ირაკლი ალასანია ჩემი მეგობარია, მაგრამ მეგობრობა ერთია და პოლიტიკურ პარტიაში გაწევრიანება – სხვა, - ამის შესახებ "ინტერპრესნიუსს" სოფლის მეურნეობის ყოფილმა მინისტრმა დავით კირვალიძემ განუცხადა.
კირვალიძის თქმით, ის ამჟამად საერთაშორისო ორგანიზაციაში New Frontiers in Agriculture (CNFA) დირექტორთა საბჭოს წევრია და არც ერთ პოლიტიკურ პარტიაში გაწევრიანებას არ გეგმავს.
"თავისუფალი დემოკრატების" ლიდერმა ირაკლი ალასანიამ "ინტერპრესნიუსთან" ინტერვიუში განაცხადა, რომ დავით კირვალიძე მისი ახლო თანამოაზრეა და "თავისუფალი დემოკრატები" მასთან თანამშრომლობას აუცილებლად გააგრძელებს. 
"თავისუფალი დემოკრატების" სოფლის მეურნეობის სტრატეგია, რომელიც შემდგომ კოალიცია "ქართული ოცნების" სოფლის მეურნეობის სტრატეგიის საფუძველი გახდა, სწორედ დათოსთან ერთად იყო შემუშავებული. ახლა ის დამოუკიდებელი ექსპერტის როლშია, მაგრამ მე არ გამოვრციხავ, ბუნებრივია. ჩვენ მეგობრები ვართ და გავაგრძელებთ თანამშრომლობას, იმიტომ, რომ ისეთი ხალხი, როგორიც დათოა, ჩვენს ქვეყანას და სოფლის მეურნეობის განვითარებას სჭირდება", - განაცხადა ალასანიამ იმ კითხვის პასუხად, ხომ არ შეიძლება, კირვალიძე "თავისუფალი დემოკრატების" რიგებში ვიხილოთ.
დეპუტატმა ვიქტორ დოლიძემ, თავის მხრივ აღნიშნა, რომ დავით კირვალიძე პროფესიონალია და მიესალმება, თუ იგი "თავისუფალი დემოკრატების" რიგებში გაწევრიანდება.