გერმანიის საგარეო საქმეთა მინისტრი ფრანკ-ვალტერ შტაინმაიერი ნატო-რუსეთის საბჭოს საქმიანობის აღდგენის ინიციატივით გამოვიდა. ამის შესახებ გერმანული გამოცემა "დოიჩე ველე" იტყობინება.
შტაინმაიერმა აღნიშნული განაცხადება ბრიუსელში მიმდინარე მინისტერიალზე გააკეთა და აღნიშნა, რომ ორი მხარის სამხედროებმა "რისკების აცილების მიზნით უნდა გამოიყენონ შესაძლებლობები ინფორმაციის გაცვლისთვის".
"დოიჩე ველე" აღნიშნავს, რომ გერმანია ნატო-სა და რუსეთს შორის კონტაქტების დამყარებას ბოლო რამდენიმე თვეა ლობირებს, თუმცა ბერლინის ძალისხმევა ჯერჯერობით უშედეგოა, რადგან ნატო-ში შემავალი აღმოსავლეთ ევროპის ქვეყნები რუსულ მხარესთან პარტნიორული ურთიერთობის აღდგენის წინააღმდეგ გამოდიან.
ნატო-რუსეთის საბჭოს 2002 წელს შეიქმნა. ბოლო საბჭოს სხდომა 2014 წლის ზაფხულში გაიმართა. ჩრდილოატლანტიკურმა ალიანსმა მოსკოვთან დიალოგზე ყირიმის ანექსიის შემდეგ თქვა უარი.
