.
